Вертоград многоцветный

Святое Писание мощно врата звати, яже учителие ведят отверзати Ключами языков си. Сими вход бывает к истинне веры живы, яже впровождает, Яко же дверь творая ко Самому Христу, Его же даде нам Бог за Дверь исту чисту, Да очистшеся от грех, идем Им к чистому, во нь же скверна не входит, граду небесному. Аз есмь дверь, рече Христос, иже Мною идет, вечну пажит обрящет, елма в небо внидет. Сими дверми, братие, троими ходите, Бога в Тройце едина онеми ищите. Тройцею дверей Тройцу обрящем Святую, пошли нам, Христе, милость на то действенную.

Врачь

Врачь аще сечет, палит, досаждает, страдалец любит и мзду ему дает. Душевна паче требе есть любити, хотяща язвы смертныя целити. Аще и жесток негли ся являет, та бо жестота смерти избавляет.

2

Врачи ови найпаче блажими бывают, иже не чрез рабы си болных посещают. Но сами приходяще, касаются делу и пособие деют уязвленну телу. Низложше с плещу паллий, лентие приемлют, тем препоясавшеся, от раны отъемлют Платенца и своима персты отщущают раны и в них смердящий оток очищают, Не гнушающеся тем, но вся тощно деют, яже хитростию си во ползу умеют. Сицев Врачь Христос Господь показася быти, ибо Сам с небесе к нам изволил приити И отлож ризу славы, в плоть препоясася, и за дело врачевства всеприлежно взяся. Разреши связанныя, язвы ощущаше, оток грехов чищая, всячески целяше. И не преста делати, даже совершил есть, недугующий род наш от язв устрабил есть. И аще въпред случится нам язвенным быти, благоволил врачевство в Церкви оставити: Тайны божественныя, да теми целимся, егда на душах наших паки уязвимся. О всеблагий се Врачь есть, предобрый Целитель, с небесе в мир пришедый Христос, наш Спаситель! Ему же за ту милость что хощем воздати? Аз от сущих во мире ничто могу знати. Добр наших не требует, не мзда Ему за то имения пространна, сребро же и злато. Жертва хвалы точию приятна Оному, яко всеми благими зело богатому. Потщимся убо хвалу Ему возсылати, благодарство за милость выну воздаяти.

Врачь Христос

Недужный аще врача изгоняет, врачь во болезни его оставляет. Он же, не зная себе врачевати, приходит в нужду, еже исчезати. Мы вси немощни тяжкими грехами и целитися не умеем сами. Прииде убо Христос ны целити. Иже и мертвых силен есть живити. Врачь пренебесный, всемирный Целитель, от смерти рода земна Свободитель. Но мы, увы нам. Того отгоняем, егда пластыри Его отвергаем Здравотворныя, то же часто зело. Сие Онаго понуждает дело Оставляти ны в недузе лежати, потом душами вечно погибати. Престаним убо Того мы гневити, да не приложим злобами грешити; А Он готов есть нас уврачевати, в болезни место здравие подати; То же безмездно, токмо покоримся, заповедь Его творити потщимся.

Врачевание

Немощствуя, к Богу прежде обратися, та же врачевствы плоти от врачев целися, Да Бог даст и врачю ум недуг твой познати и во врачевствах силу благодействовати. Без Божия помощи врачь не помогает, и врачевство вящшую язву содевает.

Врачевство на грехи

Приде мних некий ко врачевней газе, взискуя целбы греховной проказе. Рече ко врачю в смирении слова: Повеждь ми ради имене Христова, Аще имаши былие лечебно, на грехов болезнь скорбящым потребно? Врачь даде ответ, всем полезный зело, им же духовно грехми страждет тело: Аще хощеши болезнь исцелити, подобает ти совет мой хранити, Иже ти буди сицевый от мене: Послушания поищи корене, Терпения же листвие приими и расплоди плод чистоты со всими Добродетелей превонными цветы, яже смешь купно, потщися сотрете Во беззлобия котле, и в сосуде всесмирения съсыпано то буди. Раствори посем слезными водами, а милостыни пореж щедротами. Возгнети под ним огнь любве ко Богу, им же теплоту елма примет многу, Братолюбием тщися прохладите, да возможеши от него вкусите Покаяния лжицею святаго, а помощию Всемилостиваго Стяжеши целбу, здравие влучиши, аще сей совет верно сохраниши. Аз бо истинно тебе совещаю, тебе, як себе, здравия желаю.

Время

Всяческое дело время устрояет, безвремение же оно истребляет. Добро есть во ино время глаголати, во ино же лучше слово удержати.

2

Преступство, егда требе есть слова, молчати и в молчания время слово разширяти.

3

Воин в потребно время мечь свой извлекает, в таково же язык твой слово да вещает.

4

Муж некто преподобный Господу молися, и се душа плачюща оному явися. Вопросившу ответа: Аз есмь осужденна на муки вечныя и во огнь воверженна За множество грех моих. Но то люто бремя стражду, яко благое погубих аз время, В не же мощно ми бяше Богу угодити, не во аде, но в небе безконечно жити. О тщеты великия время си губящих, и пагубна делеса во оном творящих!

5

Летит время си часами во дни, в нощи, як крилами.

6

Быстрая река бреги подмывает, время жизнь нашу выну сокращает.

7

В кое время исправа жизни не творится, то яко погибшее тебе да вменится.

8

Злато погубленное может ся нажити, времене же претекша несть леть возвратити, Обаче мы о злате печални бываем. а время во суетах мира иждиваем. Не зрим, яко все царство хотел бы царь дати за един час, слез ради, внегда умирати.

9

Время чювственная вся и чювства свершает, тоже послежде силу действа раздрушает.

Время златое

Златое время въправду леть есть нарицати, отнеле же дал Христос закон благодати. Ибо ныне возможно небо всем купити и нетленным богатством пребогатым быти. Не ценою же злата, но за добродетель царствие небесное продает Спаситель. Имей добродетели, небо будет твое и за саму нищету пристяжеши тое. Сам Христос царство нищих поведает быти, кто убо не потщится онаго купити? Тем же благодарствие за то благодати должни мы есмы Богу щедру возсылати, И блаженство велие причитати себе, яко Господь угоди нас грешных потребе. Прежде нас пожившии окаянни бяху, толики бо милости Богом не прияху. Во тме неведения век свой проводиша, демоны въместо Бога истиннаго чтиша. Сотворша всяческая Бога не познаша, царствия небеснаго никако стяжаша. Кроме света истинны мира отьидоша, в тму непросветимую адскую впадоша. Оле окаянства их! Мы же преблаженни Христовым пришествием есмы сотворении. Он бо, Солнце истинны, свет нам даровал есть, идолослужителства тму смертну прогнал есть, И свободу от ада изволи дарствити, и небостяжанию добре научити. Аще убо премудрый Сократ тем хвалися, яко в граде Афинстем родися, учися, И аще Македонский Филипп весел бяше, яко Бог Александра ему дароваше Во Аристотелева учения лета, да общник его будет премудрости света, Много паче нам должно радость восприяти и хвалитися о том, яко в благодати Время рождени есмы, можем бо набыти небесныя мудрости и во веки жити. За вся же сия славу возсылаем Тебе, Боже в Тройце единый, живущий на небе

Ведение

Благо есть человеку веждество имети, но како держателно, нужда есть умети. Суть бо, иже ведети, да ведят, желают, сии оплазивости порок набывают. Суть, хотяще вежества, да ведени будут, сии тщетна суетства неудобь избудут. Суть, и иже ведети усердно желают, да на скверны прибытки дар той обращают. То же мытоимство есть, пред Богом скаредно и душам продающих вежество си вредно. Но и еще инии желают ведети, да бы назидание духовно имети. Сие же есть разума похвална у Бога, сицевым благодать есть готова премнога. Напоследок, неции тщатся много знати, да бы иныя люди благо назидати. Сие дара любве есть и угодно Богу, заслугующее мзду и вечну, и многу. Два токмо последняя веждества суть честна, прочая неполезна, яко суть прелестна. Зрите убо, веждество хотящий взяти, како в ползу душевну то употребляти. Иначе, полезнее без вежества жити, нежели то стяжавшым в казни вящшей быти.

Веждество

Веждеству образ древний даяху, зрящую в нощи сову писааху; Яко бо она во тме созерцает. тако в трудностех вежда дела знает.

Век сокращенный

Иже прежде потопа во мире живяху, чесо ради век долгий жизни си имяху? Днесь, тогожде естества человеци суще, много меншая лета суть в мире живуще. Пять вин того разнствия мощно знаменати, яже видятся правду уму представляти. Первая вина — яко иже тогда бяху, доброустроение во плоти имяху, Еже в последних вецех излиха растлися, чесо ради житие наше сократися. Вторая вина — яко превоздержни быша, яко требе, по мере ядоша и пиша Перва века людие. Днесь меры не знают; много ядят. а болше того испивают, Чесо ради болезни в телеси родятся, и с теми дние наши ко кончине тщатся. Третяя вина, яко тогда вся снедная много лучшая бяху, неже нынешняя. Ибо потопом земля много повредися. чесо ради плод ея силы си лишися. Тем и ядущих себе не толь укрепляет, едва частицу неку силы древних дает. Четвертая вина есть, яко и на небе действо светил лучшее бе живших потребе. Ибо во изряднейшей стране мира бяху, иже тогда житие свое провождаху. Пятая вина — яко мало людей бяше, да умножатся убо, долг век Бог даяше. Ныне же вселенная людми наполнися, даже едва воместно миру сотворися. О часть малую земли днесь ся убивают, едва воздуха волно во потребу дают. Тем же лета изволи Господь сократити, да бы сицевым злобам во людех не быти.

Век

Век настоящий многи услаждает, но мали, яже в небо устрояет. Многи зовет Бог на пир вечный к Себе, но мали тщатся, да бы быти в небе. Не хотят путем тесным шествовати, узкими враты в радость прохождати. Оле безумства! Временная любят, за та вечная вся благая губят.

2

Яко цвет селный скоро оцветает, тако человек век свой преживает.

Венец

Егда благая дела Бог твоя венчает, на Своя тогда дары венец возлагает, Что бо имаши, чесо свыше не взял еси? Благодатию убо будеши в небеси.

Вено

Вено со дщерми обычно дается, егда некая мужеви вдается Во супружницу. Что же демон дает, егда лжю, дщерь си, человеку вдает? Геенна и огнь от него дарится, множество червей к тому приложится. О вена злаго! Его же гонзайте, и дщерь демоню злобну обругайте!

Вера

Светилник не елеем, но огнем сияет, но огнь сам без елея скоро угасает. Тако вера не из дел бывает рожденна. обаче онех кроме тщетна, умерщвленна. Веру убо з делесы сьединити требе хотящым душам жити и быти на небе.

2

Корень здравый ветви здравыя пущает, листвием и плоды древо украшает. Тако вера блага имать плодна быти. плоды делес благих из тебе родити. Аще же неплодно древо пребывает, сечется и во огнь въвержено бывает. Тако, аще вера без благ дел пребудет, во огнь вечный душа воверженна будет.

3

Тело без душы мертво; вера умерщвленна, аще с делы добрыми не будет спряженна.

4

Глас Иаковль, руце же Исавли имеет, иже, веруя добре, лукавая деет.

5

Во часех зубец един аще отломиши, всех колес течение тако удержиши. Подобне в вере аще един член растлится. вся, яко часы, вера унепотребится. Тем же собори ничто велят отьимати от состав веры, точне ничто прилагати.

6

Верити Бога есть умом держати, яко есть Господь, могий вся создати. Верити Богу есть всем веру яти, яже изволи Господь глаголати. Верити в Бога есть во Нь ум вперити и волю, яко в цель свой, обратити. Чрез веру, любовь в Онаго нестися, си вера жива, леть ею спастися.

7

Хотяй дом себе духовный создати, основание должен усмотряти. Да крепко будет, иначе падется, аще и к небу стенми вознесется. В доме духовном вера есть основа по сведетелству апостолска слова, Юже да крепку имате, слушайте и средства ея тощно сохраняйте.

1

Первое средство, что вам Бог являет — веруйте присно, ум да ся склоняет На слово Его без испытания. сего требует Бог почитания.

2

Второе средство — духи искушайте, от Бога ли суть, и ум прилагайте К словам, аще суть праздна сумнения, известен ли путь в них есть спасения.

3

Третее средство — аще светло зриши Божий глас быти, да ся не сумниши. Яко о воде Моисий усумнися, за что вшествия в град Сион лишися.

4

Четверто средство — да благовременно сие творится дело преспасенно; Не от легкоты, некосно, ни въскоре, тако леть быти в Бога жива дворе.

5

Пятое средство — Символ Святый знати и члены его крепко веровати; Не обще токмо, но чинно, подробну, тако содеем вещ, Богу угодну.

6

Шестое средство — да основание веры дел благих имать наздание. Ибо основу тщетно полагает, иже ничто же на нем назидает. К тому, мертва есть вера кроме делес благих, ни вводит в чертог светлых небес; Яко же взаим и дела благая без веры не суть пред Богом живая. Вы, любимицы, веру сохраните живу и дела не мертва творите. Да сами живот стяжете у Бога, внидете в радость небесна чертога.

Вера христианская

Вера христианская Христом насадися. Божественным же Духом зело утвердися. Многими свидетелствы Богом укрепленна, тем же истинна, свята, всяко божественна. Первое сведетелство есть инстинны ея, согласие род многих, приемшых от нея Звание христианства. К тому, божественных отец единомудрство, дарми исполненных. Иже, аще в различных летех, в странах жиша, обаче един разум веры сохраниша. Второе сведетелство мученицы даша, иже за правость веры до смерти страдаша, Вселютыя болезни крепко презираху, на муки, яко на пир, радостно идяху, Возглядающе в небо, иде же готова неизглаголанная мзда от Бога Слова. Третие — чюдес многих яве творение, правды христианския во утвержение, Коих бо чюдес древле отци не твориша и мученици, егда за Христа терпеша. Четвертое пророчеств есть исполнение, еже в верных отьемлет всяко сомнение. Пятое — яко нрави в людех изменении, иже веры правыя светом просвещенни. Гордость во смирение лепо преложися, зверская лютость в честну кротость претворися. Волци бывший, яко овцы ся смириша, аггелско человеци жити возлюбиша. Шестое — яко мнози сведетелствоваху о вере христианстей, иже чужди бяху. Сивиллы во Еллинех немало писаша, им же ся ублажает честно вера наша. И Евреин Иосиф свидетелство дал есть о Христе в книгах, яже во Риме писал есть. Последнее возможно сие положите, яко никая ересь долго может быта, Ибо что не от Бога сажденно бывает, яко прах от бурнаго ветра исчезает. Христианская паки вера есть блаженна, от Христа и до ныне растет разширенна, И до кончины мира имать пребывати, аще и гонения нужда пострадати.

Вера и дела

Мертва есть вера без дел и дела без веры, мертвым же страны живых заключенны двери. Живот веры — делеса, Богу угодная, душа делес есть вера в Бога праведная. Живой вере и делом живым путь до неба свободен, убо жива имети потреба. Мертвая не ползует, яко же и кони не возят бездушнии во двери Сиони.

2

Вера христианская солнечно сияет, ересь паки, яко червь, что в траве блистает, Или, яко часть древа гнилаго, видится в нощи светла, во дни же нимало светится.

3

Благо есть веру праву комуждо держати и делеса благая ей совокупляти. Ибо вера дел кроме людей не спасает, двема сима летети в небо подобает. И яко нищий словом не есть одеянны, ни сыт, но одеждею и хлебом питанны, Тако и нагость душы не есть покровенна верою единою, ни в гладе сыщенна. Дела благая к вере плиложити требе во сицевей душевней грешных нас потребе.

4

Яко тело без душы живо не бывает, но мертво, и помале во тлю ся вращает, Тако вера дел кроме, живота лишенна, нимало есть полезна, ибо не спасенна.

5

Плодное по естеству древо, аще плода не даст тяжателеви, яко есть природа, Неполезно судится, съсечено бывает и во огнь въверженное, пламень е снедает. Веры добрыя плод суть делеса благая; аще же где от веры не плодятся тая, Неполезно есть древо, во огнь вовержется, никто же без дел благих верою спасется. Кому-либо бе время плод сей проносити, он же небрежением не тщася плодити, Непщуя саму веру доволну вещь быти, кое же спасение Богом получити. Прелщается муж сицев и други прелщает, аще хранити токмо веру увещает. Не слушайте вы того, к вере приложите дела добрая, тако спасения ждите.

6

Аще бы вера без дел доволна спасати, возможно бы демону спасения ждати; И беси бо веруют и трепещут Бога, Иаков повествует; но за злая многа Делеса спасения не могут прияти, но вечно во геенне огнь имут страдати. Не буди ты им точен, тщися приложити к вере дела благая, да бы вечно жити.

7

Авраам не верою токмо оправдася, но яко и тщив делом добрым показася; Благо бо велми дело тогда сотворил есть, егда единородна в жертву приносил есть. Велия зде с верою любовь сопряжеся, тем же и оправдася. потом и спасеся. Мы — чада Авраамля, убо подобает, да кождо верный того отца подражает. Еже есть к вере дела блага прилагати, тако от щедра Бога спасения ждати.

8

Вера без дел несть вера, ибо умерщвленна; труп сущи, в жертву Богу не буди несенна. Богу живу живая жертва подобает, мертвечиною живый велми ся гнушает. Ким же вера мертвится? Удобно есть знати: иже не хощет душы ея оней дати. Душа же веры — любовь с делесы благими. оживляй убо кождо веру свою теми. Тако приятна будет жертва твоя Богу. приимет ю во воню небесну чертогу. Приимет же и жреца тоя жертвы к Себе, тебе сиречь и вселит во пресветлом небе.

9

Светилник без елея не может светити; вера без дел не может жива Богу быти.

10

Любве отлучение, смерть веры благия; да жива будет вера, совокупи тыя. Веру дела благая живу да творяют, сама взаим верою жива да бывают, Ибо и дела кроме веры благи мертва, ни могут Богу быти приятная жертва.

Вера щит

Вера нам щит есть, ибо защищает от стрел неверства, егда враг стреляет. Сей щит аще кто дерзнет отложити, нужда есть тому убиенну быти, Яко же Саул убиен простреся, егда щит его от него вержеся.

Верение

Легкость есть скоро верити всякому, злоба же — веры не яти никому.

2

Веру емлем тым паче, яже око видит, нежели гласом, яже ухо наше слышит.

Веры соблюдения средства

Исраилтяне егда путствоваху сквозе пустыню, столп огнем имяху Во вожда место и в просвещение, да не приидут во заблуждение. И мы в тме нощней свещу возжигаем, да в свете ея добре вся делаем. Волсви с Персиды по звезде идяху, вождеством ея Христа поискаху. Нам столп, светилник и звезда светлая в пути житейстем — вера известная, Ея же светлость да не угасится, сие прилежно нами да хранится.

1

Во-первых, да не будем оплазиви, во божественных лише испытливи; Яко бо хотяй свет солнца обьяти имать зеницы своя зле вреждати; Так испытаяй величество славы скоро повредит ум своея главы.

2

Паки есть нужда грех смертных гонзати, иже отъемлют живот благодати, И иже веру велми ослабляют, многащи в ересь бедных устрояют. Яко бо корабль, котвы си лишенный, удобь бывает о камень крушенный, Тако добрую совесть погубивый влеком бывает на путь злостроптивый, На нем же люте бедник уподает, корабль душевный въконец сокрушает.

3

Еще общества должно есть гонзати с еретиками, и дев не поимати, Учения их нимало слушати, книг богомерзких ни в руде взимати. Словопрения с ними ты вреждают, иже ответов дати им не знают. Тем, уне тому ту борбу вручити, кто Голиафу Давид может быти.

4

Наконец, требе благая творити, да может вера в сердцах жива быти. Яко бо елей огню живот дает, сущу в лампаде, тако оживляет Веру во сердцах благих деяние. Обою буди вам сочетание.

Веры смерть

Иже из сердца любовь извергает и въместо ея ненависть вселяет, Ту вера жива не может стояти, нужда бывает оней умирати. Яко бо пламень водою гасится, ненавистию вера умертвится. И яко пламень вещи сожигает, тако ненависть веру истребляет. Вериши в Христа? Его да твориши дела, да веру живу сохраниши. Любовию ти веру да живи ши, делы благими благу да явиши. Земное дело тех да не сляцает, яже небесных вера возвыжшает. Аще хочеши право глаголати, Христа Господа в тебе обитати, И яко ты сам во Христе живеши, Христу подобне да пребываеши. Яко же Христос изволи ходити, тако достоит твой путь ти творити. Аще же славы желавши тебе въпред, неже Богу, славимому в небе; Аще блаженству завидиши чужду и немощному наносиши нужду; Не присущему аще увлачиши, прогневавшу тя мужу аще мстиши; Не Христа Бога подражатель еси. Его закона хранити не веси. Тех зол Христос Бог никогда творяше, свят и праведен выну пребываше. Ты усты токмо исповедавши, яко Господа истинна знавши, А делесы ти отрицаешися, егда противен противляешися Неправо весма, язык бо даеши Христу, а душу врагу предавши. Подобаше же Христу дати тое, язык и душу в целости обое.

Веры уподобление

Зерно горушно мало в себе телом, но есть велико довле силы делом; Вначале мало, худо и презренно, обоняния и вкуса лишенно. Но возраст вземше, елма ся стирает, абие воню из себе пущает; Острую горесть, пламени подобну горячесть родит, но зело угодну, Яже во хладе тело согревает и влаги его силно изъсушает. Греет, внутрьняя огня не имуще, теплоту родит, извне хладно суще. Подобне вера вначале бывает мала, немощна, худа ся являет. Но елма возраст приемши, притрется скорбми, бедами, тогда является Сила, яже внутрь оныя таится. острота, теплость тогда изьявится. Паче, горячесть любве превелики ко славе Христа Царя и Владыки, Толь же многая, даже ей творити иным от нея горячими быти.

2

Зерно горушно тело согревает, теплота веры грехи сожигает. Оным жестота студени толится, сею хлад демонь грехов ничтожится. Зерно телесе влаги изсушает, вера похоти мокрость изнуряет. Оно есть силно главу врачевати. сия весть Христу Главе угождати, И благу воню та ны содевает, яже Господу любезна бывает. Имамы убо веру божественну, паче горушных семен в нас действенну. Да Христу Богу можем угодити, в страну небесну преселени быти.

3

Вера во сердци есть основание добродетелей, та держит здание И яко корень ветви оживляет, вера делеса жива содевает. Яко светилник она просвещает, егда Божии воли поучает, Учя благая делеса творити, от лукавых же и мысль удалити.

Г

Гавриил

Гавриил Даниилу древле сказоваше, яко человек плотян Бог быти хотяше. Он же к Деве Марии вестник сотворися, егда то сказание к делу приближися. Бога и человека именем являет Гавриил, яко же Прокл епископ вещает. По имени убо си службу совершаше, что именем содержа, то усты вещаше. Имени же и слову ответова дело, ибо, Бог сый существом, прия наше тело И бысть человек, купно и Бог совершенный, во спасение наше Отцем положенный. По иным, крепость Бога то истолковася имя Гавриил, тем же он к Деве послася, Яко крепость Божия бяше превелика во соединении с Богом человека, И еже Деве Сына Пречистой зачати, и Бога необъятна чревом си объяти. Обое сказание с делом согласися, егда Бог Слово в чрево Девицы вселися. Тако мудрость Божия мудро устрояет, имена, приличная службе, нарицает.

Гадание

Рыбарие Омиру гадание дата, яко славну поете, и ответа ждаша: Что-либо емлем, реша, то все оставляем, а его же не емлем, с собою ношаем. Он много мыслив время, не може познати, и на то гадание им ответа дати. Нача быти печален и зело гневася, во срам себе считая, и тако скончася. Оле славолюбия! Коль зелно тужаше о недосмыслии си, даже смерть прияше! Бе же рыбарей дело: червие ловяху, пристающее коже, и емше, вергаху, А еже кожы ятся, того не ловиша, обаче то по нужде при коже носиша. О дела безделнаго! Яко человека мудраго гаданием есть лишило века.

Глава

Славу Бога живаго требе проявляти. человеческу паки нужда утаяти. Муж есть слава Божия, яко образ Его. Жена паки есть слава супруга своего. Муж имать разум, волю, память и почтися от Бога, яко жена ему подчинися. Жена по трием первым аще и почтенна. имать внутрь образ Бога, но внешня лишенна. Не владеет бо мужем. Тем же подобает. да муж главу во церкви свою откривает Во славу Бога жива. Жена же, вопреки. слава мужня, да криет главу пред чловеки.

2

Человеком суть главы горе вознесенны, да мысли нашя тамо будут обращенны. Еще да и сердце всех в небо обратится, иде же сокровище всеродно хранится. Да не мудрствуем земных, но яже небесна, чесо ради создани тварь емы словесна.

Глава медная глаголавшая

Алверт великий муж премудрый бяше, тайны естества преискусно знаше. И художеством из меди состави главу, и хитрость дивну в ней постави: Глас, человечю точный, издаяше и аки живый глагол изпущаше. Но той же Алверт послал бяше Фому, иже с Аквина. до своего дому В некоей нужде. Иже елма вниде в дом его. и ту дивну главу виде. Воздухом вшедшим глава подвиженна. нача вещати, яко устроенна. Он же, непщуя чародейство быти, потщася главу млатом сокрушити. О чесом взем весть Алверт преученный, о тшете дела бысть преоскорбленный И рече Фоме: Увы мне грешному, что ты содея трудолюбивому? В едином часе глава сокрушенна, яже чрез лета многа бысть строенна. Тако многажды и мы содеваем, труд многодетный в часе погубляем. Чрез долго время прилежим искати, благодать Бога всещедра стяжати, А потом егда в грех смертный впадаем. в единой черте ону погубляем. Тогда праведно Увы! глаголати о превелицей тщете благодати. Но уне ону прилежно хранити, да бы никогда ея погубити. Ибо по тщете трудно ю стяжати. Да тщимся убо крепко ту держати.

Глад

Егда глад во Египте лютый досаждаше, Идите к Иосифу, Фараон вещаше. Глад духовный во мире, убо подобает, да всяк от князя мира к Христу притекает. Христос бо Иосифа паче есть питатель, небесныя пшеницы, не земныя, датель.

2

Глад хлеба тело томит, убивает, глад же Словесе душу умерщвляет.

3

Глад хлеба во работу людску понуждает, глад же Слова в демонску душы убеждает.

Глас Божий страх

Адам во рай пред Богом сокрися, егда глашати его приближися. А егда закон людем подаяше и громогласно слова испущаше, Терпети гласа Его не можаху. Да не глаголет Бог к нам, вопияху. Тем же, восхотев благодать явити. Бог мал младенец благоволи быти И малогласен, да не ужасает людей страшливых, но да приступает Всяк дерзновенно Его целовати и все, что нуждно, смело глаголати.

Глас народа

Что найпаче от правды далеко бывает, гласу народа мудрый муж то причитает. Яко что-либо народ обыче хвалити, то, конечно, достойно есть хулимо быти И, что мыслит, суетно, а что поведает, то никоея правды в себе заключает. Еже гаждает дело, то весма благое, а еже ублажает, то бохма есть злое. Вкратце, что-либо хвалит, то неправо в чести, мир сей непостоянный весь лежит в прелести. Не веруй убо гласу общему народа, ищи в деле правды человеча рода. Слово ветр развевает, а кто тому верит безъразсудно, срамоты мзду себе возмерит.

Гнев

Благо часто без греха гнев свой изьявляти, неже редко со грехом той же прозябати.

2

Гнев есть огнь велий, вещи сожигаяй, печаль наносяй, душы истребляяй.

3

Жрецы Ваала егда избиваше Илиа пророк, яр и жесток бяше. Тем хотя Господь ему Ся явити, слово творити, Не показася во бурливе дусе, ни же во огни, ни во страшне трусе, но в гласе тонка и приятна света, ради ответа. Тем поучая, яко не витает тамо, иде же в сердце гнев бывает, ни в смущении. Но кто ум покоит, дом Богу строит. Имеим убо сердце всепокойно, жилище Богу сотворим достойно, а гнев и ярость в нас да не бывает, грех бо раждает.

4

На огненно углие аще ся возложит фимиан, воню сладку во дому умножит. Аще же на то жупел смрадный возложится, все жилище от того смрадом исполнится. Тако гневом горящу аще приложиши слово кротости, кротка того сотвориши. Аще же досадное что речеши тому, смущение целому содееши дому.

5

Страсть гнева в человеце в то время бывает, егда кто отмщения ближнему желает, Обтекшей крови сердце, и есть грех ко Богу за прилучающуся злобу к нему многу. Трегубо же бывает грех, гневом рожденный, мыслию, словом, делом, плод небожественный. Мыслию многовидне той ся исполняет, в первых, аще ненависть во сердце бывает К лицу согрешившему. Паки, егда тщится некто, да отмщение злобно сотворится. Еще, аще кто злаго обиждшу желает, или о случшемся зле радостен бывает, Или о благих его печален явится, греха тяжка, конечно, сей не извинится. Словом же грех бывает гнева сотворенный, елма кто на зло слово будет разрешенный, Или славу отъемлет глаголы хулными, или злая вещает речми клятвенными, Или свар велий движет. И само прение гневное не обыче быти в спасение. Найпаче, аще мести кто сердцем желает, сия глаголя, вины кроме не бывает. Делом гнев во изводство тогда ся приводит, егда кто в отмщение убыток наводит Или на теле ближним, или в стяжании, или в коем-либо их отчин держании. Аще же и законом суда пристужает, а отмщения паче, не правды желает. Не без вины есть сицев, и кто не прощает, егда доволне винный пред ним ся смиряет. Не удалится вины и сам не простится в день ярости Божия, аще не смирится. Яко же бо кто мерит. возмерено будет натрусно. преобилно, даже преизбудет. Не дейте убо мести, гнев искореняйте. согрешения взаим охотно прощайте. Да сами от Господа будете прощени, а не по злым делесем яростно суждени. Аще же страсть гневная сердцу досаждает, то ко злобе, не к лицу да ся изливает. Воеже бы от лица злобу истребити, а лицу ни малаго вреда сотворити, Паче в исправление привести святое. Сицев гнев не есть злоба, но дело благое. Сицевым гневом Богу никто согрешает, но Его благостыню чинно подражает. И он бо. человека любя, гнев являет. но злобу в нем. не лице, тако истребляет. Разве аще кто въконец злобы не лишится, то со злобами лице вечно потребится.

6

Трегубо человеци гневливи бывают, яко же философи о сем возвещают. Первый есть вид гневливых, иже наречени острии, а втории горции вменени, Третий же — труднии. Вси гнев проявляют, но различнии нрави в гневе их бывают. Острии, иже скоро во гнев распалятся, но абие от того сами отрезвятся. Сей вид гнева блажайший, яко проявляет, что человек во сердце своем заключает, И ничто же обыче в себе утаяти, отмщения никогда мыслит содевати. Сего врачевство — кротость, та бо угашает пламень, иже от гнева воспален бывает. Холерици обычно сим гневом ярятся и врачевством кротости от того целятся. Горции наричутся, иже долго время носят в сердцех и таят тяжко гнева бремя. Суть же и в себе самех зело огорчени и ко ближним такови ж бывают явлени. Сей мелянхоликове вид гнева имеют, а возвеселитися никогда умеют. Врачевство сего вида тихость быти может, та противу горести изрядно поможет. Труднии во гневе си речении бывают, иже зачата гнева никогда лишают, Денде же отмщение оным сотворити. Сему во христианех не лепо есть быти. Сей благоговеинством токмо ся смиряет; аще того лишится, беды содевает. Вы, братие, во гневе умни пребывайте, без гнева несть леть быти, но не согрешайте. Гневайтеся на злобы, тыя истребляйте, а озлобившыя вы удобно прощайте, Внегда им каятися. Паче же любите злая вам сотворшыя и благо творите. За то бо ко милости Бог Ся преклоняет, согрешения наша скоро оставляет.

Гнев Божий

Во стране Английстей некогда случися, яко множество жита велие родися, И до времене жатвы преблаго стояше, полную обилия надежду творяше. Жатве приближившейся, безчисленно мнози неизвестно откуду прилетеша прузи И на то изрядное жито нападоша, еже и со стеблием до конца снедоша. Людие страны тоя во ужасе бяху, вземше от прузей нечто, что суть, разсмотряху. И се крила имеша дивне пописана, на них же два словеса бяху прочитана. На едином криле: Гнев. мнози обретоша, на другом паки: Божий, со ужасом чтоша. Се человеком Господь дал есть знамение, яко во грехов бяше та казнь отмщение. Неции же глаголют, что та казнь бывает в стране, яже милости нищым не являет. Яко бо кто не сеет, не имать что жати, тако ненищелюбным Бог не имать дата. Любите убо нищих, нуждная давайте, за то сами от Бога мзду прията чайте.

Год века образ

Годищное поприще образ нам бывает, како век свой комуждо жити подобает. Весна есть образ детства, ибо отребляют вредная в ея время, ветви прицепляют Полезныя к древесем. Во оградех сеют, хврастие исторгают, да благая спеют. Тако во время детства нужда истребляти нравы злыя, благи же в сердцах насаждати. Лето лучесы палит, вси же ту трудятся, траву косят, жнут класы, различно томятся. Тому юность подобна, до мужеска века, ибо та страстми палит бедна человека, Яже хотящу в себе добре угасити, плоть трудами многими нужда есть томити. Есень плоды приносит, люди насыщает, в мужестем веце сущым точне подобает Благих деяний плоды обилно носити, государству и дому всеполезным быти. Зима снегом всю землю белым покрывает, человек готовыми брашны ся питает. Тако старость белыми покривает власы главу и ознобляет тело в своя часы. И плоды трудов бывших нуждает снедати, что кто в юности посла, на том имать спати. В зиме кождо ко огню рад ся приближает, в старости к молитв огню всяк да притекает. Тех теплотою может душу си согрети и яко лебед сладко с Симеоном пети: Ныне отпущаеши раба Си, Владыко, с миром. Приими дух мой в царство Ти велико.

Голубь евхаристический

Древний обычай в Церкви святей бяше: сребренный голубь в олтари висяше Над трапезою. В нем положенная Евхаристия бяше священная. И ныне в неких местех той остаем древний обычай. То же знаменает: Да хотяй тело Христово прияти цел, яко голубь, тщится пребывати.

Голубь небесный

Голубица Ноева егда испустися, мало время летавши, в корабль возвратися, Яко не обрела есть, иде же почити, а на воде не хоте и ног омочити. Точне Голубь небесный. Дух Пребожественный. егда благодатию бывает пущенный Из ковчега небесна, зрит, где бы почити, с потопом вод греховных не хотя пребыти, И аще суха места си не обретает, в ковчег паки небесный скоро ся вращает. Да будут убо сердца наша от грех суха, хощем ли в них жития Пресвятаго Духа.

Голубь и вран

Ноева голубица трупы презираше, егда испущенная над воды леташе. Не хоте сести на них, в корабль возвратися. Не тако вран воздержен тогда проявися, Ибо испущен, трупом смрадным приложися, теми себе питал есть, воспять не вратися. Чесого голубица зрети не хотяше, то вранови скверному прелюбезно бяше. Тако грядый из храма Божия до дому, напитанный духовне, да зрит, где и кому Имать прилеплятися, или ся вратити в храм, яко не имать, где умом си почити. Аще убо абие на грех кто падает, крадет, блудит, враждует, ли раны задает, Вран есть труполюбивый, от Ноя презренный, водам потопа вечна право оставленный. Аще же кто греховных трупов обегает, во слезах потопленных нимало касает, Егда ничто от мирских сердцу его годе, но к Христу и к небесной желает породе. Голубь есть прелюбезный, его же наш Ное небесный имать взяти во жилище Свое, В ковчег вечныя жизни, во покои быти, тамо ся божественным брашном насытити.

Гонение

Кремень аще железом ударен бывает, светлыя огня искры из себе пущает. Христиан гонения егда притирают, огнь любве ко Господу тогда проявляют, Ибо вся скорби терпят, богатства вергают, и главы си радостно под мечы ставляют, Боляще от телес си разлучени быти, нежели неверствием от Бога отьити.

2

Иакова Исав брат вражески гоняше, яко Каин Авеля убити хотяше. Тем в Месопотамию Иаков вдадеся, тамо убиения братняго спасения. Знаменует же слово Месопотамия по нам возвыжшение некаго звания. Образно учение история сия, да умеем гонзати и мы гонения. Иаков духа, плоть же Исав знаменает. Первая плоть от дуты первым ся являет, Менший же от болшаго брат гонимый бяше, яко и во нас духа гонит тело наше. К возвыжшению убо нужда есть гонзати, еже есть ум ко Богу в небо возвыжшати С прилежным молением, с теплыми слезами, да спасет ны, милостив сотворся над нами.

3

Вещь веселия многа — от враг гонение, токмо да приближится того терпение, Ибо, иже гонимый за правду бывает, блаженство Христос Господь тому обещает. Паки, терпяй о Бозе и за Его славу, в любезну Богу жертву кладет свою главу. Еще, долг велий Христу Господу воздает, егда за Нь плоть, кровь, душу свою полагает. К тому, страданием тем добродетель многу веры, любве, крепости изъявляет Богу. Напоследок, заслуги тыя полагает, ими же небесныя силы превыжшает, Ибо аггели в небе не могут страдати, мученическа венца от Бога прияти. Блаженший убо сан их, но креплший гонимых, ли от злых мучителей нещадно мучимых. Егда убо гонят вы врази, вы терпите за Бога, а от Бога возмездия ждите.

4

Аще кто, яко Авель, без вины хранится, и той Каином своим с зависти гонится. Обычно бо есть благим в гонении жити; не терпяй того, Авель той не хощет быти.

5

Авеля Каин брат ненавидяще, Исаака же Исмаил гоняше. Иакова брат Исав не любил есть, Иосифа лик братий удалил есть Из отчя дому во чуждую страну, на сребреников цену, оным дану. Ненавистници вси не блази бяху, блази же, иже от онех страдаху. Тако и ныне гонят благих злии, страждут досады от грешник святии. Но Бог им венец в небе соблюдает, за терпение светло увенчает. Гонители же казни предадятся огненней, аще зде не обратятся.

Гонят благих злии

Мир, лежяй во зле. обыче гонити добрыя люди, хотя истребити, И чада его его подражают, истребление добрым помышляют. Всяко доброты не могут и зрети, иже во злобах любят выну тлети. Яко вода огнь горящь угашает. тако благим злый противен бывает. Благий сияет доброты лучами, и любве в небо несется зарями. Зол муж, противне, мрачен делы злыми, земным прикован похотми своими. Благий вся добре желает творити, благости праздный — миру угодити. Благий терпелив, ов же промышляет, да како злобу благим содевает. В начале мира зрим, что сотворися: Авель праведный злым братом убися. Потом Иаков из дому гонзаше за гнев Исава, иже й гоняше. Что Иосифу братия зделаша? За сребренники варваром продаша. Весь род Еврейский зело утомися, егда в Египте к работе нудися. И Савл кротка Давида искаше, еже убити, но Бог защищаше. Самому Христу Господу и Богу род Еврейск злобу коль содея многу? Ученицы же Его что страдаша, егда Божество Его прославляша? Беды от Еллин велики терпеша, точне от Еврей скорби вся имеша. Даже до смерти. И днесь что ся деет? Благость попранна, злоба везде спеет. Правда безместна, лжи ухо готово, сердцу любезно, еже скверно слово. Хотяй о Бозе ныне глаголати, смехи кощунных имать пострадати. И в домех Бога жива умножися слово гнилое, чисто умалися. Оле злых нравов и лукавых времен! О нестерпимых врага люта бремен!

Гордость

Говор на воде въмале исчезает, гордый во мире тако погибает.

2

Яко же вино пиюща прелщает, подобне гордость мужа изумляет.

3

Гордии в небо очы возношают, яко же демон, высоты желают.

4

Пустынник некто чюдотворец бяше, но о святости горд быти начаше. Усмотрев демон, в деву претворися и, аки блудяй, к нему прилучися. Нача со плачем онаго просити, да во келию изволит пустити Пренощевати, да не расторжется зубами зверей дивых, но спасется. Прояви милость пустынник блудящей, именем Бога онаго просящей. Впусти в келию. Оле люта врага! Егда преступи предел храмна прага. Нача беседу честную творите, потом блудныя глаголы вносите, Ими же разжже мужа пустыннаго, иже сложи мысль до дела блуднаго И нача себе к тому устрояти, со заблуждшею блудодействовати. Тогда диавол смех велий содея и ко прелщенну глаголаше сия: Камо, монаше, уже ныне еси, непщевавый тя жити на небеси? Уже днесь даже сшел еси до ада. иде же быте не имать отрада. То слышав монах, нача отпадати надежды в Бозе, умысли бежати В мир, и сотвори, еже смыслил бяше, прочее жизни во блуде живяше. Оле, что гордость людем содевает! Даже во адску бездну низревает. Всяк убо ея верный да блюдется, зане же с нею ни един спасется.

5

Говор, елико болше надменны бывает, потолику скорее в очех исчезает. Тако гордии, елма себе напыщают, судом Божиим правым тогда погибают.

6

Гордость есть, аще тощно высоты желает, из благ плоти, ли душы, себе возвыжшает. Четырми же образы обыче бывати, яже комуждо верну требе отревати. В-первых, егда кто себе тая причитает, яже точию Богу дати подобает. Паки, аще и Богу нечто прочитаем, но то яко долг заслуг наших воменяем. Еще, елма более мнимся содержати, нежели изволи Бог благих нам подати. Наконец, елма мнимся ины преходити в благих или желаем тех превыше быти. Из сея же матере дщери ся раждают, яже душу, яко же змии, уязвляют. Дщерь ея — тщеславие и любочестие, похваление себе и лицемерствие. Дщи ея — продерзивость и упорство злое, и пренебрежение ближних недоброе, От них же происходят непослушания, разгласия и свары, хул отригания, Брани и злословия и яже им точна, та же вся человека деют зле порочна. Господь же люди горды обыче смиряти, отъем дар благодати, в злобы попущати И началнику гордых, демону, даяти, еже с ним казнь вечную во аде страдати.

Гордость и смирение

Гордость аще до небес будет возвыжшенна, даже до ада Богом будет низверженна. Смирение, противне, аще в ад снизится, Богом даже до небес честно возвышится.

2

Праздна плодов ветвь горе взносится, и клас безплодный таможде стремится. Тако человек, дел благих лишенный, высоко держит ум свой напыщенный. Муж паки благий, полный благодати, низу обыче сердце приклоняти. Яко же и ветвь, плоды украшена, к земли бывает с теми преклоненна. И клас, семены добре исполненный, выну ко земли висит преклоненный.

Гордым Бог противится

Лев стоящыя звери обыче терзати, простершим же ся низу язв не задаяти. Подобне Господь Бог наш гордым Ся противит, смиренным же благодать дает, душы живит.

Горе имеим сердца

Орлу егда птенцы пернати бывают, но еще крилами парити не знают, Летит сам из гнезда на аер высоко, да то созерцает быстрое их око, И возбудит хоть в них подобне летати, тако начинают и птенци дерзати. Орлу Христос Бог наш подобен явися, пред ученики Си в небо возвысися. Возбуждая сердца, еже бы желати умы в небесную страну возлетати, Да бы сердцы тамо с Ним им выну быти и по смерти плотстей духом ся вселити. Тем, Горе имеим сердца, воспевает Церковь, чада своя к небу возбуждает. Убо в небо очи, братия, пущайте, из Египта в Сион горний воздыхайте. Не имате града зде пребывающа, тем же возьищите прилежно грядуща.

Горе воздыхати

Огнь пламенем си стремится ко небу, природну тамо имея потребу. Паче нам к нему нуждно воздыхати, да в нем возможем вечно пребывати.

2

Железо к магниту скоро ся вращает, сродство в нем некое к себе обретает. Тако воздыхаяй ко пресветлу небу явствуется тамо имети потребу.

3

Кто часто сердцем к небу воздыхает, небесна себе быти проявляет.

4

Егда на небо зряще воздыхаем, отчество наше прияти желаем.

Господь с тобою

С ним же Бог человеком в мире пребывает, той всяческая дела удобь совершает. Иисусу Наввинну Господь глаголаше: Не бойся. Бог с тобою, и преблажен бяше, Ибо враги порази Исраилска рода, и обетованная взяся им порода. Господь с тобою, аггел Гедеону рече, а он Медианиты без меча посече. Яко скуделы сокруш, страх им сотворил есть, даже друг друга мечем своим потребил есть. Моисий слышав от Бога: Аз буду с тобою, прославися в Египте дивною силою, Ибо чюдодействии Египт поразил есть, Израиля свободил, царя потопил есть Со премногими вой в пучине велице и воспе победная небесе Владыце. Гряди, Господь с тобою, Саул глаголаше, елма на Голиафа Давида пущаше, И поможе оному небесе Владыка, порази бо каменем щуда превелика. Июдифе Озия егда слово рече: Господь да есть с тобою, та главу отсече Олоферну гордому женскою рукою, ибо ей даровал есть Господь помощ Свою. Над всеми сими, егда аггел глаголаше: Господь с тобою, Деве, к ней же послан бяше От Бога во Назврет, тогда сподобися она, яко Бог Слово во чрево вселися Действом Духа Святаго, и человек бяше, изволивый естество восприяти наше. Се колика благая Господь содевает тому человекови, с ним же пребывает! Потщимся убо и мы тощно добротами привлекати Господа, да будет Он с нами. Оному же присущу, вся будут во благо, не устрашимся силы и демона злаго.

2

Гавриил божественный Деве глаголаше: Господь с тобою, егда ону целоваше. Како же бе Бог с нею, того не явил есть светлым словом, да ищем, нам труд оставил есть. Различным же образом того дела сущым, како сопребывает Господь Себе чтущым, Да узрим, како Господь пребывание с нею, от нея же родися плотию Своею. В-первых, со человеки Господь пребывает, егда что силою Си оным содевает, Чесого естественне не могут творити, ту Он естества паче не коснит прибыти. Сим образом бе Господь с Девою Святою, ибо удиви на ней чюдну силу Свою. Устрой ю достойну приятия быти Бога Слова и плотски Онаго родити, То же семене кроме, браку непричастно, без истления девства, всячески безстрастно. Пречюдно со матерством девство сочетал есть, нов плодоношения образ показал есть, Каков прежде не бяше в мире, ни же будет, донде же в течении си солнце пребудет. Въторым образом Господь с людми пребывает правително, повнегда кого управляет Изряднейшим тщанием во всех делех его, да никако погрешит от конца своего. Бяше и сице Господь с Благословенною Девою Мариею, от век избранною, Ибо изрядней ея житие правляше, во всяких деяниих тайно наставляше, Еже бы ей нимало правды отступити, но выну греха кроме всякаго век жити. Яко кормчий корабль свой, ону управляше, от всяка волнения и бури спасаше. Тем безбедно к тихому пристанищу приде, во Сиона горняго покой вечный вниде. Третий покровителства образ обретаю, им же со человеки Бога быти знаю. С Мариею и сице Господь выну бяше, ибо от бед всяческих ону защищаше. Яко орел гнездо си выну наблюдает, аще на время того мало отлетает, Тако Девицу Господь сохраняше выну, яко гнездо бывшую едину Си Сыну. Он ю от гонителя Ирода хранил есть и во Египте страж ей неусыпный был есть. Он завистныя люди в гневе укрощаше, яко никто ей словом тяжким досаждаше. Егда Сынови ея хулы глаголаху, на ню же загражденна уста содержалу. И в год страстей Христовых она бе едина, со Иоанном зрящи кончину си Сына, Ему же ругахуся, яко же можаху, а на Матерь Святую уст не разверзаху. Покровителством сия Божиим вся быша, яко никогда врази на ню наступиша. Четвертый есть промысла образ всеизвестный, им же со человеки живет Царь небесный. Бе сице с Мариею Господь твари всея, ибо выну о нуждных промышляше ея, Да, истиннаго Бога сущи Сына Мати, богодостойне может Того воспитати. Он в Вифлиеме сущей волхвы устроил есть и злато во потребу нести наставил есть. Он во Египте жившу с Сыном препиташе, варварская к ней сердца в милость претворяше; И по страстех Христовых даде Иоанна, да тем будет до конца жизни си питанна. Пятый есть присущия образ божественна, во печалех сущаго деет утешенна. Бяше и сим образом Господь с Мариею, ибо благодатию тешил ю Своею Во всяческих печалех, наипаче творяше утеху, егда она при кресте стояше, Плачющи смерти Сына, ни могла бы жити, аще не бы изволил Господь ю крепити. Шестый есть присутствия образ всем Владыки, елма сослагает Си волю с человеки. Сице бяше с Девою Господь Пресвятою, ибо Христос слагаше ея воли Свою. Сниде с нею в Назарет и послушлив бяше, еже виде потребно, некосно творяше. И в Кане Галилейстей тем Матерь почтил есть, на ея слово воду в вино преложил есть. Наконец, преимущством даров благодати и лично Бог Сын с нею изволи витати, Егда во чреве ея изволи плоть быти и паче всея твари облагодатити. Тогда она превзыде светлы херувимы, превознесеся над вся страшны серафимы. Нижше Бога точию в чести сотворися, потом и в небе выше всех лик водворися. Един Бог болей ея, равнаго не знает, вся, яко солнце звезды, чины превыжшает. И мы ю паче всея твари почитаем, сущу Богородицу песнми величаем.

Гость

Гостя чредит радость паче, неже сладость.

2

Аще косвенно зриши, зле ты гостя чредиши.

Гражданство

Како гражданство преблаго бывает, гражданствующым знати подобает. Разная седми мудрых суть мнения, но вся виновна граждан спасения. Премудрый Виас даде слово свое, гражданство быти преизрядно тое, В нем же закона як царя боятся, и царя, яко закона, страшатся. Хилон блажит, где законов слушают, велесловных же ритор не глашают. Клеовул паки той град похваляет, где безчестия всяк ся устрашает Гражданин паче закона самаго, на преступники в книгах писаннаго. Периандер же то славит гражданство, в нем же, всем прочим имущым равенство, Добродетелми зовутся лучшая и наричутся злобы вся хуждшая. Питтак похвалу дает граду тому, в нем же началство не дается злому. Фалес град блажит, где граждане мнози ни пребогати, ни зело убози. Солону град люб, в нем же обид творцы вся равно имут праведныя борцы, Не токмо беду от них страдавшыя, но ни едины тщеты познавшыя. Еще, иде же блазии блажатся, честь приемлюще, злии же казнятся. Еще, и в нем же граждане слушают началных, сии закон почитают. Сия суть, яже крепят государства, чинна и славна содевают царства.

Гроб Христов

Егда плотию Христос Господь умертвися, во вертограде в гробе нове положися. Да яко Адам первый в верте согрешил есть и вкушением плода умерщвленны был есть, Тако вторым в ограде грех той испразднится и смерть, мертвящая ны, тамо ж умертвится. Новому же Адаму гроб нов подобаше, обновите естество пришедшему наше. В каменном яко камень гробе положися, на нем же создание Церкве утвердися. Гробный камень многими язвы уковася, многи язвы и Христос за ны прия на Ся, Ими же исцелехом от змиевы раны. О коль велика, Христе, милость Твоя на ны! Свет наш Христос во гробе темне положися, тако род наш от нощи люты свободися, За что вечная слава буди, Христе, Тебе, живый с Отцем и с Святым Духом в светлом небе.

Греси противу Духу Святому

Различным видом грех ся содевает, иже противу Духови бывает. Шесточислен есть; хощеши ли знати, изволь слушати. Отчаяние, еже не даст знати, яко Бог хощет грешных миловати. Аще же хощет, то, конечно, может; чай, и поможет. Упование лишнее заводит в надежду щедрот Бога, грехи родит. И сие к слезам за грех не пущает, в нем погубляет. Некаяние Духа благодати приходу споны обыче деяти, ея же кроме сердце не крушится, душа мертвится. Жестосердие уши затыкает, да увещений ничиих слушает. И наковало иногда крушится, сей не мягчится. Правды боритель, хотяй ю попрати, во нощи лести сердцем пребывати, Духу Святому есть противен зело, биет на Нь смело. И ненавидяй в ближних благодати хощет дар Духа Свята угашати. Яве нелюбовь демонску являет, сам исчезает. Вси сии трудно простими бывают, что сущии в них вправду ся не кают. Бог же вся может и схощет прощати мощным плакати.

Греси ума

Светилник тела око, то бо просвещает вся уды, к делесем их благо управляет. Души же светилник ум, ибо тем правится всякое дело ея и чинно творится. А яко плоти око иногда мрачится, егда болезнь или вред некий прилучится, Тако не кроме мрака и ум может быта, поне же многа могут онаго вредити. Та же праведно грехи ума нарицати, а обыкоша душу слепу содевати. Первый грех — невежество, елма кто не знает, что в вере или в делех знати подобает. Вторый — неразсудие, елма неко дело неразсудно творится, ни бывает цело. Третий — скоросудие, им же согрешаем, елма ближния скори судити бываем. Ту досада Богови Самому ся деет, яко ум наш суд Его восхищати смеет. Его бо токмо дело тайная судити, а мы како дерзаем суд тайных творити? Обида есть и ближним, яже осуждаем, ибо неразмыслием оным досаждаем, И самы себе вредим, Бог бо попущает, да о них же кто судит, сам в тая падает. Грех и непостоянство, им же отпадаем твердости суда, и в том изменни бываем. Мало плоть или демон начнет искушати, а мы в благом умысле не тщимся стояти. Трости, зыблемей ветром, всяко подобимся, в след мечтания блудна и умом носимся. Грех и упор жестокий, ибо раскол родит, свар, непослушание от него исходит. Грех и мудрование плоти, елма тая взискуем, яже токмо телу угодная, То же лщенми многими и хитростми деем, а на божественная ума не имеем. Грех есть и оплазивость, егда тщимся знати, яже ни малы ползы могут нам подати, Или неприличных нам вежества желаем, или со пристрастием лишних взискиваем, Или въконец суетный, ли чрез средства злая, или в намерения Богу противная. Вся сия словом онем Павел заключает: Не мудритеся паче, неже подобает.

Греси святых

Писание грехи святых изъявляет, да никто в житии своем уповает. Аще бо крепции столпи упадают, вскую немощнии в себе уповают? Ты, слыша грехи их, сердцем ужаснися, от подобных грехов опасно хранися И обрати очы на покаяние, еже выну буди ти в подражание.

Греси, вопиющии в небо

Четыри в Писании греси положении, иже вопиющии в небо наречении. Вопют же, еже бы изволил Бог мстити дерзающым грешником оныя творити. Первый тех есть убийство неповинна суща, тако Каин Авеля, без вины живуща, Дерзнул смерти предати, тем выну кровь его вопиет отмщения до Творца своего. Вторый грех есть содомский, сий бо вопияше в небо, яко же Троица аггелов вещаше Аврааму святому, елма хоте ити созерцати Содому и огнем казнити. Третий — удержание мзды, рабом должныя и всем труждающимся людем достойныя. О сем Иаков Святый светло извещает, яко слезно вопити к Богу не престает. Четвертый вдов и сирот есть утиснение, за сие скоро Господь деет отмщение, Яко за Исраиля обижденна мстил есть Египту, егда люди Своя свободил есть. Блюдитеся, братие, злодействия сего, да не страждете казни, достойныя его. Аще ли уже делом сия совершисте, праведнаго Судию на гнев возбудиете, Тщитеся молитвами Его примирите и, им же должни есте, довле сотворите. Рабом удержанная скоро воздавайте, взятая вдовам, сирым цело возвращайте. Иначе не престанут ко Богу вопити, а Судия праведный не может не мстити. Аще же и терпит, но никако забудет и по еже терпети лютшая казнь будет.

Греси тайнии

Аще тя совесть и не обличает, обаче не у безвинна Бог знает. Может бо совесть многих грех не знати, яже Бог видит и казнь хощет дата. Молися убо и о тайных гресех, да Бог, простив я, вчинит тя в небесех.