Егда нужду ближняго твоего узриши, пособие скорое ему да твориши. Не зри, яко инии онаго лишають, — обрѣтеннаго злата буии не знают. 5 Ты, яко злато первый тщал бы ся подъяти, ни потерпѣл бы иным к тому тя варяти, — Первый тщися во нуждѣ ближним пособити, за то изволит господь тя благословити; Будет во нуждах твоих сам помощник тебѣ и подаст возмездие в златосвѣтлом небѣ. 2
Плиний о слонѣх то нам повѣдает, яко аще слон во яму впадает, Друзии слони вѣтви древ вметают, пѣсок рыюще во яму всыпают, 5 Да тако яма земли уравнится и впадший в ону удобь свободится. Оле чудесе! Во звѣрѣх колика любы! Кто бы дал, да. бы в нас толика, Во человѣцѣх, любов могла быти, 10 да бы друг другу тщался пособити! Но — увы! — преко в нас ся обрѣтает, яму друг другу, да впадет, копает Или впадшаго засыпати тщится, да никогда же бѣды свободится. 15 Что же за сие приимут от бога? — Во адстей ямѣ мучения многа. 3
Корабелници, егда преплавают пучину моря, аще усмотряют Иныя в бѣдствѣ тонения быти, всячески тщатся оным пособити. 5 Прибытков своих тогда не смотряют, удержат корабль парус низпущают; Верви подают, да бы ся имати тонущым за ня, а не погибати; Дски и древеса различна вергают, 10 елико могут помощь сотворяют. Сия комуждо требѣ подражати, егда ближняго видит утопати В глубинѣ грѣхов; вся лишити дѣла мирска достоит, да бы друга цѣла 15 Соблюсти богу. Си любовь правая, вѣрным полезна, богу любезная. ЧЕСТЬ
Родителей на сына честь не прехождает, аще добродѣтелей их не подражает. Лучше честь собою комуждо стяжати, нежели предков си честию сияти. ЧАРОДѢЙСТВО
В немощи к чародѣем иже прибѣгает, яд пия, не врачевство, душу убивает. Или во огни ищет безумник прохлада, — погибель ту извѣстна, ни мала отрада. 5 Кто видѣ волка овцу зубами цѣляща или лва гладна в зубах часть мяса щадяща. Той и от чародѣев может ожидати, яко лѣть помощь в скорби недужным прияти. Не лститеся, братие! Демон не желает, 10 да кто от правовѣрных здрав долго бывает. Хотѣл бы он в един час вся ны поморити, аще бы аггел божий престал нас хранити. Аще же видится вам нѣчто помогати, лстит вы, да дерзаете болше согрѣшати. 15 На мал час пособствует, да уморит вѣчно, душы вринет в езеро огнем безконечно. Бог врачь есть всеистинный, к нему притекайте, а естественных врачевств не пренебрегайте, — Ибо естества средствы он ся не гнушает, 20 но чрез та силу свою мирови общает. Не право убо дѣют, иже обхуждают врачевства художество и врачы хухнают. Бог врачы и врачевство в ползу сотворил есть, а от чаров пособство проклято судил есть. 25 Лучше убо от скорби вѣрным умирати, неже бабы, шептуны в Помощь призывати. Тако бо отходящым спастися удобно, а от шепт спасение никогда подобно. АКАДЕМИЯ
Платон философии идѣже учаше, Академия то ся мѣсто нарицаше. Трус земли тамо часто обыче бывати, учившымся мудрости страх мног содѣвати, — 5 Им же они к мудрости себе устрояху, яко же учителем заповѣдь прияху. ФИЛОСОФИЯ
1
Философии конец: тако людем жити, еже бы по-силному богу точным быти. 2
Фалес Милеский любомудрец бяше, философию велми похваляше. Нѣции ему словом досаждаху, яко нищь бяше, — мудрость укоряху. 5 Он отвѣща им: „Люблю нищо жити, яко не хощу злату плѣнник быти, Яко вы есте. Аще же потщуся, скоро паче вас аз обогащуся“. Они начаша ему ся смѣяти, 10 рекше: „Не лѣть ти того доказати“. Он паки рече: „Чрез лѣто ми ждите, да мя богата паче вас узрите“. Они во буйство глаголы вмѣняху, истинны слова никогда чаяху. 15 Он же с хитрости то своея знаше, яко в будущ год плод быти хотяше Мног на маслицах; сады откупил есть, тѣм весь маслин плод тогда его был есть, — Иже он собрав, маслом сбогатися, 20 а за то златом велми умножися. И, призвав люди оны, глаголаше: „Знайте, истинно слово быти наше; — Се вы богатствы преодолеваю, но в них утѣхи аз не полагаю. 25 Мудрость ми годѣ, с нею хощу жити, а о богатствѣ не имам мыслити, — Ибо егда ми того восхотѣти, не трудно могу доволи имѣти, Яко же нынѣ видите имуща 30 и впред стяжати множае могуща“. То суперници егда услышаша и богатств много велми созерцаша, Посрамившеся прощение взяху, любомудрие много почитаху. 35 И тому мужу честь многу твориша, елико в мирѣ со гражданы жиша. 3
Естество дает токмо еже жити, философия учит благо жити; Ово со скоты обще нам бывает, сие аггелом нас уподобляет. 4
Диогена человѣк нѣкий вопрошаше, кая с философии ему полза бяше. Он рече: „Доволно мя она совершает, егда всяку премѣну нести наставляет; 5 Аще бы ничто ино могла ми даяти, за то само должно ми ону прославляти“. 5
Аристип вопрошенный: „Что ползы имяше, яко философии весь вѣк прилѣжаше?“ — Отвѣша: „Предоволну ползу обрѣтаю, яко со всяким саном глаголати знаю; 5 Силных аз не боюся, ни пренебрегаю, яже во смирении люди познаваю“. 6
Дионисий мучитель Аристиппу рече: „Кая в философии полза, человѣче? — Зрю, яко философи пред богатых враты часто стоят и в домы их тщатся вхождати“. 5 Аристип отвѣт дал есть: „И врачи то творят, часто в домы богатых человѣков ходят, Но здравия им ползу плоти подаяти, — а философи нравы онѣх исправляти. Никто же болен паче возжелает быти, 10 нежели врачь искусный у человѣк слыти“. 7
Яко врачевство болѣзнь исцѣляет, философиа нрав зол душы исправляет. 8
Пчела мед сладкий из цвѣт собирает, их красотою ся не подвизает; Тако философ тщится собирати, яже и могут добрѣ ползовати, 5 Красная в ничто себѣ вомѣняет, яко та мал вѣтр в ничто измѣняет. ДОСТОИНСТВО
Дѣтищем малым, не разсудным сущым, близ гор высоких дѣтски играющим, Видится небо на горѣ лежати и оверх ея солнце путь свершати. 5 Тѣмже стремятся на ню восходити, да бы близ солнца и небесе быти, Еже бы персты оным ся касати, каково небо есть и солнце знати. Елма же взидут на верх горы тоя, 10 суетны мысли видят быти своя, — Ибо ту знают, яко ся прелстиша, на горѣ небо егда быти мнѣша. Мысленнѣ гора — всяко достоинство, честь высокая и мироначалство; 15 Тѣх лишеннии, елма возглядают на высоту их, умом помышляют, Яко на них есть блаженство небесно, душевное же купно и тѣлесно, И в чести сущих мнят в небеси быти, 20 яко аггелы безпечално жити. Ризам их свѣтлым, спирѣ раб дивятся, красным полатам и пиром чюдятся, Смотрят на славу и глаголют в себѣ: „Ей, сии в мирѣ живут, яко в небѣ. 25 О, кто бы нам дал на ту гору взити, тако блаженным, яко они, быти! Пожили быхом свѣтли и весели, яко же живут в небеси аггели“. К таким же мыслем дѣло прилагают. 30 на гору чести труды полагают, Всякими средствы достигнути тщатся, имѣнием же и здравством томятся. И елма тако взидут на верх ея, постигнут хоти сбытие своея, 35 В то времи знают, яко ся прелстиша, егда блаженство ту быти судиша. Тогда искусят, что блаженни быша, елма в юдоли мирно, лѣпо жиша. Ту бо печали многи досаждают, 40 ту в своих скорбех людие стужают, Ту многа бѣдства, зависти и ковы, вражды и нужды, не объятны словы. А болѣзнь равнѣ тѣло грѣшно томит, и смерть, яко вѣтр прежде древо ломит, 45 Еже на горѣ стоит вознесенно, потом в юдоли еже есть смиренно. Тогда бы ради возврат сотворили, в юдоли паче, неже в верху жили; Но человѣческ срам я побѣждает, 50 до конца в тузѣ жити понуждает. Кто либо убо лишен еси чести, не тщится ея высоты долѣзти. Вѣру ми ими, уне тако быти, аще хощеши безьскорбно пожити. 55 И спасенно же: ибо ничто тебѣ препону дѣет еже быти в небѣ. О началных же святый Златоусты своими рещи изволил то усты: „Чюждуся, аще спасен может быти 60 кто от началных и на небо взити“. Аще же тако: Здравствуй, о начало, нѣсть ми с тобою дѣло ниже мало! К небеснѣй горѣ хощу аз творити путь, да бы на ней во вѣк вѣков жити. РАЗУМ
Разум есть прешедшая добрѣ разсуждати, настоящая паки благоустрояти, Еще предвидѣние будущих имѣти, — сих дѣлес не творяют, иже умом дѣти. МЫСЛЬ
Еже корень есть в древѣ, то мысль в человѣцѣ, обое же есть тайно в настоящем вѣцѣ. Корень есть под землею, не видим бывает; мысль в глубинѣ есть сердца, никто ея знает. 5 Но яко что в корени от силы таится, то послѣжде во вѣтвѣх и в плодѣх явится; Тако что сокровенно во мысли пребудет, то по малѣ во дѣлѣх проявленно будет. Тѣмже кто древо плодно имѣти желает, 10 да здрав корень пребудет, тощно промышляет; Тако хотяй сам плоды благи приносити, да тщится в сердцѣ мысли добрыя хранити: От добрых бо помыслов дѣлеса благая производна бывают, от злых паки злая. УЧИТИСЯ И УЧИТИ
Их же не вѣмы, тым ся нужда есть учити, яже вѣмы, та иным вѣрно изъявити. ЧАСТОСТЬ
Не сила капли камень пробивает, но яко часто на того падает; Тако читаяй часто научится, аще и не остр умом си родится. ПРЯ
Елма словопрѣние начинает быти, ты же хощеши правый побѣдитель быти, — Побѣди прежде тебе, потщися молчати, тако скоро можеши побѣду прияти; Вси бо тя мудра, кротка станут нарицати, спорници прощения смиренно желати. ВРЕМЯ
1
Всяческое дѣло время устрояет, безвремение же оно истребляет. Добро есть во ино время глаголати, во ино же лучше слово удержати. 2
Преступство, егда требѣ есть слова, молчати и в молчания время слово разширяти. 3
Воин в потребно время мечь свой извлекает, в таково же язык твой слово да вѣщает. НЕВѢЖДА
Невѣжда пути вожд да не бывает, книг неискусный да не поучает. Невежда мудраго елма поучает — слѣпец очитаго провождает. 5 Сова о лучах солнца разсуждает, егда невѣглас о мудрых вѣщает. КЛЕВЕТНИК
Пѣтель ногами обыче копати землю и пищи в ней себѣ искати. И аще злату цату ископает, со молчанием ону презирает. 5 А случится червя ископати, кричит и тщится кокоши призвати. Равнѣ клеветник доброты честныя презрѣнны имат, что цаты златыя. А черви грѣхов аще усмотряет, 10 всякое око зрѣти призывает. О злобы люты! Яже таителна явленна творит: таит явителна. ДРУГ
1
Хощеши друга истиннаго знати, послушай мало, имам ти сказати. Друг есть, иже тя в грѣсѣх обличает и злонравие твое обхуждает. 5 Друг есть, заочно тебе ублажаяй, а в лице правду выну ти вѣщаяй. Друг, иже в нуждѣ тебѣ помогает, во день печали тщиво утѣшает. Друг, иже за тя готов изтрошати, 10 яже изволил господь ему дати. Друг, иже к благим дѣлом увѣщает, а в злых ни мало помощник бывает. Друг, кто от благих твоих веселится, о злых случаех купно печалится. 15 Друг, иже в скорби время не оставит и неизмѣнну любовь си проявит. Сицева друга требѣ есть искати, паче сокровищ богатых стяжати. Стяжаннаго же истинно любити 20 и взаим добро оному творити. 2
Егда краснотеплыя весны дни сияют, в то время ластовицы с нами пребывают: Гнѣзда лепят на домѣх, сладко воспѣвают, — зимѣ же приближшейся, от нас отлѣтают. 25 Точнѣ дѣют лжедрузи, ибо есть доколѣ благо кому щастие, дружатся дотолѣ. Блажат, служат, а егда щастие мѣнится, тогда лжедругов любы к иным отвратится. МИЛОСТЬ ГОСПОДСКАЯ
1
От господ милость трудно есть стяжати, труднѣе того выну ону знати, Ибо во скорѣ та ся измѣняет и множицею в гнѣв ся прелагает. 2
5 Аще у муж велможных есть благодать тебѣ, употребляти ея всеопасно требѣ: Яко со огнем, с ними есть полезно жити, — ниже ся удаляти, ни велми близ быти. Огня удаляяйся озноблен бывает, 10 а близ зѣло сущыя сам огнь опаляет. Тако иже от господ себе удаляют, презрѣнни и безчестни у онѣх бывают; Иже паки дерзают ближитися зѣло, мало за дерзость свою до конца суть цѣло. 15 Средство убо в житии сем хранити требѣ, иже хощет безбѣдства и дружбы их себѣ. СЛОВО
Птицу из клѣтки скоро мощно испустити, но труд есть паки в тужде ону возвратити. Точнѣ без труда слово из уст ся пущает, но никоим образом воспят ся вращает. 5 Егда убо хощеши нѣчто глаголати, потщися прежде оно умом разсуждати, Да не како печаль ти велику содѣет, егда в ушесѣх людских вездѣ ся разсѣет. ВОЗДЕРЖАНИЕ
Воздержание аще безмѣрно храниши, множицею души ти вред велий твориши: Плоти бо изнемогшей ум не добр бывает, — разсуждение в мѣру вся да устрояет. 5 Уне есть мѣрно по вся дни вкушати, нежели долго от пищ ся держати: Пост бо безмѣрный силу истребляет, дух уныния и печаль раждает. СОГЛАСИЕ
1
Камень фирреос, егда цѣл хранится, плавает верху вод, а не грузится. Той же, на части малы сокрушенный, во водѣ тонет, аки отягченный. 5 Тако община, аще есть согласна, не убоится случая напрасна; Аще же в разны части раздѣлится, крѣпости праздна, в скорѣ разорится. 2
Скиф нѣкто умный, богатый сынами, при концѣ жизни даде тул с стрѣлами, Повелѣвая им той преломити, — но не могоша того сотворити. 5 Таже особно комуждо си сыну, еже ломити дал стрѣлу едину. Удобно тии стрѣлы преломиша, нимало труда к тому приложиша. Тогда ко чадом отец возглашает, 10 еже согласно жити увѣщает. „Аще союзни будете, — вѣщаше, — не преломимо странство будет ваше; Аще же союз будет разрѣшенный, удобь от врагов будете сотренны“. СЛОВА НЕСЛУШАНИЕ
Слон нелѣполичный и велбуд горбатый имеют обычай естеством завзятый, Еже внегда воду оным чисту пити, первѣе ногами ону возмутити. 5 Се негли того ради содѣвают, да нелѣпия си в ней не созерцают. Подобнѣ людие злие препинати слово обыкоша и книг не читати, Да худоличия си не усмотряют 10 и злых дѣл не видят, яже содѣвают; Затыкают уши, да бы не слышати, яже проповѣдник хощет обличати. ЯЗЫК
Малая часть тѣлесе язык человѣка, но не видѣ злѣйшия никтоже от вѣка, Ибо аще малое слово изпущает, хулно или клеветно, многи убивает. 5 Легко оно исходит, но язву велику и зѣло тяжку в сердцѣ дѣет человѣку; Мягко аер проходит, но в сердцѣ жестоко вонзает ся и рану творяет глубоко; Из уст, яко же птенец малый, излѣтает, но яко велбуд с горбом абие бывает. И ни кими мѣрами может ся сокрити, вѣсть же сердца человѣк многих озлобити. Убо разсудно слово всякое пущайте, да не будет стрѣлою, прилѣжно смотряйте; 15 Аще бо яко стрѣла пойдет, то вратится не к языку, но в сердце и в смерть преложится. ВИНО
Вино хвалити или хулити — не знаю, яко в оном и ползу и вред созерцаю. Полезно силам плоти, но вредныя страсти возбуждает силою свойственныя сласти. 5 Обаче дам суд сицев: добро мало пити, тако бо здраво творит, а не вѣсть вредити; Сей Павел Тимофею здравый совѣт даше, той же совѣт да хранит достоинство ваше. ДЕНЬ И НОЩЬ
1. Денница
Темную нощь денница свѣтла разсыпает, красным сиянием си день в мир впровождает, Нудит люди ко дѣлу: ов в водах глубоких рибствует, ов в пустынях лов дѣет широких, 5 Иный что ино творит. Спяй же на день много бѣднѣ, раздраноризно поживет убого. 2. Полудень
Оже средѣ небесе солнце бѣг свой дѣет, палит нивы, а скоты лучми зѣло грѣет, Иже в сѣни при водах от трудов хладятся, 10 жнеци пищею и сном по трудѣх крѣпятся, — Так естество отчески строит еже быти, закон всѣм пишет вещем нуждный сохранити. 3. Вечер
Як заря день вѣщает, так нощь вечер вводит, в хлѣвину си скот идет, орач в дом приходит; 15 Рало оставив, хлѣбом стомах укрѣпляет, утружденныя силы пищми обновляет; Таже сном сладким плоть си покоит стружденну, — сон бо богом дадеся в покой труду дневну. 4. Нощь
Нощь мрачная тму страшну на землю наводит, 20 извѣты часто, злобы и поводы родит В готовых на вся злая, что злый ум вмѣщает. Обаче своя игры, утѣхи нощь знает; Временем есть полезна; но мудр сый блюдется тмы нощныя, день любит, да в ней не преткнется. ПСАЛТЫРЬ РИФМОТВОРНАЯ
Царь Давид. Фронтиспис „Псалтыри“ Симеона Полоцкого.
Грав. А. Трухменсхий по рисунку С. Ушакова. Москва, 1680.
1
Блажен муж, иже во злых совѣт не вхождаше, ниже на пути грѣшных человѣк стояше, ниже на сѣдалищѣх восхотѣ сѣдѣти тѣх, иже не желают блага разумѣти, — 5 Но в законѣ господни волю полагает, тому днем и нощию себе поучает. Будет бо яко древо, при водах сажденно, еже дает во время си плод свой неизмѣнно; Лист его не отпадает; — и все, еже дѣет, 10 по желанию сердца онаго успѣет. Не тако нечестивый, ибо исчезает яко прах, его же вѣтр с земли развѣвает. Тѣмже нечестивии не имут востати на суд, ниже грѣшницы в совѣт правых стати. 15 Вѣсть бо господь путь правых, тыя защищает путь паки нечестивых в конец погубляет. 34
Суди, господи, мя обидящыя, возбрани, боже, мене борющыя, невинна суща. Возми мечь и щит, стани в помощь мою; 5 взем оружие, яви милость твою, запни гонящих. Рцы души моей: Аз есмь твой спаситель! Сотвори, да всяк оныя гонитель посрамлен будет. 10 Злаго ми любцы вспять да возвратятся, яко пред вѣтром прах, да расточатся в разныя страны; аггел господень их да оскорбляет, аггел господень их да погоняет 15 в тмѣ путем ползким, яко ми сѣти пагубы сокрыша и души моей всуе поносиша зѣло досадно. Ея же не вѣсть, в сѣть враг да впадется, 20 в ловитву, юже сокры, да вплетется за свою прелесть. Душа же моя да возвеселится о бозѣ спасѣ, яко свободится от сѣти ловчи. 25 Вся моя кости рекут: Живый в небѣ боже, кто и гдѣ есть подобен тебѣ в милосердии? Ты нища из рук крѣплших избавляяй, от хищных врагов мене свобождаяй, 30 сам един еси. Лжесвидѣтели на мя клеветаху, их же не вѣдѣх, мене вопрошаху, да мя погубят. За мою благость воздаша ми злая, 35 душу загнаша в мѣста неплодная, да гладом таю. А внегда они стужаху ми зѣло, смирях дух постом, а вретищем тѣло, да господь призрит. 40 Молитва моя в нѣдра ми вратися, господь всещедрый милостив явися за смирение. Яко ближнему тщахся угождати, яко о братних случаех рыдати, — 45 тако смиряхся. Они же на мя собор сотвориша со веселием, раны ми мыслиша, аз аки не чух. От любве должны вси раздѣлишася, 50 оней же злобѣ не умилишася, братия суще. Подражнением лютѣ мя дражниша, искусиша мя и скрежет твориша зубы своими. 55 О господи мой! Когда то узриши и душу мою благоустроиши от их злодѣйства? Иже, яко льви гладнии, рыкают, единородну мою умышляют 60 зубы терзати. Аз в церкви мнозѣ тя исповѣдати имам и в людех тяжцѣх восхваляти за милость твою. Врагом, без правды ненависть имущым 65 на мя, очима си помизающым, не даждь радости, Яко мнѣ убо мирно глаголаху, а в сердцѣх лести на гнѣв помышляху, да мя погубят. 70 Уста си на мя лютѣ разширяху, „благо же, благо видят — глаголаху — очеса наша“. Ты сия видѣв, да не премолчиши, боже, от мене да не отступиши, 75 во скорби суща. Востани, боже, сотвори суд правый, господи, зри прю, даждь суд, — да лукавый не веселится, да в сердцѣх своих о мнѣ не вѣщают: 80 „благо нам, благо“, ни да обѣщают: „уже пожрем и“. Срам да обымет и да постыдятся вси врази вкупѣ, иже веселятся о злых ми сущих. 85 В студ и срамоту да суть облечени, иже великим хулам изучени мнѣ глаголати. Иже по моей правдѣ поборают, веселие и радость да познают 90 во сердцѣх своих. Иже ми мира желают от бога выну да поют: Буди слава многа господу богу! Аз же языком правду ти хвалити 95 моим и славу имам возносити в мирѣ на всяк день.
Нотная „Псалтырь“ Симеона Полоцкого конца XVII века.
Рукопись Московского Гос. исторического музея, собр. Уварова, № 760/2166, л. 3 об.
103
Душе моя, господа да благословиши! Господи, коль велик ты и страшён ся зриши! Во славу и лѣпоту еси облеченный, яко ризою, свѣтом многим обвиенный, 5 Ты небо, яко кожу, изволи пропяти, превыспрняя водами своя покрывати, Ты в восхождение ти еси полагаяй облаки и онѣма аер претекаяй. На крилѣх скоротечна вѣтра ты ходиши, 10 невещественны духи аггелы твориши, — И во видѣ паляща огня служат тебѣ раби твои, иже тя пѣснословят в небѣ. Тобою на тверди си земля основанна, и во вѣки не будет та поколебанна. 15 Ону, яко же риза, бездна одѣваше, и на горах высоких вода вездѣ бяше. Но запрещением ти воды низпадоша, на глас грома твоего в море низтекоша;, Горы быша велия, поля ся постлаху, 20 идѣже основу си и мѣсто прияху. Предѣл водам изволил еси положити, его же не возмогут вѣчно преступити. Ни обратятся паки землю покрывати, но в ложах своих имут во вѣки стояти. 25 Во дебрѣх источники, боже, изводиши и посредѣ гор воды обилны точиши, Да вся звѣри селныя в жаждѣ напаяют и онагров притекших жажду утоляют. К тым небесныя птицы тщатся прилѣтати, 30 в каменех поющыя жажду утоляти. Тобою от превыспрних горы пиют воды, земля ся насыщает дѣлес твоих плоды. И сыта сущи, пажить скотом прозябает, траву людем во службу и хлѣб в пищу дает; 35 Вино во веселие человѣком родит, елей лице мастити, хлѣб во крѣпость плодит. Тѣми древа польная себе насыщают и кедри ливанстии вѣтви оживляют; Иже саждение суть твоея десницы, 40 в их же зеленых вѣтвѣх гнѣзда виют птицы; Ту и еродий свое гнѣздо полагает, иже яко вождь птицам всѣм оным бывает. Еленем высокия горы прибѣжище; камень паки заяцем малым пристанище. 45 Ты в знамение времен луну создал еси, солнце тобою запад вѣсть свой на небеси. Дал еси тму, и бысть нощь: в ней же претекают, звѣрие дубравнии, пищу уловляют; Скимни исходят, да бы звѣря похитити 50 рыкают, от бога снѣдь себѣ испросити. Солнцу же возсиявшу, паки ся сбирают и, шедше в ложа своя, сыти возлегают. Тогда человѣк дѣло исходит творити и даже до вечера в трудѣх своих быти. 55 О, коль велия дѣла, тобою явленна, вся суть мудростию ти, боже, сотворенна! Земля твари твоея вездѣ исполнися и море пространное с нѣдры сотворися; В нем же безчисленнии гади преплавают, 60 малая с великими, по водам играют; Ту корабли плавают и змий лют играет, иже от малых рыбиц ругаемь бывает. Вся же сия от тебе, боже, пищи чают, юже во благо время данну получают; 65 Иная собравше ю тщатся сохранити, да бы во будущее время сытым быти. Отверзшу тебѣ руку — благ ти исполнятся вся; отвращшу же лице твое — возмутятся; Аще отимеши дух, — вся та исчезают 70 и в персть, из нея же суть, паки ся вращают; Пославшу же ти дух твой, — все ся созидает и лице земли свѣтлость свою обновляет. Буди убо господня слава безконечно, возвеселится господь в дѣлѣх своих вѣчно! 75 Иже егда на землю свыше призирает, трястися ей пред лицем своим сотворяет; А егда ся высоким горам прикасает, тогда множество дыма на них возкуряет. Воспою господеви аз богу моему, 80 дондеже имам жити, пою славу ему. Токмо бесѣда моя ему да сладится, а дух мой о господѣ превозвеселится. Да исчезнут от земля злобнии грѣшницы, да ктому ниже будут вси беззаконницы. 85 Ты же, о душе моя, потщися хвалити господа, дондеже ти во существѣ быти. 132
Се что толь добро или красно зрится, яко в братии аще сохранится любовь правая: еже вкупѣ жити, друг друга чтити. 5 Яко же миро благовонно бяше, еже со главы на браду схождаше Ааронову и на риз ометы прекрасных цвѣты. И яко роса, яже Аермона 10 плоднаго творит и гору Сиона благополезна: тако есть благая любы святая. Ибо идѣже та ся обрѣтает, ту вся благая господь посылает 15 и благословит жити человѣки долгия вѣки.
