Молитвенное приношение старца Софрония

Молитва третья

ВЛАДЫКО ВСЕДЕРЖИТЕЛЮ, Господи Иисусе Христе, пребезначальнаго Отца собезначальный Сыне и Слове, неизреченнаго ради милосердия Твоего все домостроительство спасения нашего прекрасне совершивый, и по безмерному благоволению Твоему вручивый немощным людем служение сему великому таинству спасения мира, Сам Ты, Господи, в благости Твоей ущедри и помилуй раба Твоего (имя), прости ему вся прегрешения его вольная и невольная, соблюди его невредима от всех козней вражиих; заступи его от всякаго нападения неприязненнаго, неизменно храни его в путех воли Твоея и во истине слова Твоего, благодатию Твоею восполняя всякое неможение или неведение его.

Ей, Владыко Христе, по многому Твоему снисхождению и крайнему человеколюбию, положивый и сего раба Твоего (имя) во еже приносити Тебе дары же и жертвы духовныя о людех Твоих, Духом Твоим Святым укрепи его в службу сию и даждь ему слово во отверзении уст его, во еже призывати благословение Твое на наследие Твое, и да почиет благоволение Твое на всем деле служения его.

О Боже, Боже наш, даждь и сему рабу Твоему нести в мир свидетельство о истине Твоей, и Сам Ты свидетельствуй о нем, якоже свидетельствовал еси в веках о святых Твоих апостолех и о наследницех их, отцех наших, яко да и в нем, и в служении его прославится всесвятое Имя Твое со Отцем и Духом Святым.

Мене же, недостойнаго раба Твоего, за молитвы служителя Твоего очисти от всякия скверны плоти и духа, и презирая вся моя беззакония и грехи, вразуми мя к познанию истины Твоея, не скрый от мене света заповедей Твоих, силою Твоею удержи мя в путех воли Твоея, и даждь ми все прочее время жизни моея совершити непорочно пред лицем неизреченныя славы Твоея, да не лишуся, по безумию моему, радости спасения Твоего и участия в наследии святых Твоих, от века Тебе благоугодивших.

Аминь.

Молитва четвертая

ГОСПОДИ БОЖЕ НАШ, создавый нас и введый в жизнь сию, показавый нам в безмерности благоволения Твоего к роду человеческому пути во спасение и даровавый нам откровение небесных тайн, и положивый в службу сию немощью плоти обложенных людей, сотвори милость Твою с рабом Твоим (имя), прости ему всякое согрешение его вольное и невольное, благодатию Твоею исцели всякое неможение его и светом познания Твоего свободи его от всякия тьмы неведения; Духом Твоим Святым утверди его во истине исповедания Твоего и в путех воли Твоея святыя и всесовершенныя. Даждь быти ему служителем Новаго Завета Твоего, слугою непостижимых Таинств Твоих; сотвори его достойна быти приносити Тебе жертвы духовныя о людех Твоих; всякое благое прошение его и молитву приими во святый и пренебесный Твой жертвенник, в воню благоухания, низпосылая благодать Святаго Твоего Духа, яко да и в нем прославится всесвятое и великолепое Имя Твое, Отца, и Сына, и Святаго Духа.

Аминь.

Молитва пятая

Иже неизреченных и невидимых тайн Боже, у Негоже сокровена суть источницы премудрости и разума, источницы силы и света; непостижимый во всех путех Твоих и делех, даждь ми, недостойнейшему всех человек, благословение Твое на службу мою, и за молитвы духовнаго отца моего, укрепи мя в служении сем. Ей, Господи, презирая вся моя беззакония и согрешения, вразуми мя к познанию истины Твоея и любви Твоея к человеку. Ты бо, Господи, умовением ног апостол Твоих давый нам образ служения ближнему, приими и мою малую и ничтожную службу сию, юже совершаю аз немощный по заповеди Твоей (отцу или матери моей, брату или сестре моей, или вообще страждущим и болящим), со всяким благоволением, и утверди мя в любви Твоей до конца. О Господи, помоги мне.

Аминь.

Молитва шестая

ГОСПОДИ ИИСУСЕ ХРИСТЕ, милостивый Спасителю наш, помилуй и спаси раба Твоего (имя) и за многое благоволение Твое излей на него благословение Твое.

Аминь.

МОЛИТВЫ ЗА УСОПШИХ

Прошения о усопших

ГОСПОДИ ИИСУСЕ ХРИСТЕ, Источниче жизни и безсмертия, милостивно приими усопшаго раба Твоего (имя), о надежде живота вечнаго почившаго, и не помяни грехов его, в житии сем приключьшихся ему, но да будет ответ его благоприятен на страшнем судищи Твоем; молим Ти ся, услыши и помилуй.

ВОСКРЕСЕНИЕ сый и живот всем верующим в Тя, Иисусе Христе, в вере и надежде воскресения усопшаго раба Твоего (имя) со святыми упокой; молим Ти ся, услыши и помилуй.

ГОСПОДИ ИИСУСЕ ХРИСТЕ, Кровию Твоею человеки искупивый, и смертию Твоею от смерти горькия избавивый род наш, во благости Твоей упокой усопшаго раба Твоего (имя), и вечныя славы Твоея причастника сего покажи; молим Ти ся, услыши и помилуй.

БОГОНАЧАЛЬНОЮ ВЛАСТИЮ живыми господствуяй и мертвыми обладаяй, Владыко Христе, преставльшагося раба Твоего (имя) упокой и неосужденнаго предстояния Престолу Твоему сподоби; молим Ти ся, услыши и помилуй.

ТЕРПЕНИЕМ и кротостию, упованием и любовию пожившаго на земли раба Твоего (имя), Христе, яже паче ума сияния славы Твоея сподоби, и лику возлюбленных Твоих сопричти; молим Ти ся, услыши и помилуй.

ЯКО АГНЦА, предвечно закланнаго за грехи мира, молим Тя, Христе, Кровию Твоею омый всякий грех усопших раб Твоих (имена), и силою Креста Твоего свобода я от всяких уз неприязни; молим Ти ся, услыши и помилуй.

ГОСПОДИ ИИСУСЕ ХРИСТЕ, силою Божественнаго Твоего еже из мертвых возстания, возведи души усопших раб Твоих (имена) ко причастию вечныя славы Твоея, и насладитися еже в Тебе непреложнаго мира сподоби я; молим Ти ся, услыши и помилуй.

ГОСПОДИ ИИСУСЕ ХРИСТЕ, аще и согрешаем в безумии нашем без меры и счета, но Ты, Свет безначальный и благости бездна сый, помилуй и ущедри нас, и даждь вечный покой усопшим отцем и братием нашим; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, основание сый всему сущему: и вечности, и времене, властию Твоею положивый пределы временнаго бытия нашего на земли, и в Сыне Твоем собезначальнем даровавый нам чрез воскресение безсмертную жизнь и Царство непреложное, помяни и раба Твоего (имя) в надежде воскресения и жизни вечныя усопшаго, и упокой его во Свете Лица Твоего; молим Ти ся, услыши и помилуй.

ОТЧЕ БЛАГИЙ и человеколюбивый, Боже, Боже наш, единаго преслушанием смерть вниде во вся человеки, Единаго же Господа нашего Иисуса Христа послушанием да внидет во вся ны оправдание жизни вечныя, и да разрешится ныне душа раба Твоего (имя) от всяких уз греховных, и оживится силою преславнаго Его воскресения; молим Ти ся, услыши и помилуй.

ГОСПОДИ ИИСУСЕ ХРИСТЕ, егоже явил еси равноангельна на земли, усопшаго раба Твоего (имя), самовластием слова украсив, ныне во стране живых всели, печали и попечения свободна, и причастника Божественныя Твоея жизни сего покажи; молим Ти ся, услыши и помилуй.

ОТЧЕ СВЯТЫЙ И БЛАГИЙ, якоже быхом наследницы смерти преступлением единаго праотца нашего, такожде яви нас быти наследники жизни вечныя правдою Единаго безгрешнаго Сына Твоего, Господа нашего Иисуса Христа, и подаждь вечный покой души усопшаго раба Твоего (имя), и сохрани ю во блаженней жизни, яже у Тебе; молим Ти ся, услыши и помилуй.

БОЖЕ СВЯТЫЙ, Иже во святых почиваяй, создавый человека по образу Твоему и по подобию, приими от уст нас грешных прошения сия о преставльшемся рабе Твоем (имя) и в безмерной благости Твоей презрев вся грехи его, даруй ему наследие нестареемыя жизни в Самом Христе Твоем, со всеми от века святыми; молим Ти ся, услыши и помилуй.

ГОСПОДИ БОЖЕ, Отче Вседержителю, Имене ради возлюбленнаго Сына Твоего, упования нашего, Иже даде Себе измену смерти, в нейже держими бехом, и есмы даже до ныне, продани под грехом, разреши тяжкия узы смерти нашея, сыны воскресения явлей нас, и в покоище Твоем, идеже вси святии Твои упокоеваются, упокой душу усопшаго раба Твоего (имя); молим Ти ся, услыши и помилуй.

ГОСПОДИ ИИСУСЕ ХРИСТЕ, Начальниче жизни нашея, перворожден из мертвых, на небеса возшедый, и седый одесную Бога и Отца, не воздаждь нам по делом нашим, но Кровию Твоею омый усопшаго раба Твоего (имя) от всякаго греха и, освятив его Духом Святым, сообразна сотвори его ныне образу славы Твоея в невечернем дни Царствия Твоего; молим Ти ся, услыши и помилуй.

ГОСПОДИ ИИСУСЕ ХРИСТЕ, Бог сый превечный, вся носяй глаголом силы Твоея, истощивый Себе даже до рабьяго зрака, и Крестом сошедый во ад, открывый путь воскресения всякой плоти, грехом умерщвленней и тлением содержимей, упокой душу усопшаго раба Твоего (имя), упование свое возложившаго на Тя, Творца и Бога, и Начальника жизни нашея; молим Ти ся, услыши и помилуй.

ГОСПОДИ ИИСУСЕ ХРИСТЕ, давый Себе измену смерти, и жизнь нетленную источивый нам из прободеннаго ребра Твоего, и ныне просим, из неистощимаго источника благости Твоея, излей на преставльшагося раба Твоего (имя), яко да и сей прославит Тя в веках грядущих и в Царстве непреемном; молим Ти ся, услыши и помилуй.

ПРИЗРИ, БОЖЕ, Содетелю наш, на немощь созданнаго Тобою естества нашего в падении нашем, помяни болезнь и скорбь нашу, труды и злострадания в мире сем, и презрев вся его прегрешения, силою воскресения Твоего возстави раба Твоего (имя) от тьмы и сени смертныя к лицезрению красоты Света Твоего невечерняго; молим Ти ся, услыши и помилуй.

ПОЧТИВЫЙ НЫ образом Твоим, яко создания руку Твоею, Спасе, в видимом зраце земнаго естества нашего умнаго существа Твоего живописал еси подобие, егоже и ныне общника яви усопшаго раба Твоего (имя), в нетленных селениях праведных учинив душу его; молим Ти ся, услыши и помилуй.

ХРИСТЕ ИИСУСЕ, крестную смерть прияти изволивый нашего ради спасения, да не ктому себе живем, но Тебе Единому, за ны умершему и преславно воскресшему, в измену разорившияся храмины тела, даждь ныне усопшему рабу Твоему (имя) нерукотворенную и вечную храмину на небесех, и да будет в нем все мертвенно пожерто огнем спасительнаго Твоего воскресения; молим Ти ся, услыши и помилуй.

Молитва

ГОСПОДИ ИИСУСЕ ХРИСТЕ, Боже Спасителю наш, соприсносущная Отцу содетельная Сило, неизреченнаго ради милосердия Твоего, еже к нам, и крайняго ради снизхождения, в плоть оболкийся, и приведый Себе о нас непорочное заколение, и сим неисповедимым и страшным священнодействием во ад сшедый, и неразрешимыя смерти узы расторгнувый, и во тьме седящим свет вечныя жизни явивый и восход лучший показавый, Сам и ныне, Христе, услыши молитву мою, недостойнаго раба Твоего, и душу усопшаго [новопреставленнаго] (имя) упокой.

Ты бо един еси рода смертнаго и безсмертнаго Содетель: Ты един еси Владыка, всю тварь десницею нетрудно содержай; Ты един еси воистину спасение миру и непостыдная надежда смертным жалом уязвленных; Ты един еси сведый до конца коегождо нас место и нужду, темже припадаем Тебе и смиренно вопием: не помяни грехов, ни беззаконий, и всякия иныя неправды, приключшейся рабу Твоему в житии сем, болезненном и многотрудном, и множеством милости Твоея душу его от всяких уз разреши, и всели ю в места светла, в места покоя безпечальнаго, и даждь ему нетленную радость со всеми от века святыми и праведниками воспевати преблагословенное Имя Твое, со Отцем и Святым Духом, во веки веков.

Аминь.

Келейные и богослужебные молитвы за усопших[11]

БОЖЕ ВЕЛИКИЙ И ВЕЧНЫЙ, святый и человеколюбивый, сподобивый нас, недостойных рабов Твоих, в час сей стати пред Лицем Твоим и нечистыми устами призвати страшное и поклоняемое Имя Твое, приими посильное благодарение наше о Твоих великих благодеяниях, яже сотворил еси и не престаеши творити в нас. Велико бо воистину таинство Божественным Твоим повелением от небытия явления нашего в мир сей, неизследима глубина Твоего еже о нас смотрения, и временнаго зде пребывания и по сем вечнаго в Тебе упокоения.

МОЛИМ ТЯ, Всеблагий Создателю наш, помяни немощь естества нашего и еже от врага на всякий час бедственное поношение и попрание, несомое нами, призри благосердием на неизбывныя скорби и болезни, чрез все время живота нашего находящия на ны, наипаче же ужас и страх в час исхода смертнаго, и прости милостивно вся прегрешения усопшим рабом Твоим (имена), и упокой я во обителех, яже обещался еси уготовати веровавшим в Тя, Господи, и имена их в книзе животней неизгладимо напиши, телеса же совоздвигни в день, воньже определил еси по святым Твоим и неложным обетованиям. Несть убо, Господи, рабом Твоим смерть, но преставление от печальнейших на сладостнейшая. Аще бо и зело болезнен есть исход наш от телесе сего и страшен воистину час явления нашего пред неподкупным судом Твоим, обаче от труда и скорби на упокоение и радость преходим; и от суеты и мятежа к непрестающему видению славы Твоея возводимся.

ЕЙ, ГОСПОДИ, молим Тя, аще что согрешихом пред Тобою волею или неволею, вся прости: нам ли, до времене оставльшимся, онем ли, от жития сего преставльшимся; и сим убо свободу от всяких уз и покой сладкий ныне даруй, нам же зде сущим конец благий в покаянии и мире подаждь.

Ты бо еси Бог наш, Бог миловати и спасати, и Тебе славу возсылаем, Отцу и Сыну и Святому Духу, ныне и присно и во веки веков.

Аминь.

ГОСПОДИ ИИСУСЕ ХРИСТЕ, пребезначальнаго Отца собезначальне Сыне и Слове, неизреченнаго ради милосердия Твоего, все смотрение о спасении человеческом прекрасне исполнивый, и неразрешимыя смерти узы расторгнувый; приведый Себе о нас непорочное заколение, и Тело Твое пречистое и всякаго греха неприкосновенное за ны давый в жертву, и страшным сим и неисповедимым священнодействием живот вечный нам даровавый; во ад сшедый и во тьме и сени смертней седящим Божественный восход чрез воскресение показавый: Ты, Господи Иисусе Христе, Отца Вышняго Сыне возлюбленный, присносущныя славы Царю, услыши нас, молящихся Тебе, и упокой души от века усопших рабов Твоих, отец и братий, сестр и матерей, праотец и праматерей наших и прочих сродников по плоти, паче же присных по вере, и раба Твоего (имя), о немже память творим ныне. Яко в Тебе всех держава, и рукою Твоею содержиши вся концы земли: Ты един еси рода смертнаго и безсмертнаго Содетель, лета измеряяй живым и времена уставляяй смерти; низводяй во ад и паки возводяй; Сам убо, Христе, Владыко живых и мертвых, Спасителю наш и Надеждо всех, благоволивый приимати молитвенная воздыхания рабов Твоих, услыши нас, смиренных, и упокой душу раба Твоего (имя) в селениих праведных, во обителех света, идеже непрестанная радость зрящих Твоего Лица неизреченную славу, идеже немолчное славословие приносится Тебе, со безначальным Твоим Отцем и Всесвятым и благим и животворящим Твоим Духом, ныне и присно и во веки веков.

Аминь.

ВЛАДЫКО ХРИСТЕ, Боже великий и вечный, святый и человеколюбивый, сподобивый нас в час сей стати пред неприступною Твоею славою и сокрушенным сердцем принести Тебе благодарение о великих дарех, яже сотворил и непрестаеши творити в нас, молим Тя, помяни во благости Твоей крайнюю немощь естества нашего и низпосли на ны свышнюю силу Твою, да греховныя тьмы избежавше и оружием света Твоего оградившеся, неприступны будем всем кознем лукаваго, и со дерзновением чистым сердцем прославим Тебе, единаго истиннаго Бога. Велико бо воистину таинство Твоего о нас благоволения о временном на земли пребывании нашем, и по сем вечном в Тебе упокоении. Приими убо, многомилостиве Господи, благодарение сие наше о входех наших в мир сей и о исходех, о надежде нам воскресения и жизни нетленныя неложном обещании. Ты бо еси воскресения нашего Начальник, и поживших Судия человеколюбивый, и воздаяния Владыка всещедрый; Ты снисхождения крайняго ради приобщился еси преискренне плоти и крове, и тем совозвел еси нас в Твое Божественное безстрастие, приими убо в час сей молитвы и моления наша, и упокой отцы наша и матери, и чада, и братию, и сестры, и вся преждепочившия души, и раба Твоего (имя) ныне поминаемаго, во стране живых, в Царствии Небесном, в рай сладости, вводя вся во святыя Твоя обители, и имена их в книзе животней неизгладимо напиши, телеса же их воздвигни в день, в оньже определил еси святым Твоим и непреложным обетованием. Несть убо, Господи, рабом Твоим смерть, исходящим нам от тела и к Тебе Богу нашему приходящим, но преставление от печальнейших на сладостнейшая, и от труда и мятежа на упокоение и радость.

Аще же что согрешихом к Тебе, милостив буди нам же и ему, иже отиде от жития сего, зане ни един есть чист пред Тобою от скверн, кроме Тебе единаго безгрешнаго Господа нашего, от Негоже вси мы уповаем милость получити и оставление грехов. Сего ради, нам ли до времене оставльшимся, сему ли, преставльшемуся, остави и прости вся грехопадения вольная и невольная, яже в ведении и в неведении, в деяниих или в словесех, и во всех движениих наших, исповеданная, или забвенная, и отшедшему убо свободу и покой вечный даруй, нас же зде сущих благослови, таже кончину благую и мирную даруя нам и всем людем Твоим, и Царствия Твоего достойных всех нас сотвори.

Аминь.

СЫЙ, ВЛАДЫКО И ЦАРЮ всяческих, Христе Иисусе, зрак раба восприемый и с нами долу лежащими поживый, смертию же крестною в преисподняя снизшедый, и во тьме и сени смертней заключенныя и под стражею адовою содержимыя преславным Твоим воскресением возставивый, услыши нас, смиренных, молящихся Тебе, и упокой души рабов Твоих, (имена) и всех от века почивших отец и братий, сестр и матерей, праотец и праматерей наших, сродников наших по плоти даже до перваго рода, наипаче же присных по вере, идеже вся святии Твои пребывают и упокоеваются.

Ты бо еси содержай вся концы земли и наполняяй бездны; Ты един еси Владыка живых и мертвых, лета измеряяй живота и времена полагаяй успению коегождо; Ты еси един, сведый место всякаго создания Твоего, и низходящия во ад тяготою грехов милостивно возводиши к животу и Свету невечернему, темже молим Тя: упокой рабы Твоя (имена) в селениих праведных, идеже радость непреложная и веселие непрестанное зрящих Твоего Лица доброту превожделенную, идеже немолчное славословие приносится Тебе, со Отцем и Духом Святым, во веки веков.

Аминь.

ГОСПОДИ, БОЖЕ НАШ, сердцем сокрушенным и смиренным приносим Тебе малое и недостойное моление о рабе Твоем усопшем (имя) [зде прахом почивающем]. Услыши нас, и упокой душу его во стране живых, в недрех Авраама, Исаака, и Иакова.

Аще же что согреши раб Твой яко человек в животе своем, Ты же, Господи, яко Бог, вся прости ему, зане ни един человек обретается чист пред Тобою от скверны и всякаго инаго беззакония. Ты точию, Господи, един сый свят по естеству и освящаяй всякое создание Твое, и Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Аминь.

Прошения о усопших священнослужителях

ГОСПОДИ ИИСУСЕ ХРИСТЕ, рекий пречистыми усты Твоими: аще кто Мне служит, почтит его Отец Мой, и идеже Аз, ту и слуга Мой будет, ныне убо благосердием Твоим приими преставльшагося раба Твоего и служителя (имя) и упокой его, идеже вси от века во истине Тебе послужившия, и по неложному Твоему обетованию неизменнаго еже с Тобою пребывания сего сподоби; молим Ти ся, услыши и помилуй.

ГОСПОДИ ИИСУСЕ ХРИСТЕ, присносущнаго Отца соприсносущная Премудросте и Сило, по непостижимому еже к нам благоволению Твоему животворящая и спасительная страсти за ны понесый, и погребением Твоим адова пленивый царства, милостивно приими ныне раба Твоего и служителя, преставльшагося (имя), и помяни верное служение его, еже во всяком терпении, в скорбех и ранах, в изгнаниях, теснотах и лишениях раб Твой (имя) соверши, и воздаждь ему сторицею в невечернем дни Царствия Твоего; молим Ти ся, услыши и помилуй.

ГОСПОДИ ИИСУСЕ ХРИСТЕ, Владыко всех и Царю, царское священие даровавый на земли рабу Твоему и служителю преставльшемуся (имя), и ныне милостивно сего приими, и неизреченнаго пред Престолом славы Твоея предстояния с небесными умными силами, пророками, апостолами и святительми сподоби; молим Ти ся, услыши и помилуй.

ИИСУСЕ ХРИСТЕ, Царю царствующих и Господь годсподствующих, едине Святый, со святыми упокой от жития сего преставльшагося раба Твоего (имя) и наследие нестареемыя жизни, яже в Тебе сему даруй; молим Ти ся, услыши и помилуй.

ГОСПОДИ ИИСУСЕ ХРИСТЕ, пришествием, еже во плоти, началозлобнаго убийцу низложил еси, и славным воскресением Твоим нетленныя жизни свет роду человеческому даровал еси, усопшаго раба Твоего (имя) со избранными Твоими во светлостех святых Твоих упокой; молим Ти ся, услыши и помилуй.

ГОСПОДИ ИИСУСЕ ХРИСТЕ, во дни плотскаго Твоего еже с нами пребывания и мироискупительныя страсти ко Отцу Твоему воззвавый: Отче Святый, ихже дал ecu Мне, хощу, да идеже, Аз, и тии будут со Мною, да видят славу Мою, юже дал ecu Мне, яко возлюбил Мя ecu прежде сложения мира, милостивно ныне приими преставльшагося раба Твоего и служителя (имя), и нетленныя славы Твоея причастника сего покажи; молим Ти ся, услыши и помилуй.

ГОСПОДИ ИИСУСЕ ХРИСТЕ, рекий пречистыми усты Твоими: аминь, аминь, глаголю вам, яко слушаяй словесе Моего и веруяй Пославшему Мя имать живот вечный, и на суд не приидет, но прейдет от смерти в живот, умилосердися ныне о преставльшемся рабе Твоем (имя) и в славу небесную и нескончаемую сего приими; молим Ти ся, услыши и помилуй.

РАБА ТВОЕГО (имя), егоже преставил еси от временных, лепоты Твоея сиянием озаритися благоволи, Христе, Спасе наш, и благости Твоея неизреченным богатством душу его веселием неотъемлемым возвесели; молим Ти ся, услыши и помилуй.

ГОСПОДИ, БОЖЕ НАШ, Егоже слава неизреченна и милость безмерна, Егоже царство непреемно и владычество непреложно, в вере и надежде усопшаго раба Твоего (имя) в рай сладости упокой, и душу его со всеми от века Тебе благоугодившими всели; молим Ти ся, услыши и помилуй.

ГОСПОДИ СИЛ, скорбящих радосте, и плачущих истинное утешение, и всех в малодушии сущих державное заступление сый, милостию и щедротами Твоими посети сокрушенныя рабы Твоя, и всяку болезнь в сердцах их исцели: раба же Твоего (имя) в надежде воскресения усопшаго в недрех Авраамлих упокой, и лику спасенных Твоих сопричти; молим Ти ся, услыши и помилуй.

Молитва

БОЖЕ, Боже наш, иже всем человеком жития предел положивый, и время исхода из мира сего определивый во благом Твоем промышлении о всех нас: молим Тя, Всеблагий, усопшаго раба Твоего (имя) милостивно приими, и якоже на земли в Церкви Твоей служителя Престолу Твоему явил еси и совершителя святых Твоих Тайн поставил еси, тако и ныне, в пренебеснем Твоем жертвеннице сослужителя горних чинов того покажи; и якоже в человецех духовным достоинством сего украсил еси, тако и ныне, в собор святых неосужденна того вчини; и якоже зде живот его даром священства прославил еси, тако и ныне, Сам Ты, Господи, прославлявшаго Тя, славою вечною на небеси прослави, и дух его со всеми от века Тебе благоугодившими совокупи в невечернем дни Царствия Твоего, Христе: Ты бо еси воскресение, и живот, и покой всех возлюбльших пришествие Твое, и Тебе славу возсылаем со Отцем и Святым Духом, ныне и присно и во веки веков.

Аминь.

МОЛИТВЫ НА РАЗНЫЕ СЛУЧАИ ЖИЗНИ

Молитвы на освящение автомобиля

Молитва первая

ГОСПОДИ ИИСУСЕ ХРИСТЕ, благословляяй и освящаяй всяческая молитвою и призыванием всесвятаго Имене Твоего, благослови колесницу сию, юже раб Твой (имя) стяжа, и да будет сия ему во благую потребу, в служение нуждам его и ближних.

Ей, Господи, приклони ухо Твое и услыши нас в час сей, и благословением Твоим сохрани раба Твоего и всякаго инаго, ею пользующегося от всякаго сопротивнаго обстояния и всякаго вреда человеком ли, или скотом.

Твое бо есть еже миловати и спасати ны, Боже наш, и Тебе славу возсылаем со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, БОЖЕ НАШ, безначальне, блаже, Содетелю всех и Творче всего сущаго, Едине Святе, Едине по существу безгрешне, научивый ны Божественным Твоим словом почитати вся Тобою созданная добра быти, и заповедь давый праотцем нашим, еще в рай сущим, возделывати ея, молим Тя, Владыко Святый, призыванием всесвятаго Имене Твоего и окроплением воды сея священныя, благослови колесницу сию, юже стяжа раб Твой (имя), и даждь ему надежду, яже о Тебе, и сохрани его от всякия беды и напасти пользующемуся и всякому иному живому существу, Тобою созданному. Ты бо еси Бог всяческих, Ты един еси Хранитель Святый и Заступник державный, и Тебе славу вси возсылаем, ныне и присно и во веки веков.

Аминь.

Молитва на благословение иконы спасителя

СЫЙ БОЖЕ ОТЧЕ, Вседержителю покланяемый, достойно есть яко воистинну, и праведно, и лепо великолепию святыни Твоея Тебе кланятися и Тебе славити, Единаго воистинну Сущаго Бога; безначальне, непостижиме, неописанне, неизменне, призри милостивно на ны и на образ сей Единороднаго Твоего Сына, Иже сый сияние славы Твоея и существа Твоего неизменное начертание носит вся глаголом силы Своея; и Бог сый превечный на земли явися, и от Девы Святыя воплощься истощи Себе, зрак раба приемь, сообразен быв телу смирения нашего, да нас сообразны сотворит образу славы Своея; Иже даде Себе измену смерти, сошед Крестом во ад, и воскрес в третий день, и возшед на небеса, седе одесную величествия Твоего на высоких. Сего ради, Отче Всесвятый, и мы, смиреннии раби Твои, сотворихом сей образ возлюбленнаго Христа Твоего, и просим, и молим Тя: благоволением благости Твоея, низпосли Духа Твоего Святаго на икону сию, во еже благословити и освятити ю, яко да вси молящии пред нею услышани будут от Тебе, и приимут небесное Твое благословение, и благодать Святаго и животворящаго Твоего Духа, и освящение Единороднаго Твоего Сына.

Яко Ты еси освящение наше, и Тебе славу возсылаем, ныне и присно и во веки веков.

Аминь.

Молитвы на благословение дома

Молитва первая

УПОВАНИЕ НАШЕ, ХРИСТЕ, заповедь давый учеником Твоим: егда входити в дом, призывати мир Твой на него, и на всех живущих в нем, Сам Всеблагий, низпосли мир Твой на рабы Твоя (имена), зде обитающих и Тебе нами недостойными мольбы и моления приносящия. Ей, Владыко Христе, услыши нас ныне и милость Твою богатую излей на вся ны. Ты бо веси вся скорби наша и немощь естества нашего. Темже не посрами нас, надежду нашу на Тя Единаго возложивших и инаго заступления в мире сем кроме Тебе не имущих. Буди нам покров и ограждение, покой и радование, мир и крепость, спасение и освящение. Ты бо еси Бог наш, и Тебе славу возсылаем на всяк день, со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, ИИСУСЕ ХРИСТЕ, Спасителю наш, во дни плотскаго Твоего пришествия и пребывания с нами изволивый внити под сень Закхееву и спасение тому и всему дому его бывый: Сам, всеблагий наш Господи, и ныне благослови всех зде живущих рабов Твоих и благодатию Твоею неотступно пребуди с ними во вся дни живота их, и соблюди их невредимы от всякаго навета вражия, даруя им мир Твой, Господи, якоже и святым Твоим апостолом. Твое бо есть еже миловати и спасати нас, Христе Боже наш, и Тебе славу возсылаем со Отцем и Святым Духом, ныне и присно и во веки веков.

Аминь.

Молитва на построение и освящение дома

ГОСПОДИ ИИСУСЕ ХРИСТЕ, един сый воистину краеугольный Камень, на немже зиждется всякая жизнь, призри милостивно на рабы Твоя (имена), изволившия в надежде на Тя воздвигнута дом сей в жилище себе, и в державе крепости Твоея основай его на твердом камене, Иже основавый землю на тверди ея, яко да ни ветр, ни вода, ни огонь, ни гроза, ни оружие бранное, ни землетрясение, ни ино что поколебати или повредити возможет и.

Благоволи же, Христе, упование наше, в богатстве милости Твоея, строение сие в конец благополучно привестися, и на рабов Твоих сих, хотящих в нем жити, благословение Твое низпосли, и щедроты Твоя обильно излей. Даждь же им и Ангела мирна, храняща их от всякаго навета сопротивнаго во вся дни живота их.

По исходе же их из мира сего, во времена, ихже положил еси во власти Твоей, егда отложити им телесную сию храмину, приими их во обители светлыя дому Отца Твоего по обетованию Твоему, и насладитися еже в Тебе непреложнаго мира и радости нетленныя сподоби.

Ты бо еси покров нам, прибежище, и сила, и Тебе славу возсылаем, со Отцем и Святым Духом, во веки веков.

Аминь.

Молитва о единстве для семьи или прихода