Домострой

ДОМОСТРОЙ

ГЛАВА 1

НАКАЗАНИЕ ОТЦА К СЫНУ

Благословляю аз многогрешный (им. рек) и поучаю и наказую и вразумляю единочадаго сына своего, (им. рек) и его жену, и их домочадцев быти во всяком христианском законе, и во всякой чистей совести и в правде; с верою творяще волю Божию, и храняще заповеди Его; себе утвержающе во всяком страхе Божии и в законом жительстве; и жену поучающе, тако ж и домочадцев своих наказующе не нуждою, ни ранами, ни работою тяжкою; имеюще яко дети, во всяком покое, – сыты и одеты, и в теплом храму и во всяком устрои. И вдаю вам христианскому жительству писание на память и вразумление вам и чадом вашим. Аще сего моего писания не внемлюще, и нашего наказания не слушаете, и по тому не учнете жити, и не тако творити, якоже есть писано, – сами за себя ответ дадите в день страшнаго суда; а аз вашим винам, и греху не причастен, кроме моея душа; аз о всяком благочинии благословлял, и плакал и молил, и писание предлагал; и аще восприимете сие мое худое учение и грубое наказание со всею чистотою душевною и прочитая, прося у Бога милости и помощи и разума поелико возможно, как вас Бог вразумит и начнете делом творити вся сия: будет на вас милость Божия и пречистыя Богородицы и всех святых и наше благословение от ныне и до веку; и дом ваш, и чада ваши, и стяжание ваше, и обилие, что вам подаровал Бог от нашего благословение и от своих трудов да будет благословенно во всяких благих во веки аминь.

ГЛАВА 2

КАКО ВЕРОВАТИ ХРИСТИАНАМ ВО СВЯТУЮ ТРОИЦУ, И ПРЕЧИСТУЮ БОГОРОДИЦУ, И КРЕСТУ ХРИСТОВУ И СВЯТЫМ НЕБЕСНЫМ БЕЗПЛОТНЫМ СИЛАМ[1] И ВЕЛИКОМУ ВО ПРОРОЦЕХ ИОАННУ ПРЕДТЕЧИ[2] И ВСЕМ СВЯТЫМ И ЧЕСТНЫМ[3] ИХ МОЩЕМ ПОКЛОНЯТИСЯ

Подобает убо всякому христианину по Бозе жити, в православной вере християнской. Первое убо: от всея душа и от всего помышления и всеми чювствы, теплою верою веровати во имя Отца и Сына и святаго Духа в неразделимую Троицу; и в воплощение Господа нашего Исуса Христа сына Божия веруй. Рождьшую его матерь – Богородицу нарицай; Кресту же Христову с верою покланяйся, яко на том, всем человеком[4] спасение содела Господь; иконе же Христове, и пречистой его матери, и Святым небесным безплотным силам, и всем святым честь верою воздавай; яко самем любовь[5] в молитве ее глаголи, и поклонение твори, и на помощь к Богу призывай их; мощи ж Святых с верою целуй и покланяйся им.

ГЛАВА 3

КАКО ТАЙНАМ БОЖЬИМ ПРИЧАЩАТИСЯ И ВЕРОВАТИ ЯКО БУДЕТ В0СКРЕСЕНИЕ МЕРТВЫМ, И СТРАШНАГО СУДА ЧАЯТИ, И КАКО КАСАТИСЯ СВЯТЫНИ ВСЯКИЯ

Тайнам Божьим веруй, телу и крови его верою[1] причащайся и со страхом, на очищение и на освящение души[2] и телу и во оставление грехов и во жизнь вечную. Веруй быти воскресению мертвых и жизни будущаго века. Помяни страшный суд и воздание по делом будет нам; аще когда преочистив себе духовне, в чистей совести коснутися и с молитвою и молением целовати животворящий крест, и Святыя, честныя и чюдотворныя образы, и многоцелебныя мощи: по молении прекрестяся поцеловати дух в себе удержав, а губаше не плескати[3]. А благоволит Бог[4]причаститися Божественных[5] тайн, ино лжицею, от иерея приемля во уста опасно: губами не сверкати, руце имея ко персем согбени крестообразно[6], а дора, и просфира, и всякая святая вкушати бережно с верою и со страхом, крохи на земь не уронити, а зубом[7] не кусати, яко же прочии хлебы; уломываючи кусовцем[8], класти в рот, а ясти зубами[9] и ртом не плескати[10], а просфиры с вологою не ясти токмо вода прихлебывати[11] или вина служебнаго в укроп прибавити; а иного ничего не примешивати, а преж всякия ествы вкушается[12] просфира в церкви или в дому; а с кутиею ни како ж просфиры[13] ни каноном, и ни с какою вологою не вкушати; ни на кутию просфиры не класти. Аще с кем о Христе целование сотворити, також – дух в себе удержав поцеловатися; а губами не плескати, поразсуди человеческия немощи, нечювственаго духа гнушаемся хмелнаго, чесночнаго, болнаго и всякаго смрада; толь[14] мерзко Господеви наш смрад и обоняние; сего ради со опасением сие творите.

ГЛАВА 4

КАКО ЛЮБИТИ ГОСПОДА ОТ ВСЕЯ ДУША; ТАКОЖ И БРАТА СВОЕГО И СТРАХ БОЖИЙ ИМЕТИ И ПАМЯТЬ СМЕРТНУЮ

По сем же возлюби Господа Бога своего от всея душа своя и от всея крепости своея; и подвигни вся дела твоя и обычаи и нравы угодная творити[1] Господеви. Паки же искреняго си возлюби: и всякаго человека по образу Божию созданнаго, рекше: всякого христианина. Страх Божий всегда имей в сердце своем и память смертную и любовь не лицемерную ко всем; всегда волю Божию твори и по заповедем его ходи. Рече бо Господь: в чем тя застану, в том тя и сужду; того ради достоит всякому[2] готову быти в добрых делех; в чистоте и в покаянии, и во всяком исповедании, всегда чающе часа смертнаго[3]. О том же. Возлюби[4] Господа от всея душа и страх его да будет в сердце твоем; праведен буди и истен[5] и смирен; очи долу понича, ум же к небеси простирая, умилен к Богу, и к человеком приветлив. Печалнаго утеши; терпелив в напастях, и недосадитель всякому человеку, – щедр и милостив; и нищим кормилец[6], и странноприемник; скорбен греха ради[7]; весел о Бозе; алчен буди от обядения и жажден ото пьянства; кроток не славохотен[8] не златолюбец, но друголюбец; не горд; боязнив пред царем, готов в повелении его; во ответех сладок; частомолитвенник; разумен трудник к Богу, и не осудник всякому человеку; поборник обидимым; нелицемерен; чадо Евангелия; сын воскресения; наследник будущия жизни о Христе Исусе Господе нашем[9], ныне и присно и во веки веком аминь.

ГЛАВА 5[1]

КАКО ЦАРЯ ИЛИ КНАЗЯ ЧТИТИ И ПОВИНОВАТИСЯ ИМ ВО ВСЕМ И ВСЯКОМУ ВЛАСТЕЛЮ ПОКАРЯТИСЯ И ПРАВДОЮ СЛУЖИТИ[2] ВО ВСЕМ И К БОЛШИМ, И К СРЕДНИМ[3], И К СКОРБНЫМ И МАЛОМОЩНЫМ, И КО ВСЯКОМУ ЧЕЛОВЕКУ, КАКОВУ БЫТИ, И СЕБЕ О ВСЕМ ВНИМАТИ

Царя бойся и служи ему верою, и всегда о нем Бога моли, и ложно отнюдь не глаголи пред ним; но с покорением истину отвещай ему, яко самому Богу, во всем повинуйся ему. Аще земному царю правдою служиши, и боишися его, тако научишися и небеснаго Царя боятися: сей временен есть, а небесный[4] безначален и безконечен и судия не лицемерен: и воздаст комуждо по делом его. Також и князем покаряйся, и должную честь воздавай им, яко от него посланым, во отмщение злодеем, в похвалуже добродеем. Князю своему прияй[5] и властелем своим, ни по мысли нань зла. Глаголет Павел апостол: вся владычества от Бога учинена суть: да – аще кто противится властелем, то Божию повелению противится. А царю и князю и всякому велможе не тщися служити лжею и клеветою и лукавстом; погубит Господь вся глаголящая лжу. Аще[6] ропотники[7][8] и клеветники от народа прокляти суть. Старейшем себе честь воздавай, и поклонение твори; средних яко братию почитай; маломощных и скорбных любовью привечай[9], и юнейших яко чада люби, и всякому созданию Божию не лих буди. Славы земныя ни в чем не желай[10] вечных благ[11]проси у Бога; всякую скорбь и тесноту со благодарением терпи; обидим не мсти; хулим моли; зла за зло не воздавай; ни клевет за клевету; согрешающая не осуждай; воспомяни своя грехи и о тех крепко пекися; злых мужей совета отвращайся буди ревнитель правоживущим[12] и тех делания написуй в сердцы своем, и сам тако же твори.

ГЛАВА 6

КАКО ЧТИТИ ДЕТЕМ ОТЦА ДУХОВНАГО И ПОВИНОВАТИСЯ ИМ ВО ВСЕМ

Подобает делати[3] и се: како чтити детем отец своих духовных. Изыскати отца духовнаго добра, и боголибова, и благородна, и разсудительна, а не потокалника, ни пьяницу; ни сребролибива, ни гневнивлева; тако да убо подобает чтити и повиноватися ему во всем; и каятися пред ним со слезами; и исповедати грехи своя безстыдно и безсрамно; и заповеди его хранити и епитемию исправляти противу греха. А призывати его к себе в дом часто и к нему приходити и извещатися ему всегда, во всякой совести; и наказание его с любовью приймати, и послушати его во всем, и чтити его и бити челом пред ним ниско; он учитель наш и наставник и имети его со страхом и любовью; и к нему приходити, и приношение ему давати от своих плодов и трудов по силе; и советовати с ним часто о житии полезном, и востязатися грехов своих и како учити и любити мужу жену свою, и чад, и раб, а жене мужа своего слушати и спрашиватися по вся дни; и извещатися о гресех своих всегда пред отцем духовным и обнажити грехи своя вся, и покорятися пред ним во всем; тии бо бдят о душах наших и ответ дадут о нас в день страшнаго суда; а не поносити, ни осуждати, ни укоряти и о ком учнет печаловатися ино его слушати ино виноватого пожаловати по вине смотря с ним же разсудя[4].

ГЛАВА 7[1]

КАКО СВЯТИТЕЛЬСКИ ЧИН ПОЧИТАТИ ТАКОЖ И СВЯЩЕНИЧЕСКИЙ И МНИШЕСКИЙ[2] И ПОЛЗОВАТИСЯ ОТ НИХ; О ВСЯКИХ СКОРБЕХ ДУШЕВНЫХ И ТЕЛЕСНЫХ ИЗВЕЩАТИСЯ

К святительскому чину всегда прибегай, и должную честь воздавай им; благословения и духовнаго поучения требуй от них; и припадай к ногам их и во всем повинуйся им по Бозе; також священническому чину и мнишескому велию веру, и любовь, и повиновение и всякое покорение пред ними имей; и духовную ползу от них внимай[3], а о недоразумных[4] и о душевных совестех и о всяких греховых винах, без всякого зазору спрашиватися у них; и аще некокая скорбь посетить тя душевная или телесная, или болезнь, или какой недуг, или пожар, и потоп, или татба, или разбой, или царьская[5] опала, или властелин гнев, или поклеп, или оговор, или продажа зла, и всякая неизбытная печаль[6], – о всех сих не отчайся; воспомяни своя предняя согрешения; еже зла содея к Богу и человеком, и пролей теплыя слезы милостивому Владьще и Пречистой Богородице и ко всем Святым; и прибегни к необоримому пристанищу, к сим духовным наказателем исповеждь своя согрешения, скорбь, со умилением, и со слезами и сокрушением сердечным: могут тя уврачевати во всяких скорбех и духовную[7] ползу даровати; а еже повелят ти сие твори от божественнаго исправления[8] тии бо суть слуги и молебники небеснаго Царя; имеют дерзновение у Господа просити добрых и полезных душам и телом нашим, и оставления грехов и жизни вечныя.

ГЛАВА 8[1]

КАКО ВРАЧЕВАТИСЯ ХРИСТИАНОМ ОТ БОЛЕЗНЕЙ И ОТ ВСЯКИХ СКОРБЕЙ[2], ЦАРЕМ И КНЯЗЕМ И ВСЯКИМ ЧИНОВНИКОМ, И СВЯТИТЕЛЬСКОМУ ЧИНУ, И СВЯЩЕННИЧЕСКОМУ И МНИШЕСКОМУ, И ВСЕМ ХРИСТИЯНОМ

Аще Бог пошлет на кого болезнь или какую скорбь ино врачеватися Божьею милостью, да слезами и молитвою, и постом, и милостынею к нищим, да истинным покаянием; да благодарение и пощение и милосердие и нелицемерную любовь ко всякому; аще кого чем преобидел отдати сугубо и впредь не обидети; да отцев духовных и всяк священнический чин и мнишеский подвизати на моление к Богу; и молебны пети и вода святити честным и животворящим крестом[3] и со святых мощей и чюдотворных образов; и маслом святитися, да по чюдотворным по святым местом обещеватися, и, приходяще молитися со всякою чистою совестию; тем целба всяким различным недугом от Бога получити, да от всяких грехов удалятися, и впредь никакова зла не творити: и отцев духовных заповеди хранити и епитемии исправляти, тем очиститися от греха, и душевная и телесная болезнь исцеляти, и к Богу молитва сотворити[4]. Всякому христианину целити себя от всяких различных недугов душевных и телесных, и душетленных, и болезненных страстей; – жити по заповеди Господни, и по отеческому преданию и по христианскому закону; якож в начале писано книги сея от первая главы вся пятьнадесять глав и прочая главы книги сея також[5] прочести, и внимати, и творити достоит. Ино Богу угодит, и душу спасет, и греха избудет и здравие получит душевное и телесное, и вечных благ наследних будет. А кто безстрашен и безвинен[6] страха Божия не имеет, и воли Божии не творит, и закона християнскаго и отческаго предания не хранит, о церкви Божии, и о церковном пении и о келейном правиле, и о молитве и о всяком славословии Божии не радит, яст[7] и пиет без воздержания, и во обядение и пьянство, и не в подобно время, и законнаго жительства не хранит; недели воскресения Христова и среды и пятка и праздников не почитает и великаго поста и Богородична непостится; без воздержания блудит, и не в подобно время, и чрез естество, и чрез закон, или от жен своих блудят, или содомский грех содевают, и всякое скаредие творят, и всякия богомерзския дела: блуд, нечистоту, сквернословие, срамословие, песни бесовския, плясание, скакание, гудение, трубы, бубны, сопели, и медведи и птицы и собаки ловчия, творяще конское уристание, всякое бесовское угодие и всяко безчиние и безстрашие; к семуж чарование и волхвование, и наузи, и звездочетие, рафли, алманахи, чернокнижие, воронограи[8], шестокрыл, стрелки громныя[9], топорки, усовники, два камение[10], кости волшебныя; и иныя всякия козни волшебныя бесовския; или кто чародейством, и зелием, и корением, и травами на смерть, или на потворство окормляет, или бесовскими словами и мечтами и кудесом чарует на всякое зло и на прелюбодейство; или клянется именем Божьим во лжу, или клевещет на друга, також прочести и двадесять шестую[11] главу. В тех во всех делех, и во обычаех, и нравех востает в человецех гордость, ненависть, злопомнение, гнев, вражда, обида, лжа, татба, клятва, срамословие[12], чарование, и волхвование, смех, кощуны, обядение, пьянство безвременное рано и поздно и всякая злая дела, и всякий блуд и всякая нечистота. И благий человеколюбец Бог, не терпя в человецех таких злых нравов и обычаев, и всяких неподобных дел, яко же чадолюбивый отец скорбми и бедами спасает, и ко спасению приводит; показуя[13] наказует[14] за премногия грехи наша, смерти же не придает, не хощет смерти грешником, но ожидает покаяния, еже обратитися и живу быти ему. Аще не обратятся и не покаются от злых дел, наводит на нас, грех ради наших: овогда мором, овогда гладом, овогда пожар, овогда потоп, овогда пленение и посечение от поганых, и градов разорение и церквам Божьим и всякой святыни потребление, и всякому стяжению расхищение и от другов оклеветание, овогда от царьскаго гнева разграбление имению и самому казнь без милости и паличная[15]смерть, и от разбойников[16] убийство и грабеж, и от татей окрадение, и от судей продажа и мучение, ово бездождие, ово безвременный дождь[17], и нестройны лета, и неугодна зяма, и лютые мразы, и земли безплодие, и всякому скоту животному падеж, и зверем, и птицам, и рыбам и всякому обилию скудость; родителем, жене и чадом нужными и напрасными и скорыми смертьми лишение; от многоразличных и нужных и тяжких недуг страдание[18]. Многи[19] убо праведницы истинно Богу работают, по заповедем Господним живут межу нами грешными; но на сем свете равно со грешники казнима суть от Бога, да светлейших венцов от Бога сподобятся, нам же грешным на большее мучение, яко праведницы казними быша всякими скорбьми за наше беззаконие[20] и о всех сих настоящих бедах не уцеломудримся и не накажемся в покояние, и в чювство, и в страх Божий не внидем, видя таковаго праведнаго гнева Божия наказания за премногия грехы наша. И паки Господь, наказуя ны, и обращая к покаянию, яко же праведнаго и долготерпеливаго Иова искушая, посылая различныя скорби, и болезни, и тяжкия недуги от духов лукавых мучими, телу согнитие, костем ламота, оток и опухоль на все уды, проходом обоим заклад, и камень в удах[21], и кила и тайным удом согнитие и отоки[22] и глухота, и слепота, и немота; во утробе терзание и блевание злое; и на низ во оба прохода и кровь и гной, сухотная, и кашель и главоболие[23] и зубная болезнь, и грыжа, и усови, и камчюг и френьчюг, и разслабление и трясение[24], и желви, и железы, и шелуди, и горбы, и глава, и щеки, и руки и ноги закорчены, и очи искривлены[25] и всякие тяжкие различные недуги наказание гнева Божия. И сия вся презрехом и в покояние не внидохом; ничто же не уцеломудри нас и не устраши нас, и накажемся о сем, видя Божье наказание на себе и болезни тяжкие, за премногия грехи наша. Оставя Бога создавшаго ны, и милости, и прощения грехов от него не требуя, еже зле содеяхом, и приступихом к нечистым бесом от них же отрекохомся во святом крещении, и всех дел его и призываем к себе чародеев, и кудесников, и волхвов и всяких кудесников[26] и зелейников и с корением: от них же чаем душетленныя помощи, временныя и готоваем[27] себя диаволу во дно адова во веки мучитися. О безумнии человеци! Оле неразумия вашего! не разсуждаем своих грехов за что ны Бог наказует и казнит и не каемся о них, и не престаем от злоб и от всяких неподобных дел; не помышляем вечнаго, но желаем тленного и временного. Молю, и паки молю престаните от злоб и от всяких душетленных дел и очистим себя истинным покаянием, яко да милостив Господь помилует от грех и подаст телесам здравие и душам спасение и вечных благ не лишит. Аще кто и потрудится в сем веце со благодарением в различных болезнех и во всяких скорбех за очищение грехов своих, царства ради небеснаго, не токмо грехов свободу улучит, но и вечных благ наследник будет. Написано[28] бо есть во святом Апостоле: многими скорбми подобает нам внити в царство небесное и во святом Евангелии речено бысть: узкий и прискорбный путь, вводя в живот, а широкий вводя в пагубу и паки рече Господь: нужно есть царство небесное и нужницы восхищают е[29].

Воспомянем святых мужей страдания Бога ради и много различных недуг и болезней терпения со благодарением, не презывающе к себе ни чародеев, ни кудесников, и волхвов, ни зелейников и никаких бесовских чарований, но все упование возлогающе на Бога и со благодарением[30] терпяще, очищения ради грехов своих и вечных благ наслаждения, яко долготерпеливый Иов и нищый Лазарь, иже пред враты богатого на гноищы лежал, гноен и червми ядом; а ныне на лоне Авраамле почивая и якож Симеон столпник сам гноя тело свое, червьми кипя. И мнози праведнии, от века Богу угодивше, всякими болезньми и различными недуги страждуще, со благодарением терпяще спасения ради душа своея, и жизни ради вечныя; и теми скорбьми внидоша в царство небесное. Мнози богатии и убозии, християнского рода, во всяких чинех княжеска и болярска, и священническаго и мнишеского, много различными болезньми и недуги страждуще, и всякими одержими бываху скорбьми и обиды, Бога ради терпяще, и у Бога милости просяще, и милости[31] чающе и милосердный Господь многоразличныя милости на рабы своя излияет и исцеление дарует, и грехов свобождает, и от скорби спасает овых от животворящих крестов, и от чюдотворных икон святых и образов Христовых и Богородичных и Архангельских и всех Святых мощей, и от освящения воды, и от масленаго освящения и от молебнаго соборнаго пения, и на божественных литургиях и на всенощном предстоянии во святых Божьих церквах, и во святых честных монастырех, и в чюдотворных местех, и в дому, и на пути, и на водах и везде; призывающе верою Господа Бога и пречистую Богородицу и их угодников милость получающе, здравие телеси и душам спасание. Мнози искончашася в тех недузех и в тяжких болезнех и в различных скорбех, теми очистишася от грехов, и жизнь вечную получиша. Вонмем себе опасно и подражаем тех житию и терпению, и поревнуем святых отец житию, пророком и апостолом, святителем и мучеником, и преподобным уродивым Христа ради, и святым женам и православным царем, и князем и священническому, и мнишескому чину и всем христианом Богу угодившим[32] от века: како в житии сем скорбми пострадаша Христа ради, ова постом и молитвами и всяким долготерпением, гладом и жаждею, наготою и мразом, и солнечным сжением, поруганием и оплеванием и всякими укоризнами и биением и мучением различных мук от нечестивых царей Христа ради усекаеми, и огнем сожигаеми, и зверми снедаеми, и камением побиванием, и в водах потопляеми, и в вертепех и в пустынях, и в пропастях земных скончавшихся, во юзах, и в темницах заключаеми, и пленении и всякия терпеша скорби и труды различная муки их кто исповееть – яко же кто повестует святое писание; и сих ради различных страданий и всяких мук како возмездие прияша от Христа в сем веце и в будущем вечных благ наслаждение, – их же око не виде и ухо не слыша и на сердце человеку не взыде – яже уготова Бог любящим Его. Како прославляются ныне, якож церковь Божья вопиет. Мы же убо тех святых молим и на помощь призываем к Богу молитися о нас; и, от тех чюдотворных образов и честных мощей целбу получаем. Поревнуем тех святых житию и страданию со благодарением и долготерпением; такову жь благодать от Бога обрящем.

О волшбах и о обавницех 6-го собора правило 61.

Вдавшимся волшбам или глаголющем мудрецем и сотником или ким таковым: аки от тех навыкиути хотяще, аще открыти хотят: по первому от святых отец от них же заповеданию да повинуются правила канону 6 лет. Тацем же запрещением покорити подобает и влачащая медведи или какова животная; некако наругание простеяшим людем, и получение, рожество и родословие по[33] звездословию и таковых неких глаголы народопрелестное блядство приглашающая. Глаголемые же облакопрогонники, и чаровники, и хранительники, и волшебники; пребывающая же в тех, и неотбегающая пагубных тех еллинских начинаний вся везде от церкви отметати заповедаем[34] яко же священницы ныне[35] повелевають. Кое общение свету со тмою – яко же рече апостол, – или кое сложение церкви Божии со идолы[36] или какая часть верному с неверньм и кое совещание Христова со дияволом.

Иже последуют пагубным обоянием и к волхвом или ко обавником[37] ходят, или в дом свой тех призывают, хотяще уведети неизреченная; такоже и кормяще, и храняще медведи, или иная некая псы и птицы ловчии на ловление и на глумление и на прельщение простейших человек или в получаи[38] веруют и в родословие: рекше в роженицы, и во обояние, по звездословии иже глаголет облаки гонящеи: таковая творящим повеле собор 6 лет запрещение даяти; яко же за 4 лета да стоят[39] с верными и тако сподобятся божественных даров; аще неисправни[40] будут и по запрещении, еленских сих хитростей неостанутся от церкви везде всячески да отженутся. О волхвех же и обавницех[41] рекоша Богоноснии[42] отцы церковнии учителие; паче же инех Иоанн Златоуст[43], яко волшествующе и обавление творяще, аще и святая Троица имя нарицающе[44], аще и знамение честнаго креста Христова творя[45], бегати оть них подобает и отвращатися. Иже во Акире[46] и правило 24: волшествующе[47] и обычаю язычных последьствующе вводяще[48] в домы своя на испытания, потвор или на требление, законом запрещение примут 6 лет по заповеданным степенем; рядом 3 лета внутрь, пребывание вне церкви 2 лета; молитвы без просфиры и комкания[49]. Аще кто к волхвом или обавником[50], или зелейником, или другим таковым себе вдаст, и сия призывает в дом свой; да открыют и поведят ему о них же желание имать; или очаровану ему бывшу, обрести: хотя таковое смыти[51] яко злом злее[52] исцеляя, – 3 лета да припадает и за 2 лета да стоит с верными токмо молитва с ними приобщая[53]; и тако по сконьчании пяти лет причастится святых тайн.

Правило 61-е 6 собора иже в Турле полатнем: 6 лет таковым не повелевает отпущения приимати; рекше, – не причащатися 6-го собора в Константине граде в Турле[54] Полатнем правила II. Ни едино есть приобщение христианом к жидом, сего ради[55], аще обращется тех опресноки ядя, или врача их призывая на целбу себе, или мыяся с ними в бане, или инако како присвояся[56], аще есть причетник, да извержется или мирянин да отлучится. 19 Василия Великаго правило 72-е. Волшебником себя вдаст[57] или ким таковым детоубийцы[58] и то запретится. Вдавый[59] себе волхвом или обавником или чародеем на учение злохитрства их, яко волею убивый запрещение да приимет; веруя же в волхвы, или вводяи их в дом свой обретения ради некоего очищения, отправления, или откровении ради неких, неизреченных, – 6 лет запрещение да приимут[60], яко же 61 правило повелевает 6-го вселенскаго собора, иже в Константине граде в Турле Полатнем и 73-е правило в сем послании Великаго Василия.

ГЛАВА 9[1]

КАКО ПОСЕЩАТИ В МОНАСТЫРЕХ, И В БОЛНИЦАХ, И В ТЕМНИЦАХ И ВСЯКОГО СКОРБНАГО

В монастыри и в болницы заключенных, посещай, и милостыню по силе всяких потребных подай, елико требуют; и видев[2] беду их и скорбь и всякую нужду и елико возможно помогай им; и всякого скорбна, и нища, и бедна, и нужна не презри; и введи в дом свой напои, накорми, согрей и одежи со всею любовию и чистою совестию: теми[3] молитвами Бога сотвориши[4] милостива и свободу грехом[5]получиши; а родителем своим преставльшимся память твори: к церквам Божьим приношение и на панихиду и на литургию[6] в дому по них кормлю твори и нищим милостыню давай[7] и сам от Бога помилован[8] будеши.

ГЛАВА 10[1]

КАКО К ЦЕРКВАМ БОЖИИМ И В МОНАСТЫРИ С ПРИНОШЕНИЕМ ПРИХОДИТИ

К церквам Божиим всегда с верою приходи[2], и без гнева, и без завести, и без всякия злобы, и во всякой смиреной мудрости и кротости и в чистоте телесной[3] с приношением со свещею, и с просфирою, с фимиямом[4] и с ладоном, и с кануном, и с кутиею, и с милостынею за здравие и за упокой, и к праздником, и по монастырем тако же с милостынею и с приношением приходи[5], и егда принесши дар твой олтарю, воспомяни евангельское слово: егда нечто имать брат твой на тя, остави ту дар твой пред олтарем, и шед, преже-смирися с братом своим, и тогда принеси дар твой к Богу от праведнаго имения своего; а от неправды неприятна милостыня. К сим речено бысть: луче не грабити, неже милостыню даяти от неправды; удобнее отдати обидимому приятние милостыни неправедныя; к Богу приятна милостыня от праведнаго имения[6] и от добрых дел.

ГЛАВА 11[1]

КАКО ДОМ СВОЙ УКРАСИТИ СВЯТЫМИ ОБРАЗЫ И ХРАМ[2] ЧИСТ ИМЕТИ

В дому своем, всякому христианину, во всякой храмине святыя и честныя образы, написанныя на иконах, по существу ставити на стенах, устроив благолепно место со всяким украшением и со светилники, в них же свещи пред святыми образы вжигаются[3] на всяком славословии Божии; и по пении погашаются и завесою закрываются, всякия ради нечистоты а от пыли благочиния ради и бережения; а всегда чистым крыльцем[4] обметати и мяхкою губою вытирати их, и храм тот всегда чист имети[5], паче иных храмин. А святых образов касатися достойным, в чистой совести; и на словословии Божии и на святом пении, и на молитве свещи вжигати и кадити благовонным ладаном и фимияном; а образы святыя поставляются иже в начале[6], свято почитаеми суть, имяны прежеречеными; в молитвах и во бдении, и в поклонех и во всяком славословии Божии, всегда почитати их; со слезами и рыданием и с сокрушенным сердцем исповедаемся о своих согрешениях, – и просяще отпущения грехов.

ГЛАВА 12[1]

КАКО МУЖУ С ЖЕНОЮ И ДОМОЧАДЦЫ В ДОМУ СВОЕМ МОЛИТИСЯ БОГУ

По все дни, в вечере, мужу с женою, и с детми, и с домочадцы и кто умеет грамоте отпети вечерня, и повечерница, и полунощница с молчанием[2] и с кротостию с стоянием[3], и с молитвою, и с поклоны; – пети внятно и единогласно. А после правила, отнюдь, ни пити, ни ясти, ни молвы творити всегда, а всему тому наук; а ложася спати, всякому христианину по три поклона в землю пред Богом положити; а в полунощи всегда тайно востав помолитися о своем согрешении, елико вместимо; а во утре, воставая, також творити и комуждо противу силы и по желанию, а не праздным[4] женам кланятися[5] до пояса. Всякому ж христианину молитися о своем согрешении и о отпущении грехов и о царе, и о царице и о их чадах, о здравии[6] и о благоверных князех, и болярех, и о христолюбивом воинстве, о помощи на враги о плененных свободе, о святительском и священническом и мнишеском[7] чину и о отцех духовных и о болящих и в темницах заключенных и за вся християны. Жене також молитися о своем согрешении, и о муже, и о чадех, и о домочадцех и о сродницех и о отцех духовных[8]; и по молении сем утре, вставая, отпети заутреняя и часы[9], и молебен, с молитвою и с молчанием и с кротостию и с кроткостоянием и единогласно пети, и со вниманием слушати, и с святым кажение. А где некому пети, ино молитися доволно, в вечере и утре; а мужем отнюдь не погрешати церковнаго пения вечерни и заутрени и обедни[10]; а женам и домочадцем как вместимо, по разсужению в неделю и в праздники и во святыя дни.

ГЛАВА 13[1]

КАКО В ЦЕРКВИ МУЖУ И ЖЕНЕ МОЛИТИСЯ, И ЧИСТОТА ХРАНИТИ И ВСЯКОГО ЗЛА НЕ ТВОРИТИ

В церкви стояти на всяком пении со страхом, и с молчанием молитися; а дома всегда повечерница и полунощница пети. Кто правит[2] правила своего ради спасения, ино то на его воли, то боле мзда от Бога. А женам к церкви Божии ходити как вместимо на произволении, по совету с мужем; а в церкви ни с кем не беседовати, и с молчание[3] стояти, и со вниманием слушати божественаго пения и чтения, ни куды не озираяся[4], ни на стену не приклонятися, ни к столпу; ни с посохом не стояти; ни с ноги на ногу не переступати; руце имети согбени к персем, крестообразно; твердо и непоколебимо; телеснии очи дому имети, а сердечнии горе; молитися Богу со страхом и трепетом со воздыханием и со слезами, и до отпения из церкви не изходити; а приходити к началу. А недели и праздники Господския[5], и среды и пятки, и святый великий пост и богородичен в чистоте пребывати; а от обядения и пиянства и от пустошных бесед и смехотворения неподобнаго, всегда беречися, а татбы, и блуда, и и лжи и клеветы, и зависти и всякого неправедного собрания и ростов, и корчмы, и мыта[6] и всякого лукавства не любити и не гневатися ни на кого[7] и не помнити зла; и разбоя и грабления и всякого насилия и не праведнаго суда отнюдь не творити. А[8] ранняго пития и ядения и поздняго после вечерняго пения отнюдь не творити ж; ясти бы и пити во славу Божию, и в подобно время. А малым детем и работным по разсуждению[9] кормити их. Или невесте яко неправеднецы царствия Божия не наследят, якож Павел рече: аще некий брат именуется блудник или лихоимец, или идолослужитель, или ругатель, или пьяница или хищник с таковым ни ясти ни пити, и паки рече: нельстити себе ни блудники[10]ни идолослужители, ни прелюбодеи[11], ни малакия, ни мужеложниоы, ни лихоимцы, ни татие, ни пьяницы, ни досадители, ни хищницы царствия Божия не наследят; но достоит всякому християнину от всякого зла блюстится[12]. А всякому христианину всегда четки в руках держати и молитва Исусова во устех непрестанно имети, и в церкви и в дому, и в торгу ходя, и стоя, и седя, и на всяком месте; по пророку Давиду: на всяком месте: благослови душе моя Господа, глаголати ж еще молитва: Господи Исусе Христе сыне Божии помилуй мя грешнаго еще глаголяти 600 молитв; а седмое сто пречистой еже есть: Владычице моя пресвятая Богородице помилуй мя грешнаго, и паки обращатися на первое и еще глаголати всегда. Аще кто сию молитву, требуя ея, глаголет, яко из ноздрию дыхание по первом лете вселится в него Христов сын Божий; по втором лете внидет в него Дух Святый, по третьем лете приидет к нему Отец; и вшед в него, и обитель в нем себе сотворит Святая Троица; и пожрет молитва сердце, а сердце пожрет молитву и начнет клицати безпрестанно сию молитву, день и нощь; и будет свободен[13] от всех сетей вражьих, о Христе Исусе Господе нашем, ныне и присло и во веки веком[14] аминь. И причистая Богородица со всеми небесными силами, и со всеми святыми, будет помощница от всех козней дьявольских, в сем веце и в будущем, верою молящемуся, и в заповедех Божиих пребывающу.

КАКО ПОДОБАЕТ ХРИСТИЯНОМ КРЕСТИТИСЯ И ПОКЛОНЯТИСЯ ИКОНАМ[1]

Како[2] подобает святителем и священническому и иноческому чину, и царем и князем и всем християном поклонятися образу Спасову и животворящему кресту и пречистой Богородице и святым небесным силам и всем святым и священным[3]сосудом и святым честным мощем[4]. Правая рука устроити персты первый краиней да два нижних концы сомкнуты, ино Святая Троица вообразится, средней перст с другим прямо поставити мало надклонен, а другии повыше, а не разпростерты, ти приобразуют Божество и человечество, тако прекрестити лице свое; первое возложити рука на чело, потом на перси, таж на правое плеще, таже на левое[5] и по существу воображен крест Христов; потом главою поклонитися до пояса; а великий поклон в землю главою, а молитву и моление во устех, а в сердцы умиление и во всех удех сокрушение о гресех, и от очию слезы, а от душа воздыхание: усты Бога слави, а умом и сердцем и дыханием молитися о полезных, рукою перекрестися, а телом поклонися в землю или до пояса, всегда тако твори. А святительскому чину и священническому також рукою прекрестити всякого христианина, требующа от них благословение о кресте Христове, и о воображении и о поклонении во отечнице пишет известно, там почет уразумееши силу креста Христова.[6]

Поучение святого Феодорида, како благословити рукою и перекрестися. Три персты равны имети концы соединены вкупе, по образу Троическу Бог Отец, Бог Сын, Святый Дух не три суть Бози, но един Бог в Троицы имены разделяется Божество едино. Отец не рожден, а Сын рожден, а не создан, а Дух Святый ни рожден ни создан, но исходящ, трие во едином Божестве, едина сила, едина Божества честь, едино поклонение от всея твари, от ангел и человек, тако тем перстом указ, а два перста наклонена, а не распростерта и тем указ тако то образуют, два естества Христова Божество и человечество; Бог по Божеству, а человек по вочеловечению, а по обоем совершен; вышний перст образует Божество, а нижний человечество, понеже сшед от вышних спасе нижняя, чтож согбение толкует перстом преклонь небеса сниде, нашего ради спасения, да тако достоит крестится и благословити: тако святыми отцы узаконено.

О том же Афонасия и Петра Дамаскина.

Яко начертанием честного и животворящего креста отгонимы бывают нечистии беси, и различныя недуги без цены убо и без труда, и похвалу его убо кто может изрещи. Святии отцы предаша нам на сопротив глаголания неверным и еретиком, яко два перста убо а едина рука являет Христа Бога нашего во двою естеству и едином составе позноваема, десница ж неизреченную его силу и одесную отце седение возвещает и свыше наченше и от небеснаго его круга к нам сошествие являет, и паки от десныя страны на левую отгоняти врага являет, яко непобедимою своею силою победи дьявола Господь шуя и мрачна и не крепка.

ГЛАВА 14[1]

КАКО СВЯЩЕННИКОВ[2] В ДОМ ПРИЗЫВАТИ И МОЛИТИСЯ БОГУ

А в которыя любо праздники, по обещанию своему или немощи ради, или маслом кого свящати, да призывают священнический чин в дом свой, елико по силе и моление[3] совершают, о всяким прошении; и молятся за царя и великаго князя[4]имярек и за его царицу и великую княгиню имярек и за их благородныя чада[5] и за бояре и за[6] христолюбивое воинство, иже[7] победу на враги, и о плененных свободе, и о святителех, и о всем священническом и иноческом чину, и о всяком приношении[8] и за вся християны, и о домовнем муже и жене, и чадех, и о домочадцех, и о всех полезных им. Аще когда требуют и воду святят животворящим крестом и с чюдотворных образов и с честных мощи, и за болящаго масло свящают, во здравие и во исцеление; а когда масло свящати над болящим в дому, да призовут седмь священников иль множае, а дьяконов колко лучится[9], а масло свящают и все действуют по уставу, и кажение по всему храму от дьакона или от попа; и святою водою кропление, и честным крестом осенение от болшаго попа. И вкупе в дому сем благодаряще Бога[10]. Тако же и по родителех преставльшихся память творити во святых Божиих церквах и в монастырех панихиды соборныя пети; и божественная литургия служити, и в трапезе братия кормити за упокой, и за здравие; и в дом свой призывати[11] и кормити и поити и милостыня творити, а вода святити Генваря 6-й день и Августа 1-й день и всегда единым животворящим крестом, погружает[12] его 3-жды в чаши, святитель или священник, глаголяще тропарь: «Спаси Господи люди своя» 3-жды, а на Богоявлении тропарь: «Во Иордани крещающутися, Господи» 3-жды, а на блюде лежат святые кресты и иконы и чюдотворныя святыя мощи, и из чаши выимая крест над блюдом держати; и со креста вода идет на ту святыню; и по погружении креста, и по освящении воды, помазуют губою, омакая в ту святую воду честныя кресты и святыя иконы и чюдотворныя мощи, елико суть во святом храме или в дому, глаголюще тропари коемуждо святому, помазующе святую икону; и с тех икон губу выжимати в туж святую воду; и паки иныя святыни помазати такожде, и тою святою водою кропить алтарь и весь святый храм, крестообразно, и в дому такоже во всех храминах кропити и весь народ[13]; и достойнии со верою помазуются, и пьют ея, на исцеление и очищение душам и телам, во оставление грехов и в жизнь вечную.

ГЛАВА 15[1]

КАКО КОРМИТИ ПРИХОДЯЩИХ В ДОМУ СВОЕМ СО БЛАГОДАРЕНИЕМ

Егда трапезу представляеши вначале священницы Отца и Сына и Святаго Духа прославляют, потом Деву Богородицу[2] и пречистой хлеб вынимают и по совершении[3] трапезы, пречистый хлеб воздвизают; и отпев достойно, вкушают, и чашу пречистыя пьют. И потом о здравии и за упокой да глаголют[4]. И егда ядяху со благодарением, и с молчанием, или с духовною беседою, тогда ангели невидимо предстоят и написуют дела добрая, и ества и питие в сладость бывает; и аще начнут представленную еству и питие хулити[5] тогда мотыла обращаются сии вкушают; и, аще начнут смрадны и скаредны речи и блудны и срамословие и смехотворение и всяко глумление или гусли, и всяко гудение, и плясание и плескание[6] и всякия игры бесовския, тогда якож дым отгонит пчелы, також отидут ангели Божия от тоя трапезы[7] и смрадныя беси предстанут те и возрадуются и волю свою улучат и вся угодная своя с ними сотворят[8], да також и еще начнут безчинствовати[9] зернью, и шахматы, и всякими игры бесовскими тешитися; дар Божии и еству, и питие и всякия овощы в поругание помещут, и проливают и друг друга шибают, и обливают[10]всячески и поругаются[11]; и написуют дела их беси[12] и приносят к сотоне, и вкупе радуются погибели христианской; и та вся дела предстанут в день страшнаго суда. О горе деющим таковая. Егда жидовы в пустыне седоша ясти и пити и объявшися[13] и упившися[14], и восташа играти и блуд творити и тогда пожре их земля 25000. О, устрашитеся сего, людие и творите волю Божию якож в законе писано; а от сего зла и безчиния соблюди Господи всякого христианина; ясти бы и пити во славу Божию, а не обядатися, ни упиватися, и пустошных не творити! И аще пред кого поставляеши еству и питие, и всякое брашно или пред тебя поставляют не мози похулити; и глаголати: се гнило, или кисло, или пресно, и солоно, и горко, и затхлося, и сыро, и переварено, или какую хулу ни буди возлагати; но подобает дар Божий, всякое брашно и питие похваляти и со благодарением вкушати; ино Бог обоняет вонею благоухания, и в сладость претворит; и аще которая ества и питие непотребно, ино о том наказывати домочадцев, кто делал, чтоб впредь таково не было[15]. От евангелия. Егда зван будеши ким на брак, не сяди на преднем месте, егда кто частнее тебя будет званный[16] и пришед, иже тебя звавый и оного, и речет ти, ты даждь ему место; и тогда начнеши со студом последнее место держати; но егда зван будеши шед сяди на последнем месте, да егда приидет звавый тя речет ти: друже, посяди выше того, да будет ти слава и пред званными[17] с тобою, яко всяк возносяися смирится, а смиряися вознесется[18].И аще к сему приложи земьский обычай, егда зван будеши на брак и не мози упитися до многа пьянства, ни до позда сидети, за неж во мнозе пьянстве, и в долзесидении бывает брань, и свар, и бои, притчею и кровопролитие, и ты быв тутож, аще не дерешися, и не бранишися будеши в той брани и в драке не последней, но и первой, за неже долго седиши и брани дожидаешися. И государю в том на тебя помолва ж будет: спати к себе неидешь, а домочадцем покоя в том нет и расправки с иными зваными; аще ли упиешися до пьяна, а к себе спати не сошедше, или не седеши тут уснеши где пил, и будеши небрегом ни ким же, занеж на пиру людие мнози, а не ты един; и в том во всем пьянстве и небрежении, платие на себе изгрязниши, колпак или шапку истерзаеши[19], аще ли будет денег в мошонке или в калите[20] то вымут, и нож[21] соимут, ино в том государю у кого пил в тебе кручина, а тебе наипаче, а се истерялся, а от людей срамота, и молвят самому пьяну. Видиши ли каков срам и укор, и тщета имению во мнозе пьянстве; аще ли соидеши или седеши, а во мнози пьянстве и ты на пути уснеши, а до дому не доедиши и ты постражеши и горше перваго, соимут с тебя и все платие, и что имаше с собою, то все обыщут не оставят ни срачицы. Аще ли не изтрезвишися, и конечно[22] упиешися реку: с телом и душу отщетиши, мнози бо пьянии от вина умирают и на пути озябают. Не реку: не пити не буди то; но реку: не упиватися во пьянство злое. Аз дара Божия не похуляю, но похуляю тех, иже пьют без воздержания. Апостолу Павлу к Тимофею пишущу: Пей[23] мало вина немощи ради и частых недуг. К нам же пиша глаголет: пей[24] мало[25], веселия ради, а не пьянства ради[26]. Той же Апостол пишет: братие, не упивайтеся вином, в нем же несть спасения, в нем же есть блуд; пьяницы царства Божия не наследят, но уготована им мука вечная с прелюбодеи, и со идолослужители; мнози человеци и земнаго имения пьянством лишаются[27]. Аще кто начнет держатися пития незаконнаго, хвалим будет неразумними, последи же и от тех поруган будет, яко во зло истощи имение свое[28], за неж упивание, а не во славу Божию[29], погибель души и телу, а имению тощета. Пьяницы со земным сим имением лишаются и небеснаго, зана не Бога ради, а пьянства ради погибе; токмо бесом единым радование и с ними в жребии, аще не покаются. Видиши ли, человече, каков срам и укор от Бога и от святых его! И причитает Апостол пьяницу и всяко грех творяща сеже суть неугодна Богу, в жребий с бесы аще истинным покаянием не очистятся. Будиж всем христианом, иже по Бозе в правословнои вере живущим, в жребии с Господом нашим Исусом Христом, и со святыми его, славящим Святую Троицу, Отца и Сына и Святаго Духа во веки аминь. Тако на предлежащее поидем, о нем же нам слово, аще подати кому ясти или пити государю дому, или от предстоящих его, или в стол, или послати куды, разсуждая по достоинству, и по чину и по совету; вся сия от болшаго бывает; а от прочих сия не бывает. Аще за любовь и за некое послушание искусно да сделаются, и о всем да спрошаются от настоящаго. А от стола или от трапезы ества или питие таино износити, или выслати, не по повелению настоящаго и без благословения – святокрадство[30] есть и самочиние; таковых всячески безчествуют. Егда на трапези поставят ти многоразличныя яди и питие, егда кто честнее тебя будет званных, не начни преже вкушати ни что ж; аще ли ты начальствен будеши, поставленную ядь, разсужая, начинаи. У некиих боголюбцев изобильно бывает вкушение различная ества и питие, излишнее цело снимают, ино впредь[31] на потребу или в подачю или в разсылку. Кто не чювствен, и не искусен, и не вежлив[32], и не разсуждая, всякую еству[33], в пресыщение начинает и небрегомо творить будет, и сам поруган и обещестен от Бога и от человек. А еству и питие на стол понести, осмотря, чтобы судно было чисто, в чем несет, и дно подтерто, и ества и питие чисто ж, без пороху и без пригарины, и без плесни, и ставити, осмотря, и поставив еству и питие, тут не кашляти, ни плевати, ни сморкати, отшед на сторону вычистити нос или откашлятися ино не скаредно и вежливо, а сморкнути или плюнути, от людей заворотясь, да и потерти ногою. Коли лучится накормити приезжих людей[34] и всяких гости званых или Богом избраных, богата и убога, и священнический чин и мнишеский, ино государю и государыне разсудным достоит быти, и должную честь воздавати по чину и по достоинству всякому человеку, с любовью и со благодарением и с ласковым приветом[35][36], а иным послати, и всякого наити, и всякого обрадовати; которыя в сенях или на дворе седят, тех всех напоити и накормити, и в столе памятовати: ясти и пити всем тем посылати; или у кого сын или верный слуга, и он бы везде дозирал, и всякого бы почтил, и добрым словом приветал[37], а никого бы не избранил, ни обезчестил, ни осоромотил, ни осмеял, ни осудил, а ни государю, ни государыне, ни их детем[38] напрасно не нанес; а гости и гостьи помеж себя побранятся, ино их унимати добродетелью: а кто неустроен, ино бережно его спровадити ко двору своему, отнюдь от брани беречи всякого. С любовию и с благодарением, напоив и накормив честно отпустити, ино Богу в дар, а добрым людем в честь. А нищим також в милость и в благодарение; а себе от Бога мзда, а от людей добрая слава. А в монастырех кормя, или по родителех память: також творити, кормити, и поити и милостыня давати, елика сила, за здравие и за упокой. Аще кто накормит, и напоит и одарит, а после обещестит, и излает или осудит и пересмеет, или за очи переговорит, или местом обезчестит, или не накормив, да излает и ударит, да сошлет с двора, или слуги кого обезчестят: и того[39] стол или пир бесом на утеху, а Богу на гнев, а людем на позор, и на гнев и на вражду, а обесчещеным[40] на срам и на оскорбление. А безумному тому государю или государыне и слугам от Бога грех, а от людей укоризна и вражда, а от убогих клятва, а не благословение. Аще кого и не покормити, ино тихонко отмолвити, и не излаяв, и не ударя, и не обесчестив[41], отпустити и вежливо отказати; а поидет кто со двора ропщучи государевым недозором или государининым, ино вежливой слуга[42] гостю разговарити: неподиви, господине, на многих людях государем нашим, не поспели тебя уподчивати, и они тебе впредь челом бьют, а ты на них ныне не помолви. И после пиру тому слуге своему государю сказати про того гостя как[43], а будет надобной гость, ино в те поры государю сказати и они как похотят. А у государыни жены добры и всякия гостьи, каковы случатся у нея, и ей сим же образом творити, как в сей главе писано, и детем ея и слугам[45].

ГЛАВА 16[1]

КАК КОРМИТИ И ОДЕВАТИ СЛУГ

Такоже приказ держати: как варити на семью челяди, или нищете[2] скоромную и постную еству: капусту или нотину[3] или крошиво иссечи мелко, и вымыти хорошо, и уварити, и упарити гораздо. В скоромные дни мясо, или ветчины или сальца ветчиннаго положити; или забелки подати, и засны всыпати и приварити; а в пост сочком залити или иной какой навары приварити, да прибавя и упарити хорошо или заспы[4] подсыпати, да с солью или с кислыми щами[5] приварити; и кашку всякую, потому ж; и уварити и упарити хорошенко, с маслом, или с салом[6], или с соком, или мясо ветряное или полтевое и солонина; или рыба ветряная и прутовая или просол мыти, и выскрести, и вычистити и уварити хорошо, и всякую семеиную еству выстряпати. И хлебы семеиные також вымесити, и уквасити, и вывалити хорошенко, и выпечи, и пирожки семеиные потомуж; и всякую еству семеиную устряпати хорошо и чисто, – как своя душа любит. А всякия ествы семеиныя государыня[7] по вся дни сама покушает, и только не хороше сварено или испечено, и о том бранити тому[8]кто стряпал, или сама государыня о том не радит[9], ино муж ей о том бранит. Как своя душа любит: так и служек и нищих кормити; ино будет в честь, а себе во спасение. Да государю или государыне всегда дозирати[10] и спрашивити слуг, о всякой нуже, о естве, и о питии, и о одежи, и о всякой потребе, и скудости и о недостатке, и о обиде, и о болезни, и о всех тех нужах, ино о них, Бога ради, промышляти и попечение имети, елико вместимо как Бог поможет, от всея душа яко ж о своих и о присных своих. Аще кто не радит о сем и не болезнует о сих, даст ответ Богу и мзды не получит[11]. А кто сея с любовию, от всея душа бережет и хранит, – велию милость от Бога получит[12], и грехам свободу и жизнь вечную наследит[13]; занеж рабы и рабыни Богом созданы суть, и нам от Бога поручены суть на послугу, да подобает о них пещися. А держати людей у себя по силе, как мощно бы их пищею и одеянием удоволити[14]; а толко людей и себя держати не по силе и не по добытку, и не удоволить их ествою и питием и одеждою, или который слуга нерукоделен, собою не умеет промыслити; ино тем слугам[15] мужику, и жонке и девке, у неволи плакав[16], красти, и лгати, и блясти; а мужиком разбивати и красти, и в корчме пити и всякое зло чинити. И тому безумному государю и государыне, от Бога грех, а от люди посмех; и не соседство[17] со всяким; а от соседей[18] продажа и тощета[19] дому; и сам обнищает[20] за скудость ума. Ино достоит всякому человеку люди держати по промыслу и по обиходу, как мощно; кормити, поити и одевати и во всяком покою удоволити, и в страхе Божии и в добре наказании их имети; и аще таковых людей у себя имееши, сам от Бога благодать обрящеши, и тех душа спасеши, а не по силе людей держати, и в работу их непродавати; но доброволно их отпущати, а како возможно и наделити[21], а старые слуги, которые не могут делати, и тех також кормити, и одевати, за старую послугу их, ино от Бога мзда и души польза.

ГЛАВА 17[1]

КАКО ДЕТЕЙ СВОИХ ВОСПИТАТИ ВО ВСЯКОМ НАКАЗАНИИ И СТРАХЕ БОЖИИ

А пошлет Бог у кого дети, сынове и дощери: имети попечение отцу и матери о чадех своих: снабдевати[2] и воспитати в добре наказании, и учити их страху Божию и вежеству и всякому благочинию; и, по время[3] и по детем смотря, и по возрасту учити их рукоделию; отцу сынове а матери дщери; кто чему[4] достоин, каков кому просуг[5] Бог даст; а любити их и беречи и страхом спасати, уча и наказуя, и разсуждая и раны возлагати: наказуй дети во юности покоют тя на старость твою; и хранити и блюсти о чистоте телесной, и от всякого греха[6], якоже зеницу ока, и якож своя душа; аще дети согрешают отцовым и материным небрежением, и о тех гресех ответ дати[7] им самем за дети своя в день страшнаго суда; аще дети небрегоми будут и не наказаны от отца и матери, аще согрешают или что зло сотворят и отцу, и матери, и с детми от Бога грех, а от людей укор и посмех, а имению нищета, а себе скорбь[8], а от соседи[9] продажа и срамота[10]. Аще у богобоязненных родителей, и у разумных, и у разсудных, чада воспитани в страсе Божии, и в добре наказании, и в благоразсудном учении, всякому разуму, и вежеству, и промыслу и рукоделию; и те чада, с родители своими бывают от Бога помиловани, а от священнаго чина благословени и от добрых людей хвалимы, и егда[11] будут в совершение возраста, и добрые люди, с радостию и со благодарением сынове у них женят, а дщери вдают, прибирая по своей версте и по суду Божию; аще от таковых которое чадо Бог возмет, в покаянии и с причастием, то от родителя безкровная[12] жертва Богу принесится, и в вечныя кровы вселяются; и имеют дерзновение у Господа[13], прося милости и оставления грехов о родителях своих.

ГЛАВА 18[1]

КАКО ДЩЕРИ ВОСПИТАТИ И С НАДЕЛКОМ ИХ ЗАМУЖ ДАТИ

А у кого дочи родится, ино разсудный отец которым[2] промыслом себя питает, во граде ли куплю деет, или по морю[3], или деревню пашет, и он с торгу, ей выть[4]наименит, а в деревне по тому же или животину ростит ей с приплодом; и от ея выти, что Бог пошлет, купит полотна и ущины[5], ширинки, и убрусы, и рубашки, по всяк год и кладет во причесной[6] сундук, или в коробья: платие, и сажение и маниста[7], и суды оловяные, и медяные, и деревянные; и, прибавливая по немножку всегда, на всяк год, по прежписанному, а не вдруг; ино себе в досаду, а всего, даст Бог будет полно[8]. Ино дочи ростет, и страху Божию, и вежеству всякому, и рукоделию учится, а приданое с нею вдруг пребывает; а как замуж сговорят, и отец, и мати будут безпечалны[9], занеж дал Бог всего у них полно, и в веселии и в радости брак у них будет. Аще ли[10] отец и мати не запасны[11], и своей дочери по прежеписанному не изготовили, и выти ей не в чем не уделивали, и учнут ея замуж давати, и в те поры все покупати; ино скорая женитба ведомая работа, и отец и мати будут в печали о такове браце, занеже все вдруг, и дорого купити. А по судбам Божиим, кая[12] дочи преставится: ино ея наделком поминати и по ея душе сорокоустие[13] или милостыню из того давати; а толко иные дочери есть, такоже и о тех промышляти.

ГЛАВА 19[1]

КАКО ДЕТИ УЧИТИ И СТРАХОМ СПАСАТИ

Казни сына своего от юности его и покоит тя на старость твою, и даст ти красоту души твоей. И не ослабей бия младенца; аще бо жезлом[2] биеши его, то не умрет, но здравее будет; ты бо бия его по телу, душу его избавляеши от смерти; аще ли дшерь имаши: положи нань грозу свою и блюдеши ея от телесных, да не посрамит лица твоего, да в послушании ходит, да не свою волю приемше[3], и, в неразумии, прокудит девство свое, и сотворит тя знаемым твоим в посмех, и посрамит тя при множестве народа. Аще бо отдаси дщерь свою без порока, то аки велико дело совершляеши, и посреде собора похвалишися и при кончине своей не постонеши нань[4]; а иже любя сына своего, учащай ему раны, да последи о нем возвеселишися. Наказуй его во младости[5], да радуешися о нем в мужестве его, и по среде знаемых[6] похвалишися, и зависть приимут врази твои. Воспитай дети[7] своя с прещением, и обрящеши от них покой и благословение. Не меися игры творя ему: о мале бо ся осклабиши[8], а о велице поболиши скорбя, и последи яко оскомину сотвориши души своей. Не дай же ему власти в юности, но сокруши ребро, донели же растет. Аще еси ожесточав не повинит ти ся; и будет ти оть него досаждение и болезнь души, и тащета домови, и погибель имению и укоризна от сосед, и посмех пред врази и пред властели платеж и досада зла[9]. Аще дети своя воспитаете во страхе Божии, и в поучении, и во всяком наказании, и до совершена возраста сохраниши их во всяком целомудрии, и в чистоте телесной, и законннаго бракосочетания со благословением устроиши, и будут наследницы имению твоему и дому, и всему стяжанию твоему, иже имаши, и упокоят тя на старость твою, и по смерти вечную память сотворят родителеми своим и сами во благословении будут[10] и от Бога великую мзду получат, в сем веце и в будушем, пребывающе в заповедех Господних[11].

ВЕЛИКАГО ВАСИЛИЯ КЕСАРИЙСКАГО ПОУЧЕНИЕ ЮНОШАМ

Душевную бо чистоту имети и безстрастие телесное; ступание кротко; глас умилен; слово благочинно; пищу и питие не мятежно; при старейших молчание; при мудрейших послушание; к преимящим[1] повиновение; к равным себе и меншим любовь имети нелицемерну; от злых и плотских[2] отлучаться; мало вещати, множае разумевати; не предерзывати славом; не избыточествовати беседою; не дерзку быти на смех; стыдением украшатися; к женам нечистым не беседовати; долу зрение имети, горе же душу; бегати сопротивословия немучительски[3] гонити сан; ничтоже вменяти, яже от всех чти; аще кто от вас и инех ползовати, яже от Бога мзду да ожидает, и вечных благ наслаждение.

ГЛАВА 20[1]

КАК ДЕТЯМ ОТЦА И МАТЕРЬ БЕРЕЧИ И ПОВИНОВАТИСЯ[2] ИМ ВО ВСЕМ

Чада послушайте заповеди Господня: любити отца своего и матерь свою, и послушайте их, и повинуйтеся им, по Бозе во всем; и старость их чтите и немощь их, и скорбь всякую от всея душа, понесите на своей выи: и благо вам будет, и долголетни будите на земли; сим очистите грехи своя, и от Бога помиловани будете, и от человек прославитеся, и дом ваш будет вовеки, и наследят сыны сынов твоих[3], и достигните старости маститы, во всяком благоденстве дни своя[4] препровождающе[5]. Аще кто злословит, или оскорбляет родителя свои, или клянет и лает, сей пред Богом грешен есть, а от народа и от родитель проклят. Аще кто бьет отца или матерь от церкви Божии и от всякия святыни да отлучатся, и лютою смертию и градскою казнию да умрет; писано бо есть: отча клятва сына потребит, а матерня и искоренит. Сын или дщерь непослушивы отцу и матери, в пагубу себе[6] будут и не поживут дней своих; еже прогневает отца и досажает матери, мнится не согрешая к Богу, и есть поганых горее и обещник[7] нечестивым, о нихже пророк Исайя рече: да возмется нечестивый, да не видит славы Господня[8]; нечестивых именова иже безчествуют родителей своих. И паки рече: насмехающагося отцу, и укоряющаго старость матерню, да склюят и вранове, да снедят и орли; честь же творя отцу и матери и повинуешися им, по Бозе, во всем возвеселится имут о чадех своих и в день печали их избавит их Господь Бог, и молитву их услышит и, его же просят, подаст им вся благая; покояи матерь свою, волю Божию творит, угождая отцу, во благих поживет; вы же чада делом и словом угождайте родителем своим во всяком блазе совете; да благословение будет от них; отче благословение дом утвердит, а матерня молитва от напасти избавит. Аще оскудеют разумом в старости отец и мати, не безчествуете их, ни ударяйте[9], да от своих чад почтени будете. Не забывайте труда матерня и отцова яже о вас болезноваша и печални быша; покойте старость их и о них болезнуйте якоже они о вас. Не глаголи много им[10] сотворихом[11] добра одеянием и пищею и всякими потребами, но неси свободь[12] сим: не можете бо ею родити, и тако ею болети, яко они о тебе. Тем же со страхом, раболепно служите им, да и сами мзду от Бога приимете, и жизнь вечную наследите, яко совершители заповеди его.

ГЛАВА 21[1]

ПОХВАЛА МУЖЕМ[2]

Аще дарует Бог кому жену добру дрожайши есть камения многоценнаго; таковая от добры корысти не лишится, делает мужу своему все благо житие. Обретши волну и лен, творить[3] благопотребная[4] руками своима; бысть яко корабль куплю деющ, из далеча сбирает все[5] богатство; и возстает из нощи дает брашно душу и дело рабыням; от плода руку своею насадит стяжание много; препоясавши крепко чресла своя, утвердит мышца своя на дело; и чад своих научает, такоже и рабынь[6]; и не угасает светилник ея во всю нощь; руце своя прастирает на полезная; локти же своя простирает на веретено; милость же простирает убогу; плод же подает нищим; непечется о дому своем муж ея; многоразличная одеяния и преукрашенна сотворить мужу своему, и себе же, и чадам, и домочадцем своим[7]; и сядет и знаемым велми честен будет[8]; и благоразумно беседует[9] и разумеет яко добро делати; никто ж бо без труда венчан будет. Жены ради добры блажен есть муж и число днии его сугубо[10]; жена добра часть блага в части боящихся Бога[11] да будет; жена бо своего мужа честне творяща, первее: Божиею заповедь совершив и сохранив, благословена будешь, а второе: от человек хвалима есть; жена добра, и страдолюбива[12] и молчалива венец есть мужу своему; обретыи[13] бо муж жену свою добру, износит из дому своего благая. Блажен есть таковыя жены муж: и лета своя исполняет в долзе мире. О доброй жене хвала мужу и честь[14]; добрая жена по смерти мужа своего спасет.

КАКО ВСЯКОМУ ЧЕЛОВЕКУ РУКОДЕНИЕ НАЧАТИ[1] И ВСЯКОЕ ДЕЛО ДЕЛАТИ БЛАГОСЛОВЯСЬ[2]

В домовнем[3] обиходе и везде всякому, человеку, государю или государыне, сыну или дщери, и слугам мужску полу и женску и всякому мастеровому человеку стару и младу, и ученикам всякое дело начати или рукоделие[4], и мастерство, устроив себя и очистив от всякия скверны, и руки умыв чисто, и преже дела святым поклонитиси трижды в землю, а по нужи ино до пояса, а кто умеет ино «Достоино есть» проговорити[5], да благословися у настоящаго, и молитву Исусову сотворив, да перекрестяся молвити[6]: «Господи бласлови отче»: таж начати всякое дело, ино тут[7] Божия милость поспешествует[8] и ангели Божии невидимо помогают и беси отбегнут; и то дело Богу в честь а души на пользу; а ясти и пити со благодарением, ино сладко, а что впрок сделано ино мило; а делати[9] с молитвою с доброю беседою и с молчанием. Аще ли делаючи что[10] и начнется слово праздное и хулное, или с роптанием, и с смехом, и кощуны скверные, и блудныя речи, и песни бесовския, и игры и от такова дела и беседы скверныя милость божия отступит; и ангелы господни отидут скорбни, и возрадуются беси[11], видяще[12] волю свою содевающуся в человецех безумных[13], и абие приступяв лукавии тии беси и начнут наипаче влагати в мысли всякую злобу, вражду и ненависть, и подвизают помысл на гнев, и на блуд, и на всякия кощуны, и сквернословие и на всякое зло; ино та уже дела, и ества, и питие не споро и всякое мастерство и рукоделие не о Бозе совершается, Богу на гнев, и людем небласловенно, и непотребно, и не прочно и не мило; а ества и питие неукусно и не сладко, толко врагу и его слугам угодно[14] и радостно. Кто в естве и в питие и во всяким рукоделии не чисто стряпает, а в мастерстве, что украдет, или подмешает[15], или подменит что, или прельжет и божится на криве: толко сделано, толко стало, а он лжет, – и те все дела неугодны Богу, беси написуют в свой свиток, и в том во всем человеку истязану быти в день страшнаго суда[16]; а государю не верно, а людем не потребно и впредь никто тому не верит; а что ведал не прямо, или прилгал, и выбожил, или приторговал лукавством, то неблагословенныя плоды и непрочны; а милостыня не приятна богу; а от праведных трудов и от благих плодов и себе прочно, а Богу в дар принести достойно; и таковый человек Богу угодил и людям честен, и всяк ему во всем верит; в сем веце добрымы делы Богу угодит, а в будущем веце во веки царствует.

ГЛАВА 23[1]

НАКАЗАНИЕ[2] МУЖУ И ЖЕНЕ И ДЕТЕМ[3] КАКО ЛЕПО БЫТИ

А[4] самому государю жену, и дети, и домочадцев учить не красти, не блясти, не лгати[5], не оклеветати, не завидети, не обидети[6], чюжаго не похищати[7], не претися всуе неосужати, не бражничати, не просмеивати, не помнити зла, не гневатися ни на кого. Ко большим быти послушну и покорну, а к средним любовну, к меншим и к убогим приветну и милостиву; со всяким управа без волокиты; наипаче[8] наймита наймом не изабиди[9], а всякую обиду[10] со благодарение терпи[11], Бога ради, и понос и укоризну. Аще по делом поносят и укоряют, сие с любовию приимати, и[12] таковаго безумия отвращатися, а против не мстити[13]. А домочадцев своих учити страху Божию, и всякои добродетели, и самому також творити, и вкупе обрящете от Бога милость. Ащели небрежением и нерадением твоим сам, или жена твоя твоим[14] не наказанием согрешит и зло пред Богом сотворит, или[15] домочадцы твоя, мужи, и жены, и дети твоя каков грех сотворят твоим[16] не наказанием: брань и татьбу, или блуд и всякое зло сотворят, – вси купно по делом своим приимете, зло сотворшии муку вечную, а добро сотворшии[17]и иже с тобою вкупе примете с ними вечную жизнь, а себе больший венец приимеши, понеже не о себе едином попечение имея к Богу, но и сущих с тобой введе в жизнь вечную.

ГЛАВА 24[1]

КАКОВЫ ЛЮДИ ДЕРЖАТИ И КАКО О НИХ ПРОМЫШЛЯТИ, ВО ВСЯКОМ УЧЕНИИ В БОЖЕСТВЕННЫХ ЗАПОВЕДЕХ И ДОМОВНЕМ СТРОЕНИИ

Людей у себя держати дворовых добрых, чтобы были рукодельны и кто чего достоин и какому рукоделию[2]. Не вор бы был, ни бражник, ни зернщик, ни тать, ни разбойник, ни блудник[3], ни всякому зло творящ. Всякой бы человек у добраго государя первое научен страху Божию; потом[4] всякой добродетели[5], и вежству, и смирению, и доброму промыслу, и домовному строению; ни крал бы, ни лгал[6], а всякой добродетели прилежен был со смирением и с наказанием государя своего, по апостола Павла заповеди, еже пишет к Тимофею: «елицы суть под игом работы[7]своя господы всякой чести[8] достийны, да творят; да имя Божие и учение не хулится; имущих веры господы да нерадят, яко братия суть, но паче работают, яко верни суть и возлюблени, иже заступающе и благодать восприемлюще. Сия господине, сам ты учи и моли раб своих таковым быти им, с запрещением и с грозою многою». И паки той же апостол к Титу пишет[9]; повелевает рабом пред своими господы[10], повиноватися и во всем благоугодным быти: не прикословити[11], ни крадуще[12], но веру всяку являюще благу да учения Спасителя нашего Бога украшают о всем, и[13]сыт бы был твоим[14] жалованием и оден[15] или своим рукоделием. А чем ты его пожалуешь[16] платием или конским жалованием[17], и всякою животиною[18], или пашнею[19], или торговлею какою на его часть или сам что примыслит[20] своими труды, тем бы доволен был и блюл бы впредь. А лучшее платие[21], верхнее и нижнее, и рубашки, и сапоги, блюл бы по праздником и при добрых людях и в ведро, а всегда было б у него честно[22], и не изгрязнено[23], и не измочено[24] и от всякия нечистоты соблюдено. Который у тебя человек[25] о том не бережен и твоим жалованием[26] о том нелепо ходит и беречи не умеет, и ты б своему прикащику велел[27] у таких не чювственных людей[28] платие с них снимати лучшее, и в своей казне беречи, и на время им давати и потом сняв, також у себя беречи[29]; а всем дворовым людем наказывати почасту, чтобы делали в ветчаном платии или новое на страду ему дало; а как в праздники или при добрых людех у тебя случается, или тебе самому в людех быти, было бы на людех на твоих платие доброе и берегли бы от грязи, и от дождя, и от всякия нечистоты и, по времени сняв с себя платиеце высушити, и вымяти[30], и укласти хорошенько где живет[31]; ино себе любо[32], и от людей тебе честно[33], и слугам твоим прочно, таковое бережение к платию и всегда в нове ходит. А люди бы были у тебя во чти, и в грозе, и во всяком дозоре. И промежду бы собою не кралися, а чюждаго отнюдь не похотели ни которыми делы, а твоего[34] бы берегли все за один; а тебе[35] бы не лгали, и не клеветали ни на кого, ни в чем; а ты[36] бы им в том[37] не потакал и обыскивал с очей на очи; злому[38] не отпущай[39] но с милостию казнь дай, да и прочие страх приумут на злое не держати, а добраго жалуй, и всяк добру ревнует и твоим жалованием хощет выслужити правдою и прямою свою службою; и твоим наказанием и наукам век свой изжевет в добре и без[40] твоей опалы, и душу спасет, и государю услужит, и Богу угодит; да и наипаче тебе самому[41] наказывати людей своих, которым вместно ходити к церкви Божия всегда, или по праздником; или во дворе слушати пения[42]; и, особь на едине молитися, и чистота телесная хранити, от всякаго неподобнаго дела от блуда, и пьянства, и лукавства[43], и от безвременнаго пития и ядения и от обядения, и пьянства воздержатися и отцев бы духовных с женами своими имели, и на покаяние приходили[44]. А холостыя отроки и девки в совершеннем возрасте женить; по апостолу[45]: честен брак и ложе не скверно, а прелюбодеем судит Бог; а которыя холосты и блуд творят твоим небрежением, или таи от тебя: и тебе того також пытати со многим испытанием, а отнюдь бы неименовалося у тебя таковое дело; аще не радиши, а слуг держиши, а попечение о душах их не имееши, токмо еже дело им делати рано и поздно на твою потребу, на пищу, и одеяние, и на всякую твою службу: и тебе самому о душах их отвещати в день Владычня суда, по апостолу еже пишет[46] в послании своем: «не брашна ради и пития разоряй дело Божие[47]»; еже презирати плотския попещи же ся о душе, вещи безсмертныя; по апостолу же: имуще пищу и одеяние сими довольни будите[48]. А женатыя бы слуги со своими женами законно жили, по духовнаго отца наказанию, мужи от жен своих не блудили, а жены от мужей, и по твоему наказанию и отца духовнаго учению, також и они учили жен своих[49] страху Божию, и вежеству, и смирению; а государыни бы слушали, и повиновались во всем; и своими труды выслуживали и рукоделием, а не крали бы, и не лгали, и не бражничали, и не блядили[50], и баб бы неслушали, кои на зло потворяют молодых жен, сии речь[51]сваживают с чюжими мужи, и наипаче их учат красти и блясти и всему злу. И многих[52] слышах от баб потворных, иже[53] бегают покрадчи государя и государыню, со многим именем: женки и девки с чужими мужики, и егда возмут у нея с чем сбежала, и ея убиют или в воду посадят, ино себя погубит, а имение[54] твое изгинет. Аще ти не верно мнится о таковых бабах, то и како в дом твой прийти мужику незнаему; но сею прелетию и иною разною казнию бывает. Женка или девка по воду, или платье мыти и с мужиком учнет говорити; аще и знаем будет им, но ни[55], понеже срамятся с ним и созретися; данеж с чюжим мужиком, а не с своим мужем говорити; а бабе, всегда ей время с ними о какове деле говорити[56] и учинится она торговкою, и пришед, пытает у них: надобно ли вам то, или иное, или государыне вашея? И оне у нея вспросят: есть ли то. Она же молвит – есть. И оне[57]ей молвят: дай[58] и мы покажем государыне; а она же отмолвится[59], дала есмь той и той[60] жене доброй тово и тово, и скажет человека добраго[61] по имяни, а в сем[62]солжет: и аз, кунки, иду, да у нее возму и к вам принесу; и они ей призапретят: принеси к нам до обеда же, или как вечерню поют; баба ж молвит: у кунки, знаю я, как к вам прийти, то[63] и вы государя блюдетеся. И отойдет от них, и не идет к ним день или два; по дни же, или другом дни ко двору к ним нейдет, стрежет их, как пойдут на реку по воду или платье мыти; баба же пойдет, будто[64] мимо; они же ея восскличют, и молвят ей: о чем ты к нам не бывала еси, и не принесла еси, что хотела принести? Баба ж к ним удивится вельми и молвит: о кунки вчера и третий день была ести у тое и тое добрые жены, и мужу имя скажет, а у них был пир, и она кормилица меня не отпустила и ночевола есми у нея с ея служками[65], а тамо вами не поспела ходити, – меня жалуют многия жены добрыя. Они же к ней молвят: прянеси же к нам и с запрещением великим рекут ей… Да-не-плету много! Сими делы бабы опознаваются с женками и с девками служащими. И начнет с ними та баба невозбранно стояти и говорити, на реке и на встрече. Аще и государь осмотрит и молвит, – они же с женою, а не с мущиною стоят; и потом начнет к ним и ко двору приходить; они ж опознают ее и с государынею своею[66]… и от таковых баб младым людем велия спона бывает: прельщение на блуд, и на татьбу, и детем губления, и изгибель всему имению и всему дому смятение. Паче же глаголю[67]: горе мне, вси есмы прелщаемы от общаго врага диавола, нашим оружием побеждени бываем. Дерзну рещи: блаженная Ѳеодора Александрийская не от жены ли прельщена, ложе мужа своего не сохрани; но едва покаянием и терпением многим умоли всемилостиваго Бога, и велику сподобися от Бога сосуду избранну быти; а[68] и нам, еще же умолчим, понеже не вместно бывает слышащим, а имеяи уши слышати, да слышат и разумевает в прикрытых словесех. Но преди поидем о тех же слугах[69]. И с дурными бы речми к государыне не приходити; и волхвов, с корением и с зелием, и кто тем промышляет, с теми бы отнюдь не зналися, и государем бы своим про тех[70]не сказывали: те суть бесовския слуги; а служили бы государем своим верою, и правдою и добрыми делы[71]. А государь, и государыня, людей своих[72] жаловали б и поили, и кормили, и покоили, и одевали; и в тепле бы жили, и во всяком покое и во благоденстве всегда[73]. И государь и государыня, аще пребудут в сем наказании, как писано, и оне душа своя спасут и дом свой устроят, и слуг своих також и в душевном и в телесном, без всякие скорби; також государю и государыне достоит попечение имети о[74] нищих, и странных, и убогих, вдовиц и сирот[75] достаит их покоити[76], паче ж в их недостачестве[77] во всяком в душевном и в телесном, от своих праведных трудов; в душевном разумевай, а в телесном разсмотряй; також и к церквам Божиим, и к церковняком, и в монастыри, и в темницы приноси и посылая елико твоя сила[78]. Аще не имееши что подати, и ты слово рцы утешно, аще ли и сего не достанет ти, и ты не озлоби и не опечали[79], поминая свою нищету и помысли евангельское[80]слово: емуж много дано, множайшая просят от него, сии речь преизлишьшее; а ему же мало, малеишая и просят от него, еже есть, чашу малу воды или слово утешно, – то есть малейшая, то и последни; також и[81] в дом свой призываи[82], – и та Богу милостыня приятна и душе полезна. А отнюдь бы не вмещалося в дом твой ни от насилия, ни от грабления, ни от татьбы, ни от всякого мшелоимства[83], ни от ябедничества, ни от криваго суда, ни от корчебнаго прикупа. Аще от сего зла соблюдешись[84] то и дом твой благословен будет от ныне и до века[85]. А государь и государыня и с чады, и с людми своими[86], мужы и жены, старии и младии, по вся годы, в великия посты ко отцем духовным на покаяние приходили, а достойнии бы и причащалися Святых божественных даров; аще и не единыжды[87] годом, то боле мзду приимут от Бога; а отцы бы духовныя государя, и государыню и их слуг на се поучали, а государь бы о своей души и о слугах своих о сем великое попечение имел, а милостыню слуге за свою душу дати нечего, и за них государю дати, и о всех их потребных оприче злаго дела. Во весь год[88] в среды, и в пятки, и в недели, и в праздники господския, и в великии[89] пост и в Госпожин[90] чистоту телесную хранити, и во всяких бы добродетелех, и от пьянства в воздержании пребывати; и к церквам Божиим приходили бы с приношением: за здравие и за упокой; и всякия святыни касалися, по достоинству и по совету отца духовнаго. А прочее писано о том же во главе.

ГЛАВА 25[2]

АЩЕ МУЖ САМ НЕ ТВОРИТ И НЕ УЧИТ[3] НА ДОБРО И ЗА ТО СУТ[4] ОТ БОГА ПРИИМЕТ; АЩЕ САМ ТВОРИТ ДОБРО И ЖЕНУ И ДОМОЧАДЦЕВ УЧИТ, МИЛОСТЬ ОТ БОГА ПРИИМЕТ

Аще муж сам того не творит что в сей книге[5] писано, и жены не учит, ни чад, ни домочадцев своих, ни слуг, и дом свой не по Бозе строит, и о своей душе и людей своих не радит[6], по сему писанию не учит, и он сам ся погубит[7] в сий век и в будущий, и дом свой[8] и прочих с собою. Аще ли добрый муж о своем спасении радит, и жену и чад своих наказует, також и слуг[9] своих наказует и учит всякому страху Божию[10], и законному христианскому жительству, яко же[11] писано, и он вкупе со всеми по благоденьстве по Бозе жизнь свою проводит и милость Божию получит.

ГЛАВА 26[1]

О НЕПРАВЕДНЕМ ЖИТИИ

Аще кто не по Бозе живет, и не по христианскому[2] закону житие и страху Божия не имеет, и отческаго предания не хранит, и о церкви Божии не радит[3], и Божественнаго писания не требует, и отца духовнаго не слушает, и добрых людей совету и наказанию по Бозе не внимает, творит[4] всякую неправду, и насилие, и обиду, сильно отымет[5], и взяв не отдаст[6], волокитою уморит, а молода человека во всем изобидит, и на соседство кто не добр, или в селе на своих крестьянех[7], или на приказе, или на власти, дани тяжкия и всякия оброки[8] незаконныя накладывать, или чюжую ниву попашет[9], или лес посечет, или землю преорет, или луг покосит[10], и ловлю рыб[11] их ловит[12], и борти, и перевесы[13] и всякую ловлю, и всякое угодие неправдою и насилием творит[14]; или ограбит, и покрадет, и разбиет на дороге, и на стану грабит, и биет и соромит, и пустошит луги, и пашню толочит и всякую обиду творит[15], или кого чем поклеплет, или подкинет, оклевещет и ополишнит[16], и напрасно продаст в работу неповинных; лукавством и насилием охолопит, или не прямо судит, или не прямо[17] обыскивает, или на криве послушествует, и кающимся немилостив, или лошади и всякую животину и всякое стяжание: села, и винограды, варницы, мелницы, лавки, анбары и всякое угодие силно отнимет; или дешево в неволю[18] купит, и ябедничеством вытянет[19], или корчебным[20] прикупом[21], и всяким лукавым ухищрением, или росты и наспы[22] и всяким неправедным собранием богатеет, и всякая неподобная дела творит: блуд, нечистоту, сквернословие и срамословие, и клятвопреступление, ярость и гнев, и злопамятство[23], или с женою не законно живет, или от жены блудит, и содомский грех содевает, или корчмит, всегда яст[24] и пьет без воздержания, во обядение и пьянство; праздников и поста не хранит, всегда в нечистоте пребывает; или чародействует, и волхвует, и отраву чинит; или ловы творит с собаками, и со птицами, и с медведи; и всякое дьяволе[25] угодие творит, и скоморохи и их дело, плясание и сопели, песни бесовския всегда любя[26], и зернью, и шахматы, и тавлеи сам[27] государь, и его, дети и[28] християне тако творят, а государь о том не возбраняет[29], и обидимому управы не даст прямо, вси вкупе будут во аде а зде прокляты; и во всех тех плодех не благословенных от Бога не милован[30], а от народа проклят; а обидимии к Богу вопиют; а свои души погибель, а дому тщета; и все проклятое и не благословенное ясти[31] и пити и носити; все стяжание и плоды не Божии но бесовстии; и низходят во ад, живы душа их и тако творящих; и от них от всякаго обилия и плодов от таковых Богу неприятна милостыня, ни при животе, ни при смерти. Аще ли хощети вечныя муки избыти, отдай неправедное тем же коих изобидел[32] и кайся впредь тако не творити всех[33] сих зол, еже во главе сей писано. Скор Господь на милость свою, истинно кающихся приемлет и великим грехом свободу дарует.

ГЛАВА 27[1]

О ПРАВЕДНОМ ЖИТИИ

Аще кто по Бозе живет и по заповеди Господни, и по отеческому преданию, и по христианскому закону; аще ли властели судят праведно и нелицемерно, всем ровно, богату и убогу, ближнему и дальнему, знаемому и незнаемому, також доволни будут уроки своими праведными и людем своим велети також творити. Аще ли в селе[2], во граде, на соседстве кто добр и у своих християн; или на власти, или на приказе; праведныя оброки в подобно время емлет ни силою, ни граблением, ни мучением; а коли чего[3] не родилося и заплатити нечем и он наровит[4], а у соседа и у своего христианина чего не достало на семена, и лошади или коровы нет, или государьския дани нечем заплатить; ино его подмочи и ссудити, а у самаго мало, ино в людях самому государю заняти, а своему христианину дати; и о них болезновати от всея душа, а от всякаго обидящаго беречи их в правде. А самому государю и людем его[5] в дому, и в селе, и на службе, и на жаловании, и во всяких посылках, отнюдь никого ни в чем не обидети: ни в пашне, ни в земле, и в в домашнем ни в каком запасе, ни в животине. И всякаго неправеднаго стяжания не желати, – благословенными плоды и праведным стяжанием жити подобает всякому человеку[6]. И видя Бог ваша дела, и такову милость, и не лицемерную любовь ко всем, и правду[7] и подаст Бог богатую милость свою и гобину[8] плодом и всякаго изобилия умножит. И милостыня твоя[9]от праведных трудов и от благословенных плодов Богу приятна; и молитву их Бог услышит, и от грехов свободит, и жизнь вечную подаст[10]. А торговые люди, и мастеровые, и земледержцы також: и рукодельничают, и пашут не крадчи, ни разбоем, ни граблением, ни поклепом; ни вылгав, ни выбожив, ни которым злохитрством, ни резоимством; но прямою своею силою, и благословенными плоды[11], и праведными труды торгуют и рукодельничают, или пашут хлеб, и всякое обилие, и всякое дело творят[12] по христианскому закону и заповедям Господним. В сем веце Богу угодит и жизнь вечную наследит.

ГЛАВА 28[1]

КАКО ЖИТИ ЧЕЛОВЕКУ[2] СВОЙ ЖИВОТ

А во своем и во всяком обиходе, и в лавошном, и во всяком товаре, и в казне, и в полатех, и в дворовом во всяком обиходе и в запасе, и в деревенском, и в рукоделии, и в приходе и в расходе, и в землех, а в долгу, всегда себя смечати[3]. Всякому человеку богату и убогу, велику и малу, и сметя по промыслу, и по добытку и по своему имению; а приказному человеку по государьскому жалованию, и по доходу, и по поместью, и по вотчине и таков себе двор строити[4], и всякое стяжание, и запас потому и люди держати[5], и одевати, и поити, и кормити, и государю служити, потому ясти, и пити, и носити и с людьми с добрыми сходитися[6] и потому жити и обиход держати по промыслу и по добытку, смотря по приходу и расход.

ГЛАВА 29[1]

АЩЕ КТО СЕБЯ НЕ РАЗСУДЯ ЖИВЕТ

А кто не разсудя[2] и не сметя своего живота[3], и промыслу, и добытку или государьскаго жалования, и своего уроку и учнет, глядя на людей, жити не по силе, займуя или не праведным имением, – и та честь будет с великим безчестием, и укоризною и поношением; и во злое время никто ему не поможет, от своего безумия стражет; от Бога грех, а от людей посмех. Ино надобе всякому человеку тщеславия и похвалы бегати, и неправеднаго стяжания[4]; и жити по силе и по промыслу и подобытку своему сметя, прямою силою. Ино житие благоприятно и угодно Богу[5], а от людей похвално, и себе и детем своим прочно.

ГЛАВА 30[1]

КАКО ПОУЧАТИ МУЖУ СВОЯ ЖЕНА[2] БОГУ УГОДИТИ И МУЖУ СВОЕМУ НАРОВИТИ[3], КАК ДОМ СВОЙ[4] СТРОИТИ И ВСЯКАЯ ДОМАШНЯЯ ПОРЯДНЯ И РУКОДЕЛИЕ ЗНАТИ, И СЛУГ УЧИТИ, И САМОМУ ДЕЛАТИ

Подобает убо мужем поучати жен своих с любовию и благоразсудным наказанием. Жены мужей своих вопрошают о всяком благочинии, како душа спасти, и Богу и мужу угодити, и дом свой добре строити, и во всем мужу[5] покорятися и, что он накажет, то с любовию и со страхом внимати и творити по сему писанию. Первое имети страх Божий и чистота телесная, якож и преже[6] указано бысть. Востав от ложа своего и очистив[7] себя, и молебная совершив, слугам[8] дело указати дневное, и всякому рукоделию и что работа дневная: ясти варити, и которой хлеб печи сытной или решетной; и сама бы знала как мука сеяти, как квашня поставити, и притворити, и замесити, и хлебы валяти и испечи, квасны и убухны[9] и выпеклися; калачи и пироги також и колко муки возмут, и колко испекут, и колко родится из четверти и из осмины, или решета, и сколко высевков[10] мера и счет знати во всем. А еству мясную, и рыбную, и всякую, пироги, и блины, и кашки, и кисель и всякой приспех печи и варити все бы сама государыня умела; ино и слуг научати умеет и все сама знает. Коли хлебы печи[11], тогда и платие мыти[12], ино с одною стряпня и дровам неубыточно; и дозирати како рубахи красныя мыют и лучее платье; и колко мыла и золы пойдет и на колко рубашек, и хорошо бы вымыть и выпарено[13], и изсушено и изкатано, и скатерти, и убрусы, и ширинки и утиральники все також: и всему тому самой счет знати, и отдати и взяти все сполна бело и чисто. А ветчаное поплатити вежливо; ино[14] пригодится нищему дати. А коли хлеб пекут, ино того теста велети отняти и пирог сделати[15], или[16] пшеничныя пекут[17] и из межьситки велети пирогов же начинити[18], в скоромныя дни со скоромною начинкою, какова лучится, а в посныя дни с кашею, или с горохом, или с соком, или с репою, или грибки, и с рыжички, и с капустою или что Бог лучит; ино семье потешение. А всякую бы еству мясную и рыбную и всякой приспех скоромной и постной, сама бы знала и умела сделати, и слуг[19] научити; те государыни добры[20] и домовицы[21]. Тако ж бы знала пивной, и медовой, и бражной, и квасной, и уксусной, и кислым щам и всякой обиход как делают и повареной и хлебной, и в чем что родится и колко с чего будет. Кали знает все добрая жена мужним[22] наказанием и грозою, и своим добрым разумом и наукою, ино будет споро и всего полно[23]. А которая женщина или девка рукодельна тем дело указати: рубашка делати, и убрус брати и шити, или постав ткати, или золотное и шелковое пялешное дело и которая чему учена, того всего досматривати и дозирати; а всякой мастерицы самой государыни прядело, и шелк[24], и золото и серебро отвесити, и тафты отмерити, и сметити, и наказати сколко чего надобе и сколко чего даст, и прикроити и примерити самой, и все рукоделие знати. А малых девок учити, которая чему пригожа; а мужним женкам, которыя черное дело делают: избу топят, хлебы пекут, и платье мыют[25] тем дают лен на себя, и на мужа, и на дети прясти; а одинокая женка[26] и девка на государя лен прядут, а из греби и пачеси на себя, или как пригоже. Все бы ведала сама государыня, которой какое дело дасть, и колко чего возмет; и сколко выделано и кто днем, мало ли много ли сделает[27], то бы сама все знала и в счете было б все. А сама бы государыня, отнюдь ни какож, ни которыми делы опричь немощи, или по мужни воли без дела не была; ино и слугам, на нее смотря, повадно делати. Муж ли придет или гостья обычная придет, а она б всегда сидела над рукаделием сама: то ей честь и слава, и мужу похвала. А николиж бы слуги государыни не будили, а ложилася бы всегда от рукоделия, молебная совершив, також бы слуг учила[28].

ГЛАВА 31[1]

ДОБРЫЯ ЖЕНЫ РУКОДЕЛЬНЫЯ ПЛАТЬЕ[2] И ВСЕ БЕРЕЖНО[3] И ЧТО КРОИТИ И ОБРЕЗКИ И ОСТАТКИ БЕРЕЖНО БЕРЕЧИ

Добрая жена домовитая и благоразумным своим промыслом, и добрым подвигом и мужним наказанием от своих трудов, что уделяет[4] полотен, и ущын, и холстов; да на что, что пригоже, то покрасит на летники и на кафтаны, и на сарафаны, и на терлики, и на шубы паволоки, и то у нея на домашней обиход перекроено и перешито; а будет слишком за обиходом наделано полотен, и ущин, и холстов, и скатертей, и убрусов, и ширинок или иного чего, ино того и продаст, и что ино надобе того купит, а у мужа на то не просит. А рубашки красныя мужския, и женския порты, то все самой кроити или дати при себе кроити, и всякие остатки и обрезки, комчаты и тафтяные и дорогое, и дешевое, и золотое, и шелковое, и белое, и красное, и пух, и торочки, и спорки, и новое и ветчаное все бы было прибрано, – мелкое в мешечках, а останки сверчены и связаны; а все разобрано по числу и упрятано, и как чего поделати ветчанаго или и новаго не стало[5], а то все есть в запасе и в торгу того не спрашиваешь[6], дал Бог у добраго промыслу и у совершеннаго разума, все дома лучилося[7]; а в торгу устанеш прибираючи, а и прибереш, ино в трое купиш, а иногда и не прибереш.

ГЛАВА 32[1]

ВСЯКАЯ ПОРЯДНЯ ДОМАШНЯ ДЕРЖАТИ ИЛИ ЧЕГО ЛУЧИТСЯ В ЛЮДЕХ ПОПРОСИТИ ИЛИ СВОЕ В ЛЮДИ ДАТИ

А ко всякому[2] рукоделию у мужа и у жены всякая порядня и снасть была б в подворьи: и плотнишная[3], и портнаго мастера и, сапожнаго и железнаго и у жены також ко всякому рукоделию и домовному[4] обиходу всякая бы порядня была; и держано бы то все бережно, где что пригоже. Ино, что не сделано себе, ни кто ничего не слыхал, в чюжей двор не идеш[5], свое без слова. А поваренная порядня, и хлебная, и пивоваренная все бы было у себя сполна: и медяное, и оловянное, и железное, и деревянное и каковая лучит[6]. А лучится у кого какая ссуда взяти или свое[7] в люди[8] скрута женьская; или свое дати платие мужское, или судно[9] какое медяное, и оловянное; и деревянное[10] и какой ни буди запас; ино пересмотрети, иного и ветчанаго, где избито[11] и порвалося[12], или которая над чем не буди притча, и что не цело, и все то исчести и сметити[13], и кто емлет, и кто дает, обема бы то было ведомо, а что весовое взвесити и всякому сосуду[14]) цена поставлена; по грехом какова притча станется, ино на обе стороны хлопотов и остуды нет, и тому платеж у кого взято. А всякая ссуда имати и давати в честь, и беречи паче своего и отвести[15]на срок: чтод сами государи того не просили, и по то не посылали, ино впредь дадут, и дружба в прок. А толко чего[16] не беречи и на срок не отнести, или испортив отдати, ино остуда в прок[17], и убыток, и продажа в том живет, и впредь никто ни в чем не верит.

ГЛАВА 33[1]

КАК ПО ВСЯ ДНИ ГОСУДАРЫНИ ДОЗИРАТИ У СЛУГ ВСЕГО И ДОМАШНИЯ ПОРЯДНИ И РУКОДЕЛЬЯ; САМОЙ ЕЙ О ВСЯКОМ БЕРЕЖЕНИИ И СТРОЕНИИ

По вся дни государыня у слуг дозирает, которые пекут и варят и всякие приспехи делают[2]. И которая служка хорошо что сделает[3] или еству сварит[4], и хлебы испечет, и колачи и пороги, или какой нибудь приспех или какое рукоделие сделает[5] по приказу и добро: и за то служка примолвить[6] и пожаловать, ясти[7]подати и по прежеписанному[8]; дворовым людем от государя бережение и жалование, по службе смотря. Кто худо не по приказу сделает, или неслушает, или ленится, или испортит что и нечисто стряпает и украдет: ино по прежеписанному наказанию учи[9]; – како от государя слугам живет, впереди о том наказание писано: как кого пожаловати, и наказывати и поучати[10]. А в горнице, и в комнотех, и в сенях, и на крыльце[11] всегда бы было чисто, и рано и поздо. А стол и суды всякие, всегда бы мыты чисто; а сама бы государыня всегда была устроена во всяком обоходе, таковы бы у нея и слуги[12] были вежливы, по прежеписанному. А с слугами бы государыня пустошных и пересмешных, ни безлепишных, ни соромских[13] речей отнюдь не говорила. Ни торговки, ни бездельныя женки, ни бабы, ни волхвы ни какож во двор ни входами[14]; понеже от тех много зла чинится, а слухам потвор. Аще ли начнут в кой двор[15] сицевы приходити, а государыня от сицевых слуг своих не возбряняет, а и сама их начнет приветати[16], – первое учинят слуг крадливых, потом блядливых; аще ли и сама государыня не уцеломудрится и не отженет их[17], горе и самой ей от них будет по прежеписанному… ныне же оставим сицевых[18], но преди пойдем[19]. А платие ходилное по грядкам, а прочее в сундукех и в коробях. Рубашки и убрусы и ширинки и все бы было хороше и чисто, и бело[20], и оберчено и укладено, и неперемято[21]; а сажение[22] и мониста и лучее платид всегда бы было в сундукех и в коробям, за замком и за печатию. Ключи бы держали в малом ларце, а всегда бы ведала[23] сама.

ГЛАВА 34[1]

КАК СЛУГ НАКАЗЫВАТИ[2] В ЛЮДИ ПОСЫЛАТИ[3] С ТЕМ И НЕ ПЕРЕГОВАРИВАТИ

А слуг своих заповедывай[4], о людех не переговаривати; и где в людех были, и что видели не добро, – того дома не сказывали бы, а что дома деется, того в людех не сказывали о чем послан, то и памятуй; а о ином о чем учнут спрашивати, того не отвечай, и не ведай и не знай и, отделавшися борзее[5], да то государю скажи о чем посылан, а их[6] вестей ни каких не сказывай[7]; ино промеж государи ни какие ссоры, ни остуды не будет; и неподобныя речи или блудныя[8], и всякое дурное дело и слово слышал и видел, то бы отнюдь не именовалося. К самому государю или государыне чья служка придет, також ничего у нея не пытати: о чем прислан в том его и отделати, да борзее и отпустити; а чюжая служка что почнет сказывати, и того у нея не слушати, да еще избранити: о чем ты прислан, то и памятуй, а иного у тебя не спрашиваем[9]. То доброму мужу и жене похвала, только у них слуги вежливы[10]. А пошлеш куды сына, или слугу и что накажеш сговорити, или что сделати, и что купити, и ты вороти, да выпроси его, что ты ему наказывал и что ему говорил сделати или купити, – и толко по твоему наказу все изговорит тебе, ино добро и пошли. А пошлеш с слугою к кому еству или питие, или что ни буди или какую ссуду, да воротя, выпроси его куды несеш? толко так скажет, как наказано, то добро. А посылай еству целу и питие вполне; ино солгать неуметь. А товар посылай сметив и смерив; а всего лутче запечатав: ино безгрешно. Да и о том слугам вопрошатися[11], что с ним посылают и без государя отдати ли, толко его у себя нет или домой отнести. А о тех делех[12] о всех не догается государь или государыня сына или слугу воротити, да допросити, куды с чем послан и что наказали, – и умной сын или слуга вежливой сам воротится и, вежливо колпак[13] сняв[14], у государя вопросит о всем и переговорит, что ему наказано, толко потому, ино добро. Куды пошлют слугу в добрые люди, у ворот легонко поколотить; а по двору идеш и кто тя вопросит: каким делом идеш? ино того не сказывати, а отвечати: не к тебе послан, а кому послан с тем и говорити; а то сказати от кого идеш, и оне государю скажут. А у сеней или у избы, или у кельи ноги грязныя отри, нос высморкати, да искусно молитва Иисусова сотворити вся сполна; а толко аминя не отдадут, ино в другие и в третие[15]сотворити по больше перваго, и ответа не дадут[16]; ино легонько поколотися[17]. Как впустят[18] и вшед святым[19] поклонитися дважды, а третей поклон настоятелю и от гусударя челобитие и посылка правити; а[20] в ту пору носа не[21] сморкать, ни харкати, ни плевати; аще ли нужа, и отшед на сторону, устроитися вежливо, а стояти[22] на сторону не смотрети, да что наказано, то и исправити, да борзее[23] к себе пойти, да тот ответ государю сказати, о чем посылал. А лучится у кого в подворьи быти, или в келии, при государе, или без гусударя ни на какие вещи[24] не смотрети[25], ни с места на место не преложити без повеления; и с собою ничего не вынести без благословения и не спросяся; а ествы и пития також не кушати, чего не повелено, то святокрадство[26] есть и лакамство, и кто на то дерзнет без благословения[27], и тому ни в чем не верят, и за очи ни куды не пошлют, по Евангелию: «в мале бе верен, надо многим поставлен будеши». А что куды с тобою послано покрыто, или повязано[28] и запечатано, и того не движи и не смотри, а ествы и пития, что послано, того не вкушати[29]; каково послано, таково и отнести, толко тут осмотрить как дают: цело ли, и в полне ли посылают, чтобы тамо неверка не было, куды то нести[30]. А умной сын или[31] слуга, женка или девка, куды посылали, хотя вражду, и брань, и гнев, и дурно, что видя и слышав, шед во своем дому, того всего не говорити и не сказывати, что велено и приказано, то и править. А у кого совершенный разум: и он где слышав[32] вражду – любовь скажет; а где кленут и лают, – и он похвалу и благодарение поведает. И от таковых умных, и вежливых, и благоразумных слуг, промеж добрых людей любовь сводится[33], и таких умных слуг берегут и жалуют, как детей своих, и советуют с ними о всем[34].

ПОВЕСТЬ ОТ СТАРЧЕСТВА О ТОМ ЖЕ

Воспомяни мудраго ученика у онаго старца в пустыни живуща, отшельнику некоему пришедшу в келью, на время, покоитися[35]. И зависть вражия обьят старца; и посылаше ученика своего озлобити живущаго в келии, и выслати из нея. Благоразумный ученик прихожаше ко страннику, мир и благословение нося от старца, вместо зла. И по времени от бесовскаго надмения, сам старец идяше, хотя странника бив, изженути из келия. Добрый ученик тече на предь старца, являше страннику отнего мир и благословение и посещение старче. Востав же, странник скоро тече на стретение великаго старца, кланешеся ему до земли. Умилив же ся старец и зазре себя; и бысть между ими любовь и прославиша ученика.

Которой ненаказаной и нечювственной раб и рабыня, куды его пошлют, и толко где его непочтят, и иснити не дадут, и он на подворье вся нелепая сказывает про мужа и про жену; а где люди лукавые, и глупаго слугу подпоят, и из ума выводят, и спрашивают про государя и про государыню; и безумные все говорят, что и не вместимо сказати, и лишное прилыгают. А толко государь или государыня его оскарбят; и он в людех на них вся непотребная износит. И от таковых безумных слуг всякая вражда содевается, и посмех, и укоризна, и срамота. И того ради разсудным мужам и женам учити детей своих и слуг, и раб, и рабынь всякому страху Божию и вежеству, яко ж преж писано бысть. А потому ж знати: глупой слуга, толко пришед из люди все переговаривает, тот и в людех про домашнее переговаривает. А толко государь и государыня у слуг своих любят переговор, и клевету или суждение[36], и пересмех, и всякую ложь, – тот государь и государыня сами себе, и дому свому, и детем, и слугам врази[37]; ревнуют всему лукавому, и ненависти[38] и всяко и лжи, и вражды; и в таких страстех за скудость ума погибают; и всякая добродетель и любовь в таких ссорах враждою совершается и конечною ненавистию; и душевне и телесне в сем веце и в будущем от Бога зле постраждут. А умныи[39] государь и государыня, которые разсудны, сами того не любят и не творят оговоров, и посмехов, и укоризн, лжи и клеветы, и всяких лукавых речей о людех не переговаривают и у людей не слушают[40]; а про них кто осуждает и укоряет, в очи и за очи, или кто скажет, что на них таковы речи неподобные говорят – и премудрым своим разумом сия разсудити[41]: аще по делом поношение, – от того возвращатися, и за то бити челом, яко по делом обличают или укоряют, и досажают сия терпети и со благодарением восприимати по Апостолу: «блажени укоряеми[42] – терпим, и хулими не мстим, за сия вражды и любовь к ним имеем». По апостолу же Павлу, еже уча глаголет: «аще алчет враг[43], твой ухлеби его, аще жаждет, напой его; – се бо творя, углие огнено собираеши на голову его. И детей и слуг своих також научай: аще видиши братне согрешение, и не известиши, и не облечиши его о сем на едине, по сем в посмех и во укоризну положиши то, и будеши яко язычник и мытарь, и греху его причастен будеши. Аще уведаеши[44] братне какое согрешение[45] и всякое ненадобное дело известно, и о сем на едине в тай возвести ему с любовию; аще послушает тебя, и перестанет от таковаго неподобнаго дела, – то спасл еси душу брата своего, и от Бога за се мзду восприимеши. Аще не приимет твоего словеси, и еще в ненависть положит: и ты свободен того греха, а он сам о себе ответ даст пред Богом. И видя Бог добрая дела ваша и мудрое смирение, и благоразсудное наказание, и Бога ради терпение, и подаст богатую милость, и грехом свободу, и жизнь вечную. Писано о том в двадесят четвертой[46] главе.

ГЛАВА 35[1]

ПО ВСЯ ДНИ ЖЕНЕ С МУЖЕМ СПРАШИВАТИСЯ О ВСЕМ, И СОВЕТОВАТИ[2] КАК В ЛЮДИ ХОДИТИ И К СЕБЕ ПРИЗЫВАТИ И С ГОСТЯМИ ЧТО БЕСЕДОВАТИ

По вся дни мужа[3] спрашивалася и советовала о всяком обиде, и воспоминала, что надобе[4]. А в гости ходити, и к себе звати, и ссылатися с кем муж велит; а гости[5]коли лучатся[6], или самой где быти за столом сести и лутчее платие переменити; а отнюдь беречися жене от пиянаго пития: муж пьян дурно, а жена пьяна и в миру не пригоже. А с гостями беседовати о рукоделии, о домашнем строении, как порядня домашняя весть и кокое рукоделейце сделати. Чего не знаешь, и того у добрых жен спрашиватися вежливо и ласково; и кая что укажет и на том низко челом бити. Или у себя[7] в подворьи, у которыя гостьи, услышит добрую пословицу: и как добрыя жены живут, и как порядня ведут[8], и дом свой строят, и как детей и слуг[9] учат, и како мужей своих слушают, и с ними спрашиваются, и им повинуются[10] во всем, – и то все себе внимати; а чего добраго не узнаеш, ино спрашивается вежливо; а дурных, и пересмешных, и блудных речей не слушати, и не веровати[11] о том; или в гостех увидети добрую порядню, или в естве и питии, и всяких[12] приспехах[13], или какое рукоделье необычно; и[14] домашняя порядня хороша; и которая жена смышленная, и умная в речех, и в беседах, и во всячом обиходе; или где слуги умные, и вежливы[15], и рукодельны и всякому доброму смышлены: и всего того добраго примечати, и внимати; или чего не знает, и не умеет о том спрашиватися вежливо и ласково и кто что добренко скажет[16], и на том бити челом; и, пришед на подворье, то все мужу пересказати на покое[17]. С такими то с добрыми женами пригоже сходитися: не ествы и пития деля[18], но добрыя беседы и науку для; да внимати то в прок себе; а не пересмехати ни в чем[19], и не переговаривати ни о ком; и спросят о чем про кого, и учнут ума пытати: ино отвечати – не ведаю я того, ничего не слыхала и не знаю, и сама не о надобном не спрашиваю; ни о княгинях ни о боярынях, ни о судах[20] не пересужаю[21].

ГЛАВА 36[1]

ЖЕНАМ НАКАЗ И ПЬЯНСТВЕ И ПЬЯНОМ ПИТИИ И СЛУГАМ ТАКОЖЕ; И О ПОТАИ НЕ ДЕРЖАТИ НИЧЕГО НИГДЕ[2]; И У СЛУГ ЛЖИ И КЛЕВЕТЫ НЕ СЛУШАТИ; И БЕЗ УПРАВЫ ИХ НЕ ДЕРЖАТИ; И КАК НАКАЗЫВАТИ ГРО3ОЮ ЖЕНУ, ТАКОЖ И КАК В ГОСТЕХ БЫТИ И ДОМА У СЕБЯ УСТРАИВАТИ ВО ВСЕМ

А у жены бы отнюдь, ни какоже, ни которыми делы, пьяное питие не было: ни мед, ни вино, ни пиво, ни гостинец. Питие бы было в погребе, на леднике. Пила б безхмельную брагу и квас, дома и в людех. Аще ли приидут отколе жены о здоровии вопросити[3], тем пития пьянаго не давати ж; а свои женки и девки до пьяна не поити ж ни дома, ни в людех. А жене в таи мужа своего не ясти и не пити; и похоронок на еству и на питие, потаи мужа своего не держати; а у подруг и у племяни, потаи мужа своего, пития, и ества, и зделки[4], и поминочков[5] не просить и самой не давати, и у себя чюжаго[6], без мужня ведома, не держати и о всем советовати с мужем, а ни с холопом, ни с рабою. И отнюдь беречися всякаго зла; а слуг[7] своих ложными словесы мужу своему не оговаривати, и посердки[8] не держати; кто что сбродит и то мужу сказати прямо без прибавки[9]. А мужу и жене ни какож не слушати безлепиц, не доносити; а чего сама не может управити, которое безделное[10] дело и то мужу сказати в правду, а в чем которая женка или девка согрешит, и не послушает слова, и наказания не имеет[11], и какову пакость учинит – и о том о всем с мужем переговорити: и каково кому наказание учинити. А гостьи коли лучатся, и их подчивати питием, как пригоже; а самой пьянаго пития[12] не пити. А еству и питие, и всякой обиход, приносит один человек сверестной, и кому приказано, а ин мужеск пол тут, рано и поздно отнюдь, ни какож ни которыми делы, не был бы, кроме того кому приказано[13] что принести, или о чем воспрашатися[14], или о чем приказати; и всего на нем пытати: и безчиния и невежества; а иному ни кому тут дела нет. А завтракати мужу и жене отнюдь не пригоже, кроме немощи, ясти и пити в подобное время.

ГЛАВА 37[1]

КАКО ПЛАТИЕ ВСЯКОЕ ЖЕНЕ НОСИТИ И УСТРАИВАТИ

А платие, и рубашки, и убрусы на себе носити бережно по вся дни, не изваляти, ни изсуслати[2], и не излити, и[3] на мокре не сести, ни положити, и все снимаючи с себя класти бережно[4], и слуг учити також[5]. А самому государю и государыни, и детем, и слугам[6], каково лучится сделати дело, ино оболочится в платие повсядневное, и[7] в сапоги також; а в праздники в ведро, и при людях, или к церкви итти, и в гости, – ино лутчее платие надети из утра, да бережно ходити; от грязи, и от дождя, и от снега беречь[8], и питием, и ествою, и салом[9] не изсуслати; на руде и на мокре не сести. От праздника, и от церкви, или из гостей пришед, лутчее платие с себя снем, пересмотрети, и высушити, к вымяти[10], и вычистити, и хорошу укласти где живет[11]. И[12] повседневное всякое платие, верхнее, и нижнее[13], и сапоги всегда было б изомыто, а ветчаное иззаплачено[14], и изшито, ино людем пригоже посмотрети, и себе мило, и прибылно, и сиротине дати – ино спасенние. А платие всякое[15] и всякой наряд, складчи и свертев хороше, положити[16] в сундук или в коробью и за замком бы всегда было, ино всякой притчи не страх.

ГЛАВА 38[1]

КАК СОСУДЫ ВСЯКИЕ И ВО ВСЕМ[2] УСТРОЕНО ДЕРЖАТИ, И КАК[3] ИЗБНАЯ ПОРЯДНЯ ДЕРЖАТИ[4], ГОСУДАРЮ СЛУГ УЧАТИ И МУЖУ НАД ЖЕНОЮ ТОГО НАДЗИРАТИ И УЧИТИ И СТРАХОМ СПАСАТИ

Стол, и блюда, и ставцы[5], и всякие сосуды, ковши и братины, воды взогрев[6] из-утра избу затопив, перемыти[7], и вытерти и высушити; а после обеда[8] и в вечере також и ведра, и ночвы, и квашенки, и корыта[9], и сита, и решета, и горшки, и кувшины[10], и корчаги – потому вымыти, и выскрести, и вытерти, и высушати, и положити в чистом месте, где пригоже быти. Всегда б всякие сосуды, и порядня всякая чиста была, и в чистоте[11]. А[12] по хоромам и подвору сосуды не волочились бы, а ставцы, и блюда, и лошки, и ковши, и братины по лавке и по избе не валялися[13], где устроены быти, в чистом месте лежало бы опрокинуто ниц, а в каком сосуде, что есть есвы и пития, то бы покрыто было, чистоты ради; а всякие сосуды с ествою, и с питием, и с водою, или квашня[14] всегда было покрыто, а в избе и повязано от сверчка, и таракана и от всякия нечистоты[15], а лутчие сосуды, ставцы, и блюда, и лошки, и ковши, и братины, или у кого есть и серебренные, и оловянные, и всякие сосуды лутчие держати за замком, в крепком месте; как праздник или гости, и[16] при добрых людех выимати к столу, а после пира пересмотрив, перемыти, исчести и опять устроити за замком; а вседневные суды держати всегда по прежеписанному. А[17] в избе стены, и лавки[18], и окна, и и двери, скамьи потомуж вымыти и вытерти, а пол и на крыльце, и в сенях, выскрести и вымести, всегдаб было б чисто; и лесница и нижнее крыльцо потому же чисто б было[19]; да перед нижним крыльцом соломы[20] положити, или прутеничек устроив положити, грязныя ноги отирати, ино лестница не грязнится[21]; а у сеней[22] войлочек положити потому же, грязи для[23], а в грязное погодие у крыльца солома грязная переменяти[24], а класти иная, а будет прутеник, ино вытрясывати и ополаскивати, також и ополаскивати; також и у сеней войлок велети прополоскати и, высушив[25], опять положити тут же[26]. И то у добрых людей и у порядливой жены, всегда дом чист и устроен[27], а на дворе и перед вороты[28] на улице, всегда слуги сметие приметают, а грязь[29] и в зиме снег пригребати; а щепа, и дерево и всякой рупос прибирати; и всегда бы было устроено чисто; а в конюшне, и в хлеве и во всяких службах устроено[30] все, по чину упрятано[31], и причищено, и приметено; всегда в доброй дом и во устроенной, как в рай внити. Всего бы того и всякия порядни жена смотрела и учила слуг[32] добром и лихом; неимет слово, ино ударити. И увидит муж, что непорядливо у жены и у слуг, или не потому о всем, как в сей памяти писано, ино бы умел свою жену наказывати и учити всяким разсуждением; аще внимает и все потому творит, ино любити и жаловати[33]. Аще жена по тому учения[34] и наказанию не живет и тако не творит, что в сей книге писано, и сама того не знает, и слуг не учит – ино достоит мужу жена своя наказывати и ползовати страхом на едине, наказав, да пожаловати и примолвити, и любовию наказати и разсуждати. А мужу на жену не гневатися, також и жене на мужа не гневатися, всегда жити в любви и в чистосердии. И слуг[35] також, по вине смотря и по делу, учити, и наказывати и раны возлагати[36]; а государыни за слуг печаловатися по разсуждению, ино слугам надежно. А толко жены, или сына, или дочери слово и наказание не имет, и не слушает, и не внимает, и не боится, и не творитит, как муж, или отец и мати, учат, ино плетию постегати, по вине смотря, на едине, а[37] не перед людьми и, поучив примолвити и пожаловати, и ни какож не гневатися друг на друга[38]. А про всякую вину по уху и по лицу[39] не бити, ни кулаком под сердце, ни пинком, ни посохом не колоти, ни каким железным, и деревом[40] не бити. Кто с сердца, или с кручины так бьет, многие притчи от того бывают слепота и глухота, и руку и ногу вывихнет[41], и главоболие, и зубная болезнь; а у беременных жен и детям в утробах бывает повреждение; а плетию с наказанием бити[42] и разумно, и болно, и страшно, и здорово. А толко великая вина[43], и за ослушание и небрежение, ино снять[44] и рубашка и плетию вежливенко бити, за руки держа, по вине смотря, да побив и примолвити, а гнев ни какож бы не был[45]; а каково будет поношение, или речи неподобны[46], или своя примета[47] и истино, аще покается без всякаго лукавства, ино милостивно наказати и пожаловати, по делу смотря. А толко невиновато дело, ино оговорщиков не попущати, и впредь вражда б не была; а толко по вине и по обыску прямому; а не кается и не плачется о грехе своем и о вине: то уже наказание жестоко подобает[48] дати, чтобы виноватой был в вине, а правой в правде, а всякому греху покаяние[49].

ГЛАВА 39[1]

КАК ЗАПАС[2] КУПИТИ ПОТРЕБНАЯ У КОГО СЕЛ НЕТ; И ВСЯКОЙ ДОМАШНЕЙ ОБИХОД И В ЛЕТЕ, И В ЗИМЕ ДЕРЖАТИ И ДОМА ЖИВОТИНА ВСЯКАЯ ВОДИТИ, И ЕСТВА, И ПИТЕЕ ДЕРЖАТИ ВСЕГДА

Годовой обиход домовитому человеку, мужу и жене, у кого поместья, и вотчин, и сел, и пашен нет; ино купити годовой запас хлеб и всякое жито, в зиме на возех; а полтевое мясо, також и рыбу всякую[3], и длинную осетрину, на провес[4], всякую и бочешную в год, и семжину[5] и икру, и сиговую, и черную; и мед пресной; и которая рыба в лето ставити, и капуста, те сосуды[6] в лед засекати глубоко, и питие запасное потомуж, покрыв и лубком[7] засыпати; как то надобится в лете, тогда свежо и готово. А летом[8] мясо покупати на обиход домовитому человеку, – купити баранца и дома облупити, и овчинки скопити человеку на шубку, а бараней потрох прибыль в столе, потешение у порядливой жены или добраго повора промыслом: из грудины ушное нарядити; почки начинити; лопатки изжарити; ножки, яички начинити; печень изсечи с луком, перепонкою обвертев, изжарити на сковороде; легкое с молоком, с мучкою с яички приболтав, нальет[9]; баранью голову, мождечок с потрошком уху нарядит; а рубец кашкою начинити; почешные части сварити, или, начинив, изжарити и так[10] делати из одного барана многа прохладу. А студень на леду держати хороше же, что останется. А в лете мясо покупати под расход в пятницу, в понедельник, в среду и в иной день на всю неделю купити вдруг, недодаст у гривны алтына, и осоля[11] да на леду положити дни два или три, или неделю не испортится. А с Семеня дни купити яловицу, или колко надобе[12] не вдруг изгодою, как подешевле, и ты догды болши купиш, мясо солишь в год и на провес; а потрохом семья сыта во всю осень, а на коже, на сале половину денег возмеш[13], а захош про себя сало и ты перетопиш, ино на год с вологою. Потрох, голову, уши, губы, скорыньи[14] и мозг, кишки, рубцы, осердие, окорение, ноги, печень женки переделают, да кашею салною, обвариваною[15] начинити: каша овсяная, и гречневая, или ячная, или иная какову хочешь. А не приядят потрохов осенью, ино и в рожественный мясоед пригодится; а рубцы, и губы, и уши, и ноги коровьи, на студень во весь год пригодятся, коли не делай квашинину, всегда прохлада. А свиньи доморощенныя в осень бити, потому ж; полти в год осолити, а голова[16], и ноги, и желудки[17], и кишки, и потрох, и спина, в осень и в зиме пригодится. У промышленнаго мужа, и у промышленныя жены, и у добрыя порядни во всем спорыня, а всегда прохлада себе и семье и гостям, а неубыточно; по что в торг, и ты в клеть. А гуси, и утки, и куры, кто дома водит, и толко у воды, ино вскормит в лете ничим же, а на год с запасом здоровым[18]. Кто про себя коровы держит дойныя: в лете корм на поле, а дома всякаго корму много у добрыя порядни, в лете и в зиме гуща пивная, и киселная, и квасная, и кислыщная[19], и отруби овсяные, и высевки ржаные, и пшеничные, и ячные, и заспу делают[20] и толокно. И в осень капусту солят, и репу, и мортковь запасают; и у всего того хренье[21] листие, и корение, и обрезков, и крох в скатерти и в столе, и в веке хлебном, и по полицам, и по чюланам, и по лавкам[22], крохи, и остатки, и обедки, – и домовитая, и добрая государыня и кому приказано[23], все то обирает, и по судом ставит, и тем животину: лошади страдныя, и коровы, и гуси, и утки, и сьвиньи[24], и куры, и собаки, кормит; себе неубыток, а приплоду всего прохладу много. В столе прибыль себе и гостю. Толко дома родится: куры, и яица, и забела, и сыры, и всякое масло, – ино по вся дни праздник и прохлада, а не в торгу куплено. Всякие пироги[25], блины, трубицы, кисель, молоко[26], коли чего похотел[27], а все дома готово. А сама жена то умеет сделати и слуг научит рядить; от таковых домочадцев мужи богатеют. А толко у таковаго[28] человека[29] и у добрыя жены, Бог пошлет приплод болши: у коров, и у свиней, и у уток, и у гусей, а у коров молока, и сметаны, и масла, и сыров, а у куров яиц, – сами всегда ядят воложно; да и людей кормят и милостыню дают от праведных трудов и от благословенных плодов; а излишное и упродаст[30], на кую[31]потребу пригодится; – благословенная денежка, ино милостыню Богу дати приятна. А у молодчева[32] человека или у вдовы запасу того нет, толко чем животина кормить, что в сей главе писано, – коровка дойная есть[33]; ино кормити сеном, или солому яровую изрезати, да мукою посыпати овсяною, или иная какая лучится мяхкина[34]; да кипятком обложити[35] в желобу, или вели чем[36] полити, да перед собою кормити, да издоити[37]. А доиленка и вские судки молочные, теплою водою мыти, и вытерти, и высушити, и в чистом месте, опрокинув держати; чтоб ни кошка, ни собака, ни мыш, ни малые робята не лизали и не пакостили; а корова издоив[38], молочко в ситичко процедити, да всякие молока, укрыв, в чистоте держати[39]; а самой руки умыв чисто, и платие[40] ветчаное чистое надети, и воды теплой припасти[41] и постиралце на плече бы было, и у коровы вымя и соски вымыти, и потиралцем чистым вытерти, и в чистом месте издоити; и во всяком бережении, и стул чист же держати, и коров на мяхке держати, и корм класти, какой лучится. А лошадки и кобылы по вся дни и таким же кормом христианену в избе перед собою кормити[42], ино плодовито и служимо, и то им за овса место. И телята, и ягнята молодые, и козы, и свиньи, и гуси, и утки и куры перед собою кормити, и какой корм которой животине[43].

ГЛАВА 40[1]

А ТОЛКО МУЖ ПРИПАСЕТ В ГОДУ ВСЯКАГО ЗАПАСУ И ПОСТНАГО[2] И ПОТОМУ УСТРОИТИ

А толко у мужа в году припасется[3] ржи, и пшеницы, и ячмени, и овса, и гречи, и толокна, солоду, и гороху, и конопли, и всякия запасы, – и в пост во всякия ествы, поременяя по вся дни делают сами жена и слуги; и семья сыта и прохдадна, и гостя употчивают без убытка; которые будуть ествы постныя похочет, то и сделают. Масло конопляное дома[4]: и заспа всякая, и мука, и пироги, и блины, и соцни[5], и трубцы делают и всякие каши, и лапши гороховое, и цеженой[6] горох, и зобанец, и кулдумцы[7], и варенои, и соковые ествы: пироги с блинцы, и с рыжики, и с груздми, и с маком, и с кашею, и с репою, и с капустою, и с орешки в соку, и коровайцы с чем Бог послал. А у добраго человека и у порядливой жены толко запасено[8] в пору. Коли рыбу свежую купячи, иную солить, иную вялить, иную подпаривать[9], иную сушить мелкую, иную в муку толчет, в пост во щи присыпают, коли пригоже; или бочку и две купить рыбки просолные имех (?) сущу, ино в постные дни про гость и про себя. Коли свежей рыбе не быти, и в пост ведикий преже[10]: ретка, хрен, капуста, расол и иные земные[11] плоды, что Бог послал. А в иные, по гостям смотря, икра, и вялая[12] рыба, и прутовая, и подпариваная, и ухи пластовые, и шипаные, подпариваные, и всякие потрохи[13] и в пирозех, и в каше, и ягль, – и всякой снет[14], и всякие пироги, и каши, и кисель, и блины и всяких еств[15] у доброй порядни и постных много, а все Бог послал дома, в торгу ничего не купиш[16], а и не будет в запасе чего, ино купити в пору, ино у рубля алтын пяти, шти не додаст, а не в пору, гостя для и себя, что понадобится купити и ты иногда того и в торгу не добудеш, а и добудеш не в пору и ты купиш в три цены, а не милой кус[17]. А у добраго человека, и у порядливой жены, и у добрыя и у смышленных и у разумных[18] людей и у годоваго запасу, и у рухляди, и у еств, и у пития, и у хлебнаго, и у воложнаго, и у мяснаго[19], у рыбнаго, и у ветчиннаго, и у салонины, и у вялаго, у ветряняго, и у просолу, и сухари, мука, и толокно и иной запас: мак, пшено, горох, масло, конопли, соль, дрова, солод, хмель, мед, мыло, и сало[20], и всякой запас, чему мочно впредь быти[21] и не изгноено. А всякого бы году во всяком обиходе, и в запасе сходилося, в иной год и чего не родилося или дорого, ино тем запасом, как припасено даром проживет, а нужнаго, и болнаго, и недостаточнаго ссудит, подможет, кому как пригоже. Как чего изобилно припасено в дешевую пору[22], ино в дороговлю и продасть; ино сам ел, и пил, и носил даром, а денги опять дома. Добраго человека и добрыя жены, ни как[23] ни в чем меженина не имет. А старые запасы держати на многие лета, кои не портятся.

ГЛАВА 41[1]

КАК ОГОРОД И САДЫ ВОДИТИ

У котораго человека огородец есть, и кто пашет огород сам ли государь дозирает[2], или кому приказано. Первое огорода[3] с весны перекрепит, чтоб в огород ни собаки, ни свиньи и всякой животине, ни курам взоити бы ни откуды не льзе[4], ни с чужаго двора, ни с своего; ино яблоням и всякому плоду пакости нет, а с соседы остуды. Только от тебя твердо, твоей животине к ним не уметь[5], а их к тебе; двор бы был по томуж везде крепок, горожен или тынен; а ворота б всегда приперты, к ночи и замкнуты; а собаки бы сторожливы[6], а огород бы всегда был замкнут; да кому приказано, тот бы всегда его берег день и нощь, всего в нем дозирал. И как гряды в весне копати, и навоз класти[7], и засыпывати с садилом[8] и на дыни паровыя гряды готовити, и всякия семена водити[9] у себя и посадив или посеяв всякие семена и обилие в пору поливати, и покрывати, и от морозу всегда беречи; и яблони подчищати и суша вырезывати[10], и почки разсаживати, и пеньки и почки прививати, гряды всякое обилие полоти, и капуста от червя и от блохи беречь, обирати и отрясывати. А подле тына, около всего огороду, где крапива ростет, тут борщу насеяти[11]; и с весны его варити[12] щи и разведеной борщ делати, и того в торгу не купиш и нужному, Бога ради, даш, ино спасение, а толко у молодаго человека, ино и упродаш на иную вологу. А как насадит капусты и свеклы посеят[13], – капуста[14] листие варити, как учнет витися в клубы[15], толко часто, ино изретка секучи варити; а лист, обламываючи животина кормити. А в ту пору и до осени борщь режучи сушити и в плетницы плести[16]; ино всегда пригодится в даль в год; а капуста и свеколно[17] во все лето варити; а в осень капуста солити, а свеколной росол ставити; а огурцы солити же; а в лете прохлажается: яст дыни, и стручие, и морковь, и огурцы и всякий овощ; а чего Бог пошлет поболше[18], ино упродаст. А сад разводити про себя; ино привитка[19] от древа до древа три сажени и больши, ино яслони[20] велики, и обилию и всяким овощем рости не помешают. Как будет густо от ветвия под древием не ростет ничто[21]. А подушек яблочных, и что поспело: огурцы, дыни и всякой овощь в пору бы обирати, и что про себя сести, или поблюсти, или в год поставити, и что солити, и квас поставити яблока, и груши, или в патоке ягодной и вишневой морс; и в дешевую пору грибы сушити, и грузди, и рыжики[22] и всякой овощь, которой солити и в год ставити, или чего упродати, то бы все было удержено. А семяна бя всякия у себя водити: ино[23] прибыль в торгу того не купиш, а будет с лишком, и ты и упродаш[24]. А пошлет Бог каких овощев в своем огороде, ино в начале убрати, что поспело от всяких плодов, первее к церкви Божии принести, ино священники освятят, да сами вкушают и строителя винограда да благословят, и ко отцу дховному в дом посылати же. Аще доволно, ино и церковникам послати же и убогим и нищим також дати от своих праведных трудов и от благословенных плодов. И в виноград свой священнический чин призывають же вкушати и благословляти, а в селех пошлет Богь також творят: от плодов своих приносят к церквам Божиим и ко священником, где приходят молитися. Подобает от всякаго обилия сиротам и убогим даяти[25] и по монастырем убогим дают же и тако творяще, да благословен будет дом его Богом и виноград, и село его, и нива, и пажить, и скоти и всякое животное. Усугубит Господь и семена плодовита, и исполнит Господь в дому его великия благодати, и свободу грехом дарует, в сем веце милость Божию получит, а в будущем жизнь вечную наследит.

ГЛАВА 42[2]

В СЕНИЦАХ СЕНО И В КОНЮШНЯХ ЛОШАДИ, И НА ДВОРЕ ЛЕСОВОЙ И ДРОВЯНОЙ ЗАПАС УСТРОИТИ И ВСЯКАЯ ЖИВОТИНА

В сенницах было бы сено устроено, и не изрыто, и не разволочено по сеннице[3], и по крыльцу, и по двору не разстаскано; всегда бы было убрано и подметено, и в ногах[4], и в грязи не затоптано и не накапало бы, и не навияло бы, и не гнило[5]. А солома по томуж былаб в кровле; и прикладено, и убрано, и очищено, а не разволочена[6] б была. А в конюшне дозирати по вся дни, сена класти в ясли, как бы лошадям сести, а вон[7] бы не рыли; а соломка под лошади слати[8]; а на воду бы лошади водити бережно, робята бы на них не гоняли, и вываляти, и вычесати, и на дваре из жолоба овсом кормити; а в лете подкупывати[9] и холодити. А коровам, и гусям, и уткам, и курам, и свиньям, и собаким корм давати, как бы сели; и в хлев солома слати и подгребати; и скот накормя поити и вода ставити. А животине и собакам[10] на то свой суд держати, а чистых судов не поганить. А во всех службах ходити в вечери, и ночью, и утре с фонарем, а в фонаре была бы свеча с огнем, а в конюшне[11], и у соломы отнюдь[12] из фонаря свеща не вынимати, всякия для притчи. А бревна бы[13], и доски, и драницы, и усечки[14] дощаныя, и бревенныя и всякия устроити в стороне, где пригоже, а не на дороге; а бревна, и доски, и драницы были бы на подкладках; а только под кровлею то лутче, чтоб в сухе и не навеяло бы и не намокло. Дрова и щепы, только сухи, ино и топятся хорошо, и сужке приступится[15] хорошо и не угрязнится, ни уваляется.