Бытия степени
Различно человеци во мир изведени, мнози бо суть нашего бытия степени. Первый бе во Адаме, ни отец, ни мати роди его, но сам Бог изволи создати. Вторый степень — во Евве, та из мужа бяше Богом, яко из отца, матере не знаше. Третий — общий всем людем изводити дети, всякому чаду отца и матерь имети. Четвертый в Христе Бозе степень проявися, точию из матере, без отца родися. Разве сих возможно ли человеком быти? Аз о силе Божией несмь силен судити. Бегание из церкве
Брат некий на молитве уныло стояше и во время пения из церкве бегаше, За что от началника много наказася, но нимало исправлен быти показася. Авва рече братии молитву творити, еже бы уныние брату отложите. По дву днию молитвы во церкви стояху и мала ефиопа пришедша видяху, Иже за воскрилие риз брата влечаше из храма, а он по нем неспорно идяше. Изъшедшу же из храма вси ся удивиша и паки о брате си Господа молиша. Егда же вси из храма купно изьидоша, брата празно ходяща того обретоша. Тогда началник брата жезлом си побил есть. а зане же смирися. Бог й ущедрил есть. Даде ему охотность во церкви стояти, не к тому соборныя милитвы лишати. Бегати
Бегаем проказою мужа поврежденна, паче бегати нужда злонравием тленна. Проказа бо токмо плоть обыче вредити, а злонравие душу весть въконец губити. Бегати злых
Слон козла смрада ради прескоро гонзает, муж благий злонравнаго тако да бегает. Бедство
Бедство: конем бегати, чрез море плавати, под мучителем лютым живот провождати. Бедство в пути
Исраиль ветхий, егда исхождаше с Египта в Сион, препинаем бяше множеством градов, твердо остененных, вооруженных. К тому и земля народ поглощаше, иже в тех странах в то время живяше; исполинове зело страшны бяху, гибель прещаху. Что бедным людем видеся творити? Точию слезы горкия точити, найпаче бывшым без утвержения их спасения. Точне новому слезы подобают, яко отвсюду врази окружают: демон, мир и плоть велиции зело настоят смело. А мы помощи недостойни свыше, яко гневаем Господа излише, но милость Его грешныя милует, помощь готует. Беды нудят ко Богу
Егда Авесолом отца прогневаше, ко умолению средствия искаше. Посла к Иоаву, вожду полков царских и многих общнику тайн государских. Моля, да приидет к нему и поможет здравым си советом, поелику может. Он же небрег молбы, ити не хотяше и тем царска сына зело огорчаше. Что же Авесолом? Рабы посылает и севбы на нивах его сожигает. Тако понужден быв. ко Авесолому Иоав прииде из своего дому. Совет сотворил есть, како благодати от отца воможно сыну восприяти. Нечто подобное и Дух Святый деет, егда милостию ничто в нас успеет. Обыче бо казни тяжки насылати, да тыя возмогут к нему убеждати. Елма убо кому беды досаждают по согрешении, к Богу понуждают. Да бы обратился; убо требъ знати, яко во печалях к Богу притекати Зело есть полезно, не унылу быти, но покаяние по гресех творити. Беды добрых
Вскую обыче Господь добрым попущати людем беды лютыя во мире страдати? Да подобии образу будут Сына Его. беды страдавша во дни странствия Своего. 2 Беды и скорби благим благо деют, аще точию терпети умеют. Не того ради скорбь я угнетает, да озлобленны оны содевает, Но да благость их будет проявленна. яже внутрь сердец бяше утаенна. Грозды точило елма согнетает, сладкое вино из них изтекает. Точне маслины, егда ся стаскают. сладостный елей из себе пущают. Класы пшеницы обычно есть бити или топтати, да бы отлучити Зерно от плевел, иначе во класе согнити имать в неколиком часе. Огнь палящь злато и сребро чищает, прание платно бело содевает. Подобне беды, благим напущенны, благости онех творят проявленны, И еже худо внутрь их обретают, то от благости добре отлучают. 3 Добро есть добрым беды своя знати, да бы безбедно в небо шествовати. Тех же числом осмь мудрии считают, яже подробну сице полагают. Беда первая — вина первородна, съпадшая на ны от отца всеродна, В нем же, согрешшем, и мы согрешихом; не ядше плода в рай, винны быхом. Яко с Адамля семене исходим, праотча греха общницы ся родим. Вторая беда греха делом суща, душу в погибе вечную ведуща. Его же никто может избежати, кроме Божия живущ благодати. Третия беда — немощь превелика, обдержащая всяка человека. Ею же к злобе приклонни бываем, неудобно же ко благости встаем. Четвертая есть беда превелики нищеты мира, яже человеки Благия часто люте озлобляет, егда и нуждных житию лишает. Пятая беда — от злых гонения, лишающаго нас утешения. Еже той может удобно страдати, кому изволит Господь помощь дати. Шестая беда есть искушение врага проклята на злотворение. Ему же может той противен быти, кто тщится с Богом лета своя жити. Седмая беда есть грядуща века вечна погибель грешна человека. Ея же муж добр удобь избегает, яко, ту помня, злобы отбегает. Осмая беда скорбна, но спасенна — епитимия, за грех возложенна, Юже кто чистым сердцем совершает, беду на радость вечну изменяет. 4 Иаков святый велит нам страдати беды всякия, слезити, рыдати. Рыдати, беды вся познавающе, им же подлежим, грешни люди суще. Грех бо виновен от начала века бед всех, на грешна сущих человека. Второе — беду вины обрыдати нам подобает и казнь налагати, Да не изволит Бог за ню казнити, но кающымъся милость си явити. Третие — в слезах должно пребывати, во терпении вся скорби страдати, Яже в жизни сей нам ся приключают, судбами Бога посланы бывают. Четвертое — нам хранити есть требе вечныя муки, разсуждати в себе, Покаянием тыя искупати зде, да бы тамо онех не страдати. Пятое — беды вражих искушений терпети нужда и лютых гонений, За ня же в небе мзда вечна готова от Христа Бога, Бога Отца Слова. Шестое — требе чужды беды знати, яко судом си соболезновати. Се бо небесну Отцу зело годе, таковы селит во вечной породе. Седмое — труды жизни сея требе непрестанными стати в светлом небе, Трудящым бо ся покой тамо будет и радость, яже во веки пребудет. Наконец, нужда от бед воздыхати странствия сего к небесной полате, В жилище вечно, в очество святое: О, даждь нам, Христе, получити тое. Не всегда Господь от бед избавляет. егда праведник молбы возсылает. Хощете вину тайны сея знати. подобие се изволте читати. Яко нудужный, егда воспалится внутрь себе огнем и просити тщится. Да бы хладныя дано воды пити, еже бы огнь той в себе утолити, Аще зря врача, тощно возглашает: Зри, яко огнь мя всего сожигает; Виждь, зело стражду, ни могу терпети, прииде время от жажды умрети. Се дух исходит, уже умираю; даждь воды мало, слезно умоляю. Доколе имам толь люте страдати? Ты не хощеши мя помиловати. Услыши, молю. И подобне многа вещает, воды прося ради Бога. Тогда врачь мудрый ему отвещает: Вем, прелюбезне, когда подобает Воды ти дати. Еще да терпеши; милосердия еще не узриши, Ибо та милость лютость есть велика, в гроб реющая болна человека. И твоя воля противна есть тебе: вреднаго хощет, претерпети требе. Тако Господь Бог. вся съвершенно знаяй, меру милости Своей полагаяй, Иногда гласа не хощет внушити. аще и тощно нудимся просити. Весть, что полезно и что ны вреждает; ово дарует, сие отрицает. Иногда паки, да бы искусити, или в теплшыя молбы возбудити. Да. яко в огни, мужа изваренна в чистоте, в правде явит совершенна. Апостол, егда оному стужаше пакостник плоти. Господа прошаше Трикраты тощно, да изволит дата, еже не к тому пакости страдати, Не бысть услышан, молба отречеся. Благодать Моя довле ти, речеся. Сила ся Моя в немощи свершает, Бог рекл, терпети тебе подобает. Тако и иным весть Бог отрицати прошения их и не подаяти, Чесого молят, а вскую. Сам знает. То есть известно: добра нам желает. Ты, читателю, да ся не сумниши, егда молбу ти не вняту узриши. Подчини твою волю воли Бога, и дастъся тебе свыше радость многа. Даст ти на земли, еже в ползу требе, и жизнь вечную во пресветлом небе. 5 Хотящу с враги подвиг совершати многия беды нужда есть страдати В хладе и в гладе, в трудех требе быти, с дерзновением на брань исходити. Точне праведным беды подобают и скорби многи, елма совершают Брань духовную, аще венцы славы хотят красити верх своея главы. В
Варавва
Иудеи излиха Бога прогневаша, егда себе Варавву, не Христа избраша. Подобне и днесь оным тии согрешают, иже с грехом, не с Богом жити избирают. О безумия страшна! Ради малы сласти не усумневаются от Бога отпасти! Оле буйства велика! За тленно богатство Бога оставляют и небесное царство! Оле изумления! Тварь предпочитают Творцу, егда сердца си тленным прилепляют! Вдовство
Закон естества вдову поучает, да ся от сластей всяких удаляет; А в благодати мертва та зовется вдовица, яже сластно питается. Сласть бо грех родит, иже умерщвляет душу, тако смерть душевна бывает. Вредно есть вдове много раб имети, часто на тыя весело смотрети. Найпаче, иже красно устроени, брад не имуще, власы утрефлени. Лица их стрелы во сердце пущают, неопасную вдову уязвляют, И девы красны, яже живут с нею, дух красотою летят ея своею. Елма бо оны женихов желают, между собою дерзостно играют. О тех их песни, о тех всяко слово, а вдовы сердце любити готово. Срам возбраняет любве изъявляти, а в персех пламень — нужда есть страдати. Аще девицу в супружество дает, сама во тайне месте воздыхает. Не реку, плачет, тако бо явится слезами, еже во сердци таится. Глаголет вдова: Мужа не желаю, до смерти тако уже пребываю. Но не есть твердо сие ея слово, сердце жениха любити готово. Славится токмо, да во чести будет, но сей цвет славы недолго пребудет. Егда бо жених лепый проявится, абие ему в область поручится. Повержет вдовство, волит быти мати, неже едина в ложи почивати. Сия о юных вдовах провещаю, о старых ино слово помышляю. Обаче может и во юных быти. яже до смерти хощет в вдовстве жити. Сицевой велми блюстися есть требе, зазора в людех да не стяжет себе. Едва бо не вси обыкли зазрети хотящей выну без мужа седети. Что яст и пиет, камо, како ходит, зрят, и с коими лицы дружбу водит. Мало от чина, то вси осуждают, и что не бяше, миру оглашают. Тем же, о вдово, всесохранна буди от дел таковых, яже блазнят люди. Не имей раба красна пред тобою, ни в красну ризу одежди плоть твою. В доме ти пиров да не сотвориши и на чуждыя да не участиши. Гусли ушию да не услаждают, очы на землю твои да смотряют. Ягодиц твоих да не румяниши, бровей не черни, лица не белиши, — Вся бо сия суть страсти буждение, наводящая всех осуждение. Аще начнеши вина довле пити, трудно можеши чистоту хранити. Вино бо мужы святыя прелщает и девы в жены удобь претворяет. Трезво, смиренно буди тебе жити, аще хощеши в чистоте пребыти. Блуднаго весма опасися ока, да кроме всяка живеши порока. Молитва тебе выну подобает и дело благо, еже рука знает. Жилище твое яко церковь буди, мало да видят по стогнам тя люди. Честныя вдовы тя да окружают, девы чистыя ти да работают. Да гнило слово от них не слышится, но слава Богу всеми да гласится. Тако в целости вдовство сохраниши, за чистоту мзду в небе получиши И у человек добре прослывеши, правая вдова реченна будеши. Велий кто
Кто есть велий во мире, хощете ли знати? Иже выше суетствий мирских весть стояти Веление противное
Бог от Евреов жертвы иногда хотяше, а Фараон я плинфы делати нуждаше. И днесь Господь дел благих от верных желает, а демон на лукава делеса прелщает. За благая дела Бог мзду готует благу, а за злая злу возмут, иже раби врагу. Избери убо тебе. еже сердцу годе, или во аде быти. ли в горней породе. Вервь Божия
Неудобь треплетена вервь ся растерзает, Екклисиаст во книзе нам своей вещает. Тако твердою Господь вервию ны к Себе на всяко влечет время, да будем на небе: Любовию и срамом, купно же и страхом. Вервь любве суть благая, яже восприяхом И приемлем по вся дни от Его десницы, недостойни тех суще, грешни человеци. Вервию влечет срама, егда представляет образы нам святых муж, незрящих срамляет. Вервь страха прилагает, казнию прещая, иногда временныя язвы налагая. Кто ся сею вервию не привлечет к Богу, вовлечется иною во муку премногу. Вервь демонская
Вервь треплетену враг на ны готует, ею же пленив, верныя связует. Первая — похоть очес ны хищает, второе — плоти похоть уловляет, Третия — гордость живота ны ловит: сими похитив, враг грешники томит. Но аще кто я хощет растерзати, се орудия имам ему дата. Очию похоть удобь растерзает, кто в милостыню злато си раздает. Похоть же плоти постом сокрушится, тако бо буйство ея укротится. Гордость живота молитва святая вконец истребит, сущи смиренная. Веселие духовное
Миролюбив муж радости не знает, яже духовных сердца исполняет; непщует выну в печали ты быти, присно тужити. Но раби Бога живаго велие имут внутрь себе в сердцах веселие, еже добрая совесть им раждает и обещает Блаженство вечно, к тому сравнения ни мала имут мира веселия, яко же чеснок манне не равнится, ни подобится. Исрайлтяне его же желаху, и лука точне; о манне стужаху. Смрадная пища радость изъявляет, юже мир знает. Ея же паки не весть он, чрез манну ведите быти прообразованну. От тоя аще кто козмик вкушает, мир презирает. Та не внешними чувствы объемлется, но в сосуд душы во ум приемлется. Не от струй твари, но из моря Бога течет премнога. Мирская радость бедами истлится, духовная же теми не малится. Паче во скорбех та ся разширяет, Бог умножает. Пир Валтасаров в печаль обратися, егда Суд пишем на стене явися. Царь возмутися, вси ся ужасоша, в своя текоша. Иродов точне приде в смущение за Иоанна главы сечение. Вси мира пири тако ся кончают, в плач ся вращают. Не тако умный в душах пир бывает, той бо на всяк час выше возрастает и не престает даже въврасти в неба, в дом жизни хлеба. Веселие есть истинное, еже о Бозе
Мир юдоль плача древле наречеся, яко никогда радость обретеся в нем постоянна; аще бо явится, мало светится, Яко вся зело воскоре преходят, яже зде радость временную родят. По ней же паки печаль ся вращает, люте стужает. Аггел Товии стару глаголаше: Да водворится радость в сердце ваше. Он же отвеща, прием слова силу, ко Рафаилу: Кая ми радость будет, в тме седящу, света небесна нимало видящу? Тако несть радость в тме греховней сущим, зол путь текущим. Токмо сущии в свете благодати мощни суть радость истинную знати, яже о Бозе в дуты ся вселяет и просвещает. Есть же о Бозе, тогда веселие постоянное и зело велие, егда кто умом си в Бозе вселится, тем веселится. Яко имамы Отца всебогата, всесилна, мудра, прещедра, всесвята, Иже нас деля сущая создал есть, в сыны призвал есть. Есть же повсюду, мысли наша знает, видит вся нужды и молбы внушает. Врач есть недужным, скорбным Избавитель, всем Покровитель, Всеистинный же по делом Воздатель, даров небесных Безмезднодаятель. О Нем аще кто чисто веселится, той не прелстится. Веселие есть истинное Христос
Радость Исраиль ветхий имеяше, егда кто от враг его свобождаше, от них же часто в пленении бяше, люте страдаше. Вящшая нову радость подобает о Христе Бозе, яко Он спасает от враг душевных, от вселюта ада Адамля чада. Иисус Христос, должни мы писати на сердцах наших и усты вещати выну всечестно Имя пресвятое и всесладкое. В Нем бо держится дело строения человеческа рода спасения, еже во триех делесех бывает, все совершает: В искуплении и оправдании, славы вечныя во доровании, ими же что нам хоте Христос дата, изволь читати. Искуплением свободил из ада, из рук демонских и смертнаго яда, иже есть грех злый, душы повреждаяй и убиваяй. Оправданием Отцу примирил есть, из врагов сыны Ему сотворил есть и наследники славы содевает, в небо вселяет. Прославлением имать то нам дати, еже в небеси вечно царствовати, по скорбех мирских вся блага прията, в них вечновати. Сия Христос Бог всещедро нам деет, тем имя Его кийждо да говеет; услышав оно, да возвеселится и поклонится. Веселие мира есть суета
Церковник мудрый егда царствоваше, во всяких вещех богат зело бяше. Сам он глаголет: Сотворих ограды и винограды. Насадих древа плода всероднаго, вкусу гортани зело угоднаго; купели создах, мнози раби быша, иже служиша. Скоты и стада стяжах пребогата, множество сребра и доволство злата, имений много, собрах сладкопевцы и виночерпцы. Стяжах премудрость, имех вся велия, не браних сердцу всяка веселия, и очи мои что-либо хотеша, свободно зреша. Но по сих зрите, что он же вещает: вся та суету светло нарицает; и не без правды, скоро бо преходят, а грех мног родят. Долго ли вино гортань услаждает? А коль бед много лютых содевает: свар и убийство от того исходит, то болезнь родит. Кая есть радость лики составляти, аки без ума скакати, плясати? Безчинно действо верным непотребно, душам бо вредно. Что о богатстве, кая полза с него? Выну печалит державца своего, а неискусна душу погубляет, во ад вселяет. Что честь велия может ползовати? Скорби, печали весть та умножати, отъемлет покой, а ум надымает, гордость раждает. Не могут долго веселити сия; да ищет кож до радости иныя, яже духовне ум возвеселяет, вечна бывает. Ветхий человек
Что есть ветхий человек, знати подобает, кто-либо извлещися онаго желает. Есть порок, иже оста от греха перваго, и налог приклоняли к творению злаго, С ними же похоть плоти досадная зело, палящая злолюте рода наша тело. Вечеря небесная
Вечеря небесная будет превелика, юже строит рабом Си Царь всех и Владыка. В Священном Писании пир есть похваленный, иже от Артаксерккса царя устроенный На неколико время, богато и славно; но той яко сень прейде, яко всем есть явно, И царь, и пировници древле упомроша, и пищи вся сладкия въмале исчесоша. Вечеря же небесна во веки пребудет, донеле же Бог небом обладати будет, И пировници ея никогда окончатся, и сладости пределы никим положатся. Та вечеря — блаженство небесныя хвалы, есть уготованнная от Господа славы, Да по трудех временных вечно покоимся, по гладе сего мира довле насытимся. Различныя же пищы тамо поставятся, всегда ядомы суще никогда снедятся. Тыя же духовныя, ибо в светлом небе снедей, плоти приличных, никому же требе. Первая пища святым тамо представится: здравие без немощи, ибо не вредится То вечно в человецех, но в крепости будет. Тоя пищы желати кто от нас забудет? Вторая пища: юность тамо без старости, яже в мире виновна бывает слабости. Вси во Христове веце имут в небе быти, ни на степень к старости тленней поступити; Иже в мире един час точию пожиша, или чрез тысящу лет дни своя числиша, Равни тамо предстанут во красней юности и точни имут быти чрез весь день вечности. Третия пища тамо: сытость без остуды угодником Господним будет за их труды. Тамо всякая душа довле насытится, егда слава Господня от нея узрится. Четвертая снедь тамо: красота вечная, никоего порока в себе имущая; Тамо бо праведници светло возсияют, яко же по стеблию искры возблистают. Паче же, яко солнце имут светли быти, тма никогда же онех имать помрачити. Пятая пища будет плоти безстрастие и тояжде от силы душы безсмертие, Ибо ничто же имать телу досадити, или, е изменивше, к смерти приближити, Ей же тамо несть место, но во слезном аде, живот же безконечный во небесном граде. Шестое будет брашно без скудости полность, внутрь же и от вне благих всяческих доволность, Ибо что-либо душе и телу есть требе, всего изобилие будет в светлом небе. Седмое тамо брашно: мирно сожитие без разгласил всяка, во Бозе бытие. Осмое: безбоязнство, ибо не боится никто тамо, да вечных благ не отщетится. Никто бо тамо крадет, никто разбивает, вечный покой всех сердца превозвеселяет. Девятая снедь в небе: знание свершенно, ему же невеждество не будет смешенно. Всяческая святии имут тамо знати, яже потребна будут; Бог хощет являти. Десятая снедь тамо слава имать быти, ея же безславие не будет мрачити. Первая на десять снедь: сладко веселие, еже имать во веки быти превелие, А печаль ни едина может препинати; тамо ей места Господь не изволи дати. Вторая на десять снедь: свобода вечная. О сих радость родится всем безконечная. Общая же та брашна святым имут быти, о особных немощно есть мне известити. Искуством она самем вам знати желаю, к сим присно воздыхати точно увещати. Сказую то известно, яко глад страдати имать вечный, кто пир сей весть пренебрегати. Неищущии пира сего имут в аде в неутолном, яко пси алчни, быти гладе. Неищущии пира сего имут в аде в неутолном, яко пси алчни, быти гладе. Взаим даяние
Домад рече: Кто другу сребро взаим дает, друга и сребро свое купно погубляет. Се негли того ради, яко гнев ся родит, егда сребро си взяти давый к нему ходит. Паче же множицею зла вражда бывает, и во наших временех сие ся случает. Видение
Человек та зрит, яже суть явленна; Бог же вся видит, яже утаенна. Видение Бога
О видении Бога учитель великий Августин свят вопросы деет неколики, И сам отвещания кратка на ня дает, да бы нам разумети, сице разсуждает: Аще мя вопросиши, леть ли Бога зрети? отвещаю, яко леть есть нам И смотрети. Речеши: Откуду вем? Аз ти отвещаю: Чистии сердцем узрят Бога, обретаю. Како убо невидим Бог Ся нарицает? По естеству Своему невидим бывает. Может же, егда хощет, Сам виденны быти. и кому, когда, како хощет Ся явити. Речеши: Аще токмо Бога соглядают, иже чистоту сердца целу соблюдают, Како убо нечестный Каин Его зряше, егда Богом обличен о убийстве бяше? Знай, яко не вси видят, иже глас внушают, мнози точию в гласе Бога познавают. Яко, иже глас, Христу реченный, слышаша: Прославих и прославлю, а Бога не зреша. Вопросиши и паки: Аще мощно, како Сам в Себе есть. Онаго видети нам тако? Веждь, яко сыном Его то есть обещанно, ибо явлшуся точни будем, есть сказанно. Вопросиши: Откуду можем И видети? Отнюду же аггел и могут Его зрети, Им же мы равни будем и уподобимся, егда в царствии Его быти сподобимся. Вопросиши ли: Како невидим бывает, поне же в неприступном свете обитает? Невидим естественне, но может зрим быти, егда кому изволит лице Си явити. Но никим никогда же тако зрим бывает, да Ся зрением чиим весь определяет; Но воеже бы Его достойне нам зрети, вся зла приключения нужда есть терпети, За злых бо страдание хощет Бог воздати нам по заслугам, лице Его созерцати. Вина
Един от многих закон кто пренебрегает, всех законов Дателя люте оскорбляет. Тако в едином винный всех винен судится и по вине праведно судящим казнится. Вино
Полезно есть вино, но греха блюдися: множеством чашь того ума не лишися. Сладко оно в гортань обыче входити, но адскую горесть весть в души родити. 2 Вино сердце веселит, но и упояет, тем же мерность в питии его да бывает. 3 Андрокид кровь землену вино нарицает, ин же мудрец кровь нищих оно прозывает, Убо кровь нищих тии людей испивают, иже в мнозе пиянстве век свой провождают. 4 Излишняя светлость очы помрачает; излишество вина здравие вреждает. 5 Мернопитое вино в здравие бывает; излише приятое излише вреждает. 6 Аще вина во меру кто употребляет, то сердце утвержает и возвеселяет. Тожде аще безъмерно ким употребится, во яд плоти и душы вредный претворится. Тако еже естеством полезно бывает, наша злоба то вредно люте содевает. Не в вине убо вина есть вреда толика: безвинно вино, в нас есть вина превелика. 7 Лоза грозды сладкия обыче раждати, их же кровию тела леть есть услаждати. Но душу сладящее вино источает. Иже Лоза истинна Сам Ся нарицает. Христос Господь: от Него небо веселится и весь собор праведных Онем упоится. Егда на пир небесный будут воведени и пищею вечною обилно почтени. О блажен, иже того пира сподобится! Радостию без конца той возвеселится. 8 Вино хвалити или хулити — не знаю, яко в оном и ползу, и вред созерцаю. Полезно силам плоти, но вредныя страсти возбуждает силою свойственныя сласти. Обаче дам суд сицев: добро мало пити, тако бо здраво творит, а не весть вредити. Сей Павел Тимофею здравый совет дате, той же совет да хранит достоинство ваше. Вино новое
Новое вино повнегда вливают в мехи ветхия, меси ся терзают. Новое вино есть Христос Спаситель, в Евхаристии верных Упоитель. Ветсии меси суть в злобе сущии, обаче к Тайнам Святым грядущий. В сицевы мехи аще ся вливает вино се ново, весма я терзает. Первый во образ Иуда дадеся, иже, пив оно, полма расторжеся. В недостоинстве иже е приемлют, не в жизнь вечную, но в суд и в смерть вземлют. Власть
Всякая власть от Бога, Он бо благи дает властелины, а злыя за грех попущает. Весма убо должно есть власти почитати и в благих велениих им не пререкати. Противник бо сый власти Богу ся противит, за что Господь отмститель, иже благих живит. 2 Бог власть дарует народы правящым, златыя скиптры в десницах держащым. Тем же я должни вси суть почитати, гласа слушати. Властелин глава, прочий же люди суть во гражданстве, яко в теле уди. Глава все тело, власть люд управляет и промышляет. Тем же на царех венци суть златии, яко из чинов они изъятии, в них же камени честнии блистают, то знаменают, Яко ко чести припряжеся бремя, отъемлющее все покоя время. Началником си весь народ стужает, суда протает. Вси я говеют, их же долг хранити, еже когождо по правде судити, на лица силных и сродных не зрети, равн суд имети. Еще блюстися оным подобает, да в сердца гордость никогда вхождает, та бо гнев Божий наводит жестокий на сан высокий. Навходоносор древле горд явися, о Вавилоне в сердцы си хвалися, яко прекрасен и крепок наздаше, но зле страдаше, Ибо его же забыл Бога бяше, от того раба казни суд прияше, яко есть нужно ему в поле ити и зверю быти Различновидну, и траву с скотами, из нив прозябшу, терзати зубами. Едва пророк суд сконча изнесенный, бысть совершенный, Ибо царь в дивна зверя преложися, избежа в поле. Кто не устрашися? И нача скотен между скоты быти, на поли жити. Оле чюдесе! Им же Бог смирил есть гордаго царя, нискоро простил есть! Ибо седмицу лет тако живяше, зверь пребываше. Даже на конец со умом собрася, и винен быти Вышнему познася. Отверг же гордость из сердца, смирися, слезно молися. Тогда Бог скорый, еже миловати, изволи ему милость Свою дати. Вид привратил есть; людие познаша, на престол взяша. Сие есть должно умом разсуждати, ему же дал Бог миром обладати, и смирение усердно любити, тем Бога чтити. Елико бо кто сам себе смиряет, толико Господь его возвыжшает и не престанет, даже и на небе представит Себе, Еже нетленным венцем увенчати, за смирение вечную честь дати, во обителех светлых водворити, во веки жити. Внушение
Многих Бог не внушает по их хотению, да внушит глас их о том, что есть к спасению. Тогда же не гнев им Свой, но милость являет, ибо, добра им хотя, злых не попущает. Гнев паче изъявил бы, аще то подал бы, его же на зло свое некто возжелал бы. Тако врачь в фебре сущым воды не подает, зная вредну ту быти, а он благ желает. Возвращение чуждых
От праведных имений милостыня честна, та приходит во руце Господа небесна. Та грехи чистит, душу смерти избавляет и в царствие небесно по смерти вселяет. А еже неправедне сребро соберется, обижденным конечно то да воздается. А тым несущым, сродству то отдано буди, разве аще ближнии изведутся люди. Тогда Церкви и нищым мощно раздаяти, от маммоны неправды други си стяжати. Иначе милостыня неприятна Богу и пути не устроит к небесну чертогу. В первых убо, аще что кому похищенно, обижденному буди весма возвращенно. Паки, еже лихвою богатство собранно, обижденным да будет и сие отданно. Еще, что от подданных неправо вземлется нуждею владеющих, им да воздается. К сим, святопроданием что будет стяжано, святокупцем да будет некосно отдано. Да ся оба каета за грех той лукавый, и купивый святая, и та же продавый. Наконец, краденая вещ да возвратится, могущым бо отдати грех не оставится. Сицева имения и точная многа не взятна в милостыню от праведна Бога, Разве аще никако мощно возвратити, или возвращением беда имать быти. Тогда духовна мужа совет восприяти полезно и по тому сребро расточати. Не о сребре же токмо сие знати требе, о всех злых стяжаниих всяк да мыслит себе. Ризы, скоты и села нужда возвращати, и все ино, что чюждо может ся назвати. Иначе неподобно есть спасенну быти, аще кто не воздает, могий возвратити. Воздаяние
Кто-либо в дом свой Христа Господа прияше, комуждо возмездие благое творяше. На браце в Галилейстей Кане егда был есть в скудости вина, воду в вино претворил есть. Симоном фарисеем елма учредися, тогда грешница от грех многих свободися. Егда в дому Закхея мытаря виташе, спасение домови его всему даше. Паки у фарисея в дому возлежал есть, водный труд имевшему здравие подал есть. Матфей же Христа Бога брашны учредил есть, а Господь апостола его сотворил есть. У Марфы и Марии Христос Бог витал есть, брату их умершему живот даровал есть. В дом Петров елма вниде, тещу уздравил есть, весма везде благая людем Он творил есть. Тако и нам достоит благая деяти, во воздаянии благ Христа подражати. 2 Христианско есть дело досады страдати, а злобы никако же за зло воздаяти, Но паче побеждати благостию злое, дело то воистинну есть божественное. Зло паки воздаяти за дела благая, воистинну есть сия злоба демонская. Егда же кто за добро добра содевает, человеческо дело тогда совершает, А егда кто зло за зло тщится сотворити, лютосверепу зверю хощет точен быти. Ты, человече, хоти лучшее избрати, еже за зло благое людем воздаяти, Да будеши подобен Богу всещедрому, не людем, ни демону, ни зверю лютому. Воздаяние злое
Василий святый, хотя честь воздати Иулиану, умысли послати Хлебы ячменны три, яже имяше и сам во пищу плоти приимаше. Посла усердно, чая благодати, но злый отступник зле тщася воздати, Посла бо за то Василию сена, рек: Се за ячмень буди ти премена. Скотску ты пищу ячмень дал нам еси, скотску и от нас сено в мзду отнеси. Святый же отец сице отвещаше: Что сами ямы, то бысть тебе наше Приношение; ты же воздаеши весма снедь скотску, из нас ся смееши. Подобне мир сей обыче творити, за дары честны худыми дарити. Кто ему службу и дружбу являет, многажды вражду во мзду познавает. Или тленныя вещи, точны сену, миролюбивым дает во замену. Не тако Господь Бог нам содевает, за дары худы благия воздает; За временныя — вечныя на небе, убо даяти дары Ему требе. Не хощет Он их, но нам есть полезно, сице бо стяжем царствие небесно. Не хощет даров Бог, но воли благи, та с чистым сердцем дар Ему предрагий. Тем же две цате нищыя вдовицы Христос приял есть над многи златницы. Усердство ея изволил прияти, паче богатых ей похвалу дати. Воздержание
Двоицу древес в рай насадил есть Бог изряднейших, егда мир творил есть: Едино жизни, веждества другое, что в мире благо или что есть злое. От сего ясти древа возбранил есть прародителем, от ова пустил есть. Враг же лукавый преко совещаше, от возбраненна ясти увещаше. Вкусиша убо и смерть заслужиша, вся в себе чада своя умертвиша. Ибо за грех их весь род осудися, иже во чреслех Адамлих таися. И в сей юдоли равне усмотряю двоицу древес, юже извещаю: Едино жизни, смерти же другое. Воздержание есть древо святое, К нему же Господь вся ны приглашает, яко то ползу многу содевает, Душу бо от ков врага соблюдает, ум светло чистит, живот продолжает, Здравие хранит, в нищету не вводит, заслуги многи пред Господем родит, И тако жизни сподобляет вечны, купно радости в небе безконечны. Второе древо есть пресыщение, к нему же демон деет глашение, Желая злых нам, все бо родит злое людем грешным то древо проклятое. Ум помрачает, болезни раждает и нуждных жизни имений лишает. На всяку злобу приводит дерзати, душу лишает жизни благодати. Врагу пленит ю, тако вечно губит. Кто убо мудрый древо то возлюбит? Аз увещаю пост святый хранити, от пищ и питий превоздержну быти, Не множеством пищ плоть сластных питати, Не многим вином стомах исполняти. 2 Здравия мати есть воздержание; вина болезней — чрева наткание. Без мяс и вина похоть угасает, вино и мясо ону возжигает. 3 Воздержание от брашн малу ползу деет, аще друга своего снедати кто смеет. 4 Воздержанием тонку плоть свою имети, душею же надменно пред други кичети, Кая есть полза? Или от вина не пити что ползует, пьяну же ненавистми быти? 5 Воздержанием не плоть, но страсти мертвити подобает, да Богу возможем служити. 6 Воздержанием часто согрешаем, егда не злобы, но плоть истребляем; Страсти во плоти нужда умертвити, плоть же питати, грети и щадити. 7 Многия пищи вреда тым не деют, иже воздержно ясти я умеют. Единым брашном Исав согрешил есть, яко несытно оно потребил есть. 8 Воздержание аще безмерно храниши, множицею души ти вред велий твориши. Плоти бо изнемогшей ум не добр бывает, разсуждение в меру вся да устрояет. 9 Аще не тщится игрец натягати струны во гуслех, та не может дати Сладкаго гласа; тако силы тела невоздержанна не дают весела Богови гласа. Убо сохраните воздержание, тем Богу служите. 10 Адам и Евва невоздержна быста, весь мир единым яблоком вредиста. 11 Воздержание тогда не хранится, аще ястия время предварится. Иоанафан тако согрешил есть, прежде времене от меда вкусил есть. 12 Воздержание и той разоряет, кто сластнейшаго брашна взискивает. Исраилтяне сице преступиша, манну презревше, егда мяс просиша. 13 Воздержание и тем не хранится, иже строити яд излише тщится. Тако Илии сынове твориша. Господа к гневу на ся возбудиша. 14 Воздержание растленно бывает, егда кто чрево свое пресыщает. Яко в Содоме жившии твориша, за что казненни огнем свыше быша. 15 Воздержанию и то есть противно, аще и худы пищы хощет силно, Яко же Исав сочива желаше, зане же брату первородство даше. 16 Всех тех образов ты, брате, блюдися, всяко воздержне век твой жити тщится. 17 Аще воздержник в злобе пребывает, демону точна себе проявляет, Той бо безпищен выну, но во злобе тлеет всескверный во адстей утробе. 18 Отьими дрова — пламень у гасится; отьими пищу — страсть ти умалится. 19 Пекло, жупел, слама огнь велий раждает; вино, масло и тук похоть умножает. 20 Мерно от пищы и вина вкушаяй есть остряй разум, память соблюдаяй. 21 Дрова многая мал огнь угашают, брашна лишняя разум истребляют. 22 Яко от огня дым всегда бывает, тако от вина похоть ся раждает. 24 Воздержание мысли благи родит, добродетели в человецех плодит. Во всяких делех благия советы дает и мудры на вопрос ответы. 25 Уне есть мерно по вся дни вкушати, нежели долго от пищ ся держати. Пост бо безмерный силу истребляет, дух уныния и печаль раждает. 26 Многу воздержание ползу содевает, человека в здравии благом соблюдает. Продолжает житие, весть душу строити, еже своя делеса изрядно творити. И страстми владети то деет, ум чищает и к небесней мудрости прямо обращает. Добродетели плодит, злонравие губит; блажен, кто благостыню сию выну любит. Бог же воздержание воздает благими во мире временными и в небе вечными. Отроци еврейстии брашен не вкусиша скверных во Вавилоне и прекрасни быша. Моисий четыредесять древле дний постися и собеседовати Богу сподобися. Точне Илиа пророк в воздержности бяше, а Господь в содружество Свое й прияше. Оба же на Фаворе Христа соглядаста, славу Си явившаго; исход глаголаста. Дает воздержания мзду Бог и на небе, приседети трапезе вечной, а кто ж себе Тоя обилием сыт быти не желает? Разве кто во скудости ума пребывает. Вознесеся Христос
Совершив Христос Господь дело спасения рода человеческа, не вкуси тления Во гробе плотию Си; воста в нетлении, посеща ученики в часте явлении. Напоследок, извед я на Елеон гору, вознесеся чрез аер к небесному двору. Со тленными, сый тли чужд, жити не хотяше, небесну Человеку небо подобаше. Прият И небо честно в радости велице, седшу одесну Отца честь творит Владыце. Не то содея волхву Симону лукаву, Божию восхитити хотевшему славу, Иже, собрав народы, им проповедаше, яко чрез аер в небо летети хотяше. Возлете убо нечто бесов служением, со великим народов всех удивлением, Иже его за бога хотеша имети, но небо того врага не хоте терпети: Елико бо высоко на воздух взнесеся, толь низко окаянный на землю падеся И сокруши нозе си, а не умертвися, да будет во смех людем, тако лстец казнися. Христос же Бог истинный преславно идяше, еже лик учеников очима си зряше. Не отьиде же, да ны печалны оставит, но да свыше вящшую милость верным явит. В первых же, яко царство Свое глаголаше не на земли сущее, но в небе сказаше, Отьиде убо в небо, да в вере крепимся и по Нем путем благих дел ити потщимся. Паки, хотя надежду в верных утвердити, яко и нам некогда тамо требе быти; Иде же бо глава есть Христос, тамо тело да чает вселитися и да идет смело. Еще наставляяй ны горняя любити, желания ко Богу сердец обратите, Не мудръствовати земных, токмо небесная, не гоните дел шуйцы, но яже десная. К тому, хотя у Отца ходатай нам быти, прощение грегов и милость упросити. К сим воеже бы Духа Святаго послати, яко же учеником изволи вещати: Аще не пойду Аз, не придет Утешитель, отшед убо, прислал есть Того наш Спаситель. По сих учение Си хоте показати с небес быти и закон, да бы веровати. Людем без сомнения и тако бы жити, яко благоволил есть словом Си учити. Наконец, подобаше плоти божественней по смирении земном быти вознесенней И достойную заслуг мзду в небе прияти, светом славы вечныя безмрачно сияти. Восшел есть убо Господь, мы низу остахом, да раби ко Господу шествуем со страхом, К Его вечней трапезе очи да пущает, да просим и ищем, и прилежно толцаем. 2 Елма плоть смертну Бог Слово прияше, в юдоли плача с людми обиташе. Егда в безсмертну ту же облечеся, в радости место славно вознесеся, Еже с аггелы в небе пребывати, честь же и славу от них приимати. Аще же мира сего удалися, Церковь никако от Него лишися, Выну бо с нею Христос пребывает, яко же глава плоть си управляет. И отшествием Он плоти Своея многия ползы удом Си содея. Во-первых, полза Церкви есть велика, яко на небо возшел всех Владыка. Да веру нашу велику содеет, яже в незрима верити умеет. Блаженни тогда ученици бяху, елма, видяще Христа, вероваху. Не менше тыя леть блаженны звати, иже, не зревше, тщатся веровати. Сам сицевыя Господь ублажил есть, егда сумнива Фому уверил есть. Вторая полза верным сотворися, яко надежда онех возвысися, Еже и телу вознестися тамо, глава онаго вознесеся камо. Третия полза Церкви сотворенна, любовь к небеси ея обращенна. Да сущих тамо потщимся искати, а яже мира, во ничто вменяти. Четвертая есть, яко добре знаем, яко не проста мужа почитаем Славою Бога, но из Бога суща, тожде существо со Отцем имуща. Пятая полза, яко божественный путь нам к небеси, Христом проявленный, Да бы из странства в отчество желати, мир сей презрети, премирных искати. Шестая полза. еже заключенно всем бяше небо, то бысть отверзенно, Да святых души не во ад отходят, но во жилища небесная входят. Седмая полза, яко всем известно, святым устрой Христос место честно В радости вечней, еже тамо жити и во светлости безконечней быти. Осмая полза, яко Христос в небе выну ходатай есть в нашей потребе К Отцу Своему, всегда заступает, язвы Оному Своя предъявляет, Да онех ради изволит простити, что мы дерзнухом пред Ним согрешити. Девятая есть полза сотворенна, яко посла в мир Духа Божественна Христос Спаситель, егда воцарися, и на престоле Отче посадися. Десятая же полза нам бывает, яко всех сердца Христос привлекает По Себе в небо, да к тому желаем и сокровище тамо наше знаем. Царствуй же, Христе, в небе во вся веки, управляй свыше Твоя человеки, Да и мы в небо возможем приити, с Отцем и с Духом Святым Тя хвалити. Вознесение Христово
Недолго Христос Господь на земли виташе, отнеле же из гроба плотию восташе; Едва четыридесят дни токмо пребыл есть, по тех во пресветлая небеса вступил есть Благословных вин ради, яже предлагаю, яко же в писаниях отец обретаю. Первая — да закон Си и слово святое не земно явит быти, токмо небесное. Вторая — да бы небо было отверзенно, еже грехом Адамлим бяше заключенно. Третия — да царство Си явит быти в небе, не на земли, яко же помышляху в себе Ученици святии, того да желают, а не во мире славы суетныя чают. Четвертая — да плоти Его божественней, многи раны страдавшей, даже умерщвленней, Мзда и слава воздастся и место пристойно, прославленной же плоти небо место стройно. На земли рождаемых есть и тлимых место, свободных же тления на небеси есть то. Пятая — да аггели в небе веселятся присутствием Христовым и тем украсятся. Шестая — да по шуйцы досад мира сего посадится во десных у Отца Своего. Седмая — да ниспошлет Духа Пресвятаго на ученики Своя от Отца вечнаго. Осмая — да Отцу Си воздаст слово дела, еже в мире содея приятием тела. Девятая — да по Нем мы сердца пущаем в небо и тамо умы выну пребываем, Земная пренебрегше, тамо бо есть наше сокровище, отчество, тамо Бог ны зваше. Десятая — да знаем, яко возвышает того Господь, кто в мире сам себе смиряет. Первая на десять есть, еже бы являти, яже за ны изволил раны восприяти, Да теми ходатайство о нас содевает ко Отцу небесному и в милость скланяет. Последняя — да, зряще мы возвыжшение Его по страстех многих, стяжем терпение, Еже бы самым за то возвыжшеным быти, мзду в царствии небесном вечну наследити. Воин
Воин аще оружий свойственных лишится, удобь от супостата своего язвится. Тем же добродетелей и нас враг лишает, яко оружий, тотом грехми убивает. 2 Филопатр воин храбрый хром ногама бяше, Арист аки негодна его осмеваше, Но он рече Аристу: Ты сердца лишенный на брань, тем же человек неси ты военный. Мне же хромы суть ноги, не могу бежати с брани, имам же сердце враги побивати. 3 Егда Евреи идол сотвориша, Господа Бога зело огорчиша. Согласи Моисий верныя леввити, повеле мечем согрешшия бити. Егда же слово делом сотвориша, братию свою за грех той побиша, Боговидцева уста глаголаша: Днесь посвятисте Богу руки ваша. Точне днесь воин руце посвящает, егда за веру враги убивает. Сам же умерый от меча вражия не лишен будет милости Божия, Наипаче аще тщится тако жити, еже заветы Божия хранити. 4 Лев егда ходит, ногты сопрятает, разве на корысть тех употребляет. И воин мечь свой должен сопрятати, токмо на враги извлечен держати. 5 Кто в дому лев есть, зайчествует в рати, прилежно смотрит, камо убежати. Воля
Навклир парусы строит. Бог ветры пущает; Бог много, навклир мало корабль устрояет. Тако в благих делесех Бог онех правитель, а человек от малы части есть творитель, Яко свободну волю подчиняет Богу, за то имать прияти мзду в небеси многу. 2 Самоволен человек. Богом сотворенный, и никогда от Него бывает нужденный. Огнь и вода пред лицем нашим положися, что ти годе явится, к тому обратися. Обаче ко благому Господь увещает и различными средствы от зла отвращает. Самоволству без вреда выну всяка сущу, ни мала насилия от Бога имущу. Блажен же человек есть, аще изменится от злыя воли и на благу преложится. Ту бо ся спасение наше начинает, егда воли годное зло ум отвергает, И елма о том слезы будут источенны. о нем же прежде бехом зле возвеселенны. И противне, егда то потщимся любити благо, его же воля не хоте творити, И еже презерахом, восхощем искати, и его же гонзахом, добро будем гнати. Си измена есть Бога щедраго десницы ходатайством Марии, небесе Царицы. О Пресвятая Дево, изволи молити, да бы в сей прежеланней нам измене быти, Да не еже аз хощу, произвожду в дело, но Богу волю мою да подчиню цело. Еже Ему есть годе, то бы ми творити, а свое хотение зло искоренити. 3 Не веди в жертву Богу упитанна вола, но да будет покорна твоя ему воля. Воля свободная
Корабль на море елма ся пущает, навклир парусов недра простирает. Ветри, веюще, женут, камо требе, навклир и ветри нуждни в сей потребе. Точне жизнь наша в мире сем витает: человек воли парус простирает, Бог пособием в ту, як в парус, веет, тако корабль наш ко небеси спеет. Воли нашея и Бога есть требе со пособием, да будем на небе. Парусов кроме ветр не помагает, без воли нашей Бог ны оставляет. Волк мысленный
Кто есть волк, овцы Христовы хищаяй, или единство онех растерзаяй? Григорий папа на то отвещает: Волк, кто смиренных души озлобляет. Волк, и невинне чуждая хищаяй, и неправедне навет содеваяй. Волк есть, ереси иже начинает, люте бо овцы Христовы глощает. Но тех особней волк есть дух лукавый, на стадо верных вся козни сковавый, Иже, яко лев, въкруг стада бегает, да хитит овцу, престрашно рыкает. Волк он есть, яко все стадо владычне наветом своим разгонит различна. Иныя на блуд скверный убеждает, ины к лакомству злата возбуждает. Иным гневливым совеицает быти, иным на гору гордости всходити. Неким же зело услаждает зависть, другия острит на злую ненависть. Многия нудит, еже клеветати, лжю глаголати и славу терзати. Се есть волк лютый, стадо разгоняяй, вся искушенми овцы разсыпаяй. Волсви трие
Христу рождшуся, волсви с восток приидоша, честными его дары смиренно почтоша. Первому имя Малхир, стар же и сед бяше, власы его и брада долга украшаше. Сей, яко царю, Христу в дар принесе злато, а царствие небесно стяжа себе за то. О предобрыя купли волхва сего, се бо нетленную за тленну вещ купи си, небо. Второму имя Каспар, чермен лицем бяше, юноша бе, на браде власов не имяше. Ливан благоуханный даде, яко Богу, главу си приклоняя до стоп святу ногу. За что в сладковонное небо преселися, ибо послежде крещен. Богу всыновися. Третий Валтасар, лицем Ефиопским был есть. сей миром драгоценным Христа Бога чтил есть Во знамение, яко умрети хотяше, смертию Си деяти спасение наше. За то миро мир вечный приобрел есть себе и жизнь безсмертну, ибо водворися в небе. Волхв
Волхвы к немощным иже призывает, Врача небесна оныя лишает. 2 Прелестно демон волхвом послугует: мало утешив, вечный огнь готует. 3 Иже от волхвов будущая знает, огневи в пищу сам себе вергает. Воплощение Христово
Егда Бог Слово восхоте плоть быти, изволи Свою дивность проявите; Дивно бо дело велми сотворил есть, разстоящая два соединил есть: С человечеством Божество Святое, на ипостаси единой обое. Чесого ради свойства ся общают, праведно взаим вещанна бывают. Бог бысть человек. право есть вещати; человек Бог есть, мощно глаголати. Сие единство познайте колико, во величество превзиде толико. Яко вящшаго не леть сотворити Богу Самому, изволте судити. Человек с Богом егда съединися, выше не может того вознестися. Ничто бо выше есть Бога Святаго, убо единства не ищи выжшаго. О превелика любы божественна! Тако возлюби человека тленна, Яко изволи плоть на Ся прияти Бог Сын и за ны лютая страдати. Иже невидим человеки бяше, да видим будет, взят естество наше. Необьемлемый обьятен явися и безвременный летом подчинися. Всяческих Господь зрак рабий приял есть, нам же, рабом Си. господство подал есть. Бог, страстей чужд сый, бысть человек страстный, безсмертный в Себе смерти бысть причастный. Сия вся любы Его сотворяет, что убо Ему всяк воздаст, да знает. Любве за любовь Он от нас желает и ту во ползу нашу обращает. Да тою небо может заслужити и в нем наследство вечно получити. Возлюбим убо прежде возлюбивша, да почитаем зело ны почтивша. Дадимся Ему, а Он, взем ны Себе. возмет от земных и водворит в небе. 2 Облачится кто в ризу, а два помогают ему в облачении, три дело свершают, Обаче облеченный един в ризу ову. Тако воплощения нам тайну Христову Разумети есть требе, ибо Тройцы дело всея, яко Бог Слово облечеся в тело. Благоволи бо Отец, Дух содействоваше, а един Сын в естество облечеся наше. Три члени в персте, перстень на едином, три лица в Бозе, плоть есть токмо с Сыном. 3 Удобь бе падение Адаму страдати, но неудобь от него бе самому встати. Нужда бяше на землю Богу низходити, от люта падения его возводити. Тем же Бог Сын изволил плоть на Ся прияти и тако падший род наш Собою подьяти. 4 Чесо ради изволил Бог Слово плоть быти? Три изрядншыя вины мощно положите. Искупление наше вина есть первая, наставление на путь благий есть вторая, Третия — образ доброт, да на Нь возглядаем, по подобию Его себе устрояем. 5 Велия царска милость подданым бывает, им же богатство, славу и честь умножает. Вящшая, аще чию дщерь во жену себе поймет, ту благодарства величайша требе. Блаженный дом сицевый мощно нарицати, ибо всякия нужды может пристяжати Ходатайством царицы, вся тому готова дому за молебная жены царски слова. То нашему естеству блаженство случися, егда Божие Слово вочеловечися. Недоволен бе Господь Адама создати по образу Си и нас, и много благ дати. К тому естество наше Себе сочетал есть ипостасным единством, аки в жену взял есть. Его же ради много благ нам содевает, богатит благодатми, честь и славу дает. Выше того, хощет ны в небе водворити и общники царствия Своего творити. О благость необъятна непостижна Бога, тако дарования готует нам многа! Что-либо нам есть нуждно от Него просити, леть за воплощение сподобленным быти. Сию милость разсуждше, что можем воздати всещедрому Богу за ты благодати? Воздадим самы себе, да бы нам служити на всяко время Ему и тако явити Знамя благодарствия, а Он всеконечно в царствие Си небесно приимет ны вечно. 6 Слово сердца нашего внутрь нас пребывает, потом, елма глаголем, в глас ся облекает И является людем, обаче осташе не отступивше сердца, в нем же прежде бяше. Тако Божие Слово предвечно родися внутрь Отца, послежде же в мире воплотися. Пребываше со людми, а во Отце жило неотступно, яко же прежде плоти было. Востание
Из греха велика скоро востается, ибо грех великий удобно знается. Пренебрегоми же малии бывают, тем же мнози из них надолзе не встают. Восток Христос
Вскую ся восток Христос нарицает? Яко от Отца выну Ся раждает, и не престает. Восхищение Павла
Свыше призванный гласом Христа Бога, откровения имеяше многа. Когда же в небо третее взят бяше, не достизает видение наше. Мудрии егда лета сочисляют, к началу веры его то сношают И повествуют, яко, егда был есть слеп во Дамасце, ни яде, ни пил есть. Тогда восхищен в небо, ли в рай бяше, неизреченны глаголы слышаше. Слепо бе тело, но дух очит зело, виде бо Бога в небе превесело. О преблаженна слепота такая, ей же вослед суть зрения святая! Враг
Всякое дело твое ублажаяй не друг есть тебе, но враг, тя прелщаяй. 2 Иже Пребожественней Тройце работают, от триех врагов лютых борими бывают: От мира прелестнаго, от плоти злострастны и от демонски силы, излиха напастны. На сию злую тройцу Тройца Пресвятая даде нам оружия зело полезная. На мир есть всех суетий его презрение, на плоть — всех страстей ея злых умерщвление, На демона — советов Его поправие; теми вечно бывает торжествование. 3 Добрым злии суть врази, того бо желают, да я во погибели лютей созерцают. Учитель их диавол тому научает, яд свой ими на люди благи изливает. Тако Савл завистный Давида гоняше, истребити от земля оного хотяше. Аман же злочестивый от злобы своея повесити тщашеся честна Мардохея. Верныя истребити жела Иулиан, с ним же Диоклитиан и враг Максимиан. Фараон Иудеи вселюте томил есть и мужеский пол в воде еврейский топил есть. Но безумнии врази ров себе копают, во нь же напрасно впадше, сами погибают. Ибо и Давид виде Савла убиенна. и Мардохей Амана срамно повешана. И мучители ови сами погибоша, христиан истребити никако могоша. Исраиль Фараона виде потопленна, пучиною Чермнаго моря погубленна. И инии такожде враг си гибель зреша, иже им зло лютое деяти хотеша. Моисий бо и Аарон очесы си зряху, егда Корей, Авирон, Давин погибаху. Святый царь Езекия зело весел бяше, егда трупы врагов си лежащы смотряше. И с градом си Иудиф светло веселися, егда Олофернова глава повесися. Царь великий Констянтин светлоличен бяше, елма в реце тонуща Максентия зряше. А того паче имут веселие взяти, егда имать я Христос в огнь вечный сказати. Не о отмщении же та радость их будет, но яко в свершении истинна пребудет. Аще убо, братие, суть вам неци врази, не творите им злаго, но будите блази. Благостию их злобу выну побеждайте, Учителя вашего Христа подражайте, И восприимете мзду за сие немалу, небо с животом вечным и многу похвалу. Врагом добротворение
Христос повелевает враги нам любити, злобы онех множеством доброт победити. То бо христианское благо отмщение — за злая дела врагом добротворение. 2 Трудное людем дело враги си любити и злодеющым себе благая творити. Тягостно кленущыя есть благословляти и о гонителех си мол бы возсылати. Но Господь бремя сие верным облегчает, егда мзду превелику за то обещает. На ню же възирающым мощно вся деяти, яже благоволил есть Господь завещати. Страшно бе с Голиафом на брань исходите, неудобно видеся щуда победита. Тем же Исраилстии вой трепетаху, на исполина силна ити не дерзаху. Что убо Савл деет? Много обещает, и се абие Давид на щуда дерзает. Малый на големаго, ни же посрамил есть Савла и полк его, ибо победил есть. Обет Савлов бяше во зятя прията, аще возможет Давид врага зла попрати. Нас же Бог в сыны хощет восприяти Себе, аще трудность победим в реченной потребе. Давиду богатств много Савл обещаше, нам же царство небесно Бог уготоваше. Мало бе Давидови даров предложенно, обаче его сердце на брань возбужденно. Нам безмерно велию мзду Бог обещает, всяк убо на той подвиг да ся устремляет. Мал труд сердцу содеем, аще понудимся, но мзда велия, ибо вечно воцаримся. Врази в пути
Ветхий Исраиль подвиг мног имяше, егда с Египта в Сион град идяше, везде бо врази пакость содеваху, путь препинаху. Точне новому подвиг взяти требе, жити хотящу во пресветлом небе; вражия козни нужда есть познати и истребляти. Врази три
Кийждо человек врага си имеет, иже пакости в пути ему деет. Мир, плоть и демон обычно стужают, рай заключают. Торжище кратко, в пути беда многа, нуждна есть сладость Божия чертога. Кто ж ту хищает? Нужду деяй себе вселится в небе. Вран Ноев
Вран, иже из ковчега Ноем испустися, обрет трупы, не к тому в корабль возвратися, Но от едина трупа на другий леташе, донде же утонути, теми ся питаше. Точне богатитися хотяй содевает, аки из трупа на труп лакомо летает, Егда из торга на торг, с греха в грех приходит, из злобы в злобу, токмо да прибытки родит. Не вращается в ковчег Христа благодати, тако нужда бывает в бездне утопати. Врата в небо
