Праздничная Минея (на цсл., гражданский шрифт, с ударениями)

Ирмо́с: Яко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припев: Священному́чениче Вави́ло, моли́ Бо́га о на́с.

Свои́ми кровьми́, я́ко Моисе́й Чермно́е мо́ре, безво́лненно проше́д, Вави́ло блаже́нне,/ Бо́гу побе́дную песнь вопия́л еси́:/ воспои́м Го́споду, я́ко просла́вися.

Ты земны́х преоби́дел еси́ жела́ние,/ Боже́ственному повину́в жела́ние, е́же жи́ти, Вави́ло блаже́нне,/ Христо́ву гряды́й ви́дети красоту́.

Пребоже́ственныя Тро́ицы я́ко сый рачи́тель,/ с тремя́ у́мерл еси́ о́троки, ра́дуяся, Вави́ло блаже́нне,/ при́сно приводя́ ду́ши сия́ жела́нием.

Припев: Пресвята́я Богоро́дице, спаси́ нас.

Богоро́дичен: Своего́ прие́мши Соде́теля, я́ко Сам восхоте́,/ из безсе́меннаго чре́ва Твоего́ па́че ума́ воплоща́ема, Чи́стая,/ тва́рей и́стинно показа́лася еси́ Влады́чица.

Ин кано́н проро́ка, его́же краегране́сие: Моисе́й, проро́ков пе́рвый, да похва́лится словесы́. В Богоро́дичнах же: Кли́ментово. Глас 4.

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Припев: Святы́й проро́че Бо́жий Моисе́е, моли́ Бо́га о на́с.

Моисе́й проро́ков да восхва́лится пе́рвый,/ я́ко пред Бо́гом бесе́довав пе́рвый Я́ве лице́м к Лицу́,/ не в гада́ниих рече́ний, но я́ко в ви́де пло́ти ви́дев Того́.

Я́ко боже́ственна народоводи́теля и изба́вителя тя/ ро́ду твоему́ Изра́илю, Моисе́е богови́дче, даде́ Бог,/ Отцу́ я́коже помоли́ся,/ обетова́ния пома́занием провозвеща́я твое́ рожде́ние.

Слава: Му́дрости тя сокро́вище обрето́ша родны́я доброде́тели, сокрове́но зна́нием Бо́жиим,/ я́коже в ковче́зе, богови́дче Моисе́е;/ тем тя воспита́ше цари́ца и Боже́ственный Про́мысл.

И ныне, Богоро́дичен: Устраши́ся Моисе́й, ви́дев пресла́вное в пе́рвых виде́ние,/ купине́ и пла́меню стра́нное смеше́ние, Бо́га из Де́вы Ма́тере прообразу́ющее Нетле́ннаго,/ Его́же, мину́в времена́, ви́де пло́тию.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Припев: Священному́чениче Вави́ло, моли́ Бо́га о на́с.

Несть свят, я́коже Ты, Го́споди Бо́же мой,/ возвы́сивый рог ве́рнаго Твоего́ Вави́лы/ и венча́в его́ венце́м испове́дания Твоего́.

Му́чеников бысть кре́пость, Го́споди, Крест Твой,/ утверди́вый о́троки с блаже́нным Вави́лою/ и низложи́вый те́ми пре́лести безбожныя де́рзости.

Кре́пость оскуде́, Христе́, диа́воля в коне́ц:/ незло́бивыми бо детьми́ и боже́ственным Вави́лою побежда́ется кре́пкий/ и посмева́емь есть, от них поруга́емь.

Припев: Пресвята́я Богоро́дице, спаси́ нас.

Богоро́дичен: Боже́ственнаго рождества́ Твоего́, Чи́стая,/ вся́кий естества́ чин прехо́дит чу́до:/ Бо́га бо преесте́ственно зачала́ еси́ во утро́бе/ и, ро́ждши, пребыва́вши Присноде́ва.

Ин. Ирмо́с: Лук си́льных изнемо́же,/ и немощству́ющии препоя́сашася си́лою,// сего́ ра́ди утверди́ся в Го́споде се́рдце мое́.

Припев: Святы́й проро́че Бо́жий Моисе́е, моли́ Бо́га о на́с.

Весьма́ неизрече́ннаго зна́ния испо́лнился еси́, богови́дче,/ Дух Святы́й чрез А́нгела/ дре́вних научи́ тя зна́нию я́сно.

Нося́й све́тло Боже́ственныя зари́,/ богозна́меньми удиви́л еси́ Еги́пет,/ претворя́я стихи́й пресла́вне естество́, прему́дре.

Слава: Озаря́ет кра́сное добро́ты твоея́/ от Боже́ственныя зари́ све́тлое, блаже́нне, жи́тельство/ и к Боже́ственней несы́тно вся привлече́ красоте́.

И ныне, Богоро́дичен: Взя́лся еси́ стра́шным виде́нием ко ужа́сному зре́нию, прему́дре,/ но возбрани́ глас Го́спода,/ ро́ждшагося из Де́вы пло́тию.

Конда́к проро́ка, глас 2: Лик проро́ческий с Моисе́ем и Ааро́ном/ весе́лием днесь весели́тся,/ я́ко коне́ц проро́чествия их на нас испо́лнися:/ днесь сия́ет Крест, и́мже нас спасл еси́;// тех моли́твами, Христе́ Бо́же, поми́луй нас.

Седа́лен священному́ченика, глас 3. Подо́бен: Боже́ственныя ве́ры:

Точа́ ве́ры испове́дание, пре́лесть угаси́л еси́ злосла́вия, обличи́в и́дольское безбо́жие,/ и, всесожже́ние Боже́ственное быв, чудотворе́ньми ороша́еши концы́:/ о́тче преподо́бне, Христа́ Бо́га моли́ дарова́ти нам ве́лию ми́лость.

Сла́ва, ин седа́лен, проро́ка, глас 4:

Проро́ков всех тя пе́рваго я́ко су́ща, благоче́стно ве́дуще, восхваля́ем ве́рнии:/ пе́рвый бо Бо́га ви́дел еси́,/ я́коже мо́щно бя́ше челове́ку ви́дети.

И ны́не, Богоро́дичен:

Пречи́стыя ру́ки Твоя́, Де́вомати, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

Крестобогоро́дичен: На Дре́ве ви́дящи воздви́жена Сы́на Твоего́, Пречи́стая,/ утро́бою ма́тернею растерза́ема, жа́лостно взыва́ла еси́:/ увы́ Мне, ка́ко заше́л еси́, Све́те Мой безле́тный.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Припев: Священному́чениче Вави́ло, моли́ Бо́га о на́с.

Христо́с моя́ си́ла, Бог и Госпо́дь, пред суди́щем вопия́л еси́,/ мучи́тельских преще́ний небоя́знен, священному́чениче Вави́ло,/ в Го́споде ра́дуяся.

Же́ртву непоро́чну, стра́шну, безкро́вну Го́споду принося́,/ и себе́ само́го заколе́ние кро́вию, священному́чениче Вави́ло,/ нескве́рно приве́л еси́.

Дете́й, преподобне, младо́е мудрова́ние, я́ко мудр детоучи́тель,/ духо́вным воспита́в млеко́м, священному́чениче Вави́ло,/ в соверше́ние испра́вил еси́.

Припев: Пресвята́я Богоро́дице, спаси́ нас.

Богоро́дичен: я́ко и́стинно невеща́нна и непости́жна/ Твоего́, Богоро́дице, благоле́пнаго суть рождества́/ су́щим на земли́ и на Небеси́, Присноде́во, та́инства.

Ин. Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Припев: Святы́й проро́че Бо́жий Моисе́е, моли́ Бо́га о на́с.

Гугна́нию язы́ка и гла́са твоего́ уясни́вшуся Боже́ственным Про́мыслом, богови́дче,/ вити́я та́йн Бо́жиих яви́лся еси́ глаго́лы/ и ра́нами я́звил еси́ Еги́пет.

Коль пресла́вно зва́ние твое́, о богови́дче!/ Коль стра́шна дела́ твои́х чуде́с!/ Яви́ся бо Сый тебе́ Бог/ и, сла́вою возвы́сив тя, Изра́илю спаси́теля посла́.

Слава: Вся́каго перворо́дна порази́л еси́ еги́петскаго,/ я́ко Христо́с де́монов умертви́ держа́ву:/ о́браз бо бу́дущаго тобо́ю де́йствуемая и́стинно бы́ша, сла́вне.

И ныне, Богоро́дичен: Не приближа́йся се́мо, Моисе́й слы́шав,/ Бо́жию гла́су вопию́щу из пла́мене купины́:/ свя́то бо ме́сто в ле́поту преднаписа́/ пло́тию роди́тися Христу́ из Чи́стыя.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши/ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Припев: Священному́чениче Вави́ло, моли́ Бо́га о на́с.

Боже́ственную благода́ть Твою́, Иису́се,/ священному́ченик Вави́ла и́стинно с высоты́ прия́ше,/ я́ко и де́ти ю́ныя к Твое́й любви́ приведе́ и сме́рти к преоби́дению.

Боже́ственным зна́нием Твои́м осия́вся,/ священному́ченик Вави́ла вся уча́ше, Го́споди,/ Тя ве́дети, Еди́наго Бо́га, Су́що Го́спода,/ от мра́ка и льсти взыва́юща.

Боже́ственным избра́нием Твои́м прозна́менався священному́ченик Вави́ла слове́сное пасти́ ста́до Твое́,/ Тебе́ прино́сит, Сло́ве Бо́жий, кровь свою́,/ к стези́ спасе́ния всех му́дре путеводя́.

Припев: Пресвята́я Богоро́дице, спаси́ нас.

Богоро́дичен: Богоро́дицу Тя от души́, Влады́чице мíра блага́я, испове́дующия спаса́й:/ Тя бо Предста́тельницу непобеди́му и́мамы,/ су́щую Богороди́тельницу.

Ин. Ирмо́с: Ты, Го́споди мой, Свет / в мíр прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Припев: Святы́й проро́че Бо́жий Моисе́е, моли́ Бо́га о на́с.

Ударя́еши Чермно́е и твори́ши разделе́ния мно́гая/ жезло́м твои́м, о богови́дче,/ да пока́жеши в сем Креста́ Боже́ственную си́лу.

О, дерзнове́ния прелюбе́знаго!/ О, простоты́ души́ чи́стыя!/ Аще позна́л еси́ мя па́че всех, к Бо́гу богови́дец рече́,/ разу́мно мне яви́ся.

Слава: Ка́менем покры́вся, не ви́дел еси́ Бо́жия Лица́,/ я́ко утае́на, о богови́дче,/ воплоще́ние же позна́л еси́ Сло́ва, я́ко за́дняя.

И ныне, Богоро́дичен: Вшел еси́ чу́вственне во мрак/ и навы́кл еси́ неизрече́нная, о богови́дче,/ я́ко хо́щет из Де́вы Бог пло́тию роди́тися, Спас.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мои́,// Многоми́лостиве.

Припев: Священному́чениче Вави́ло, моли́ Бо́га о на́с.

Жите́йское мо́ре преле́стное зря волну́емо бу́рею,/ Вави́ла, пресла́вный страда́лец, вопия́ше:/ возведи́ из тли жизнь мою́, Многоми́лостиве.

Христу́ подо́бяся, за па́ству ду́шу твою́ пре́дал еси́,/ о сла́вный му́чениче и страда́льче, Вави́ло блаже́нне,/ и преле́стныя сте́ны разори́л еси́.

Дете́й непостоя́нное утверди́ му́дре/ свои́ми страда́ньми Вави́ла, приснопа́мятный страда́лец,/ к жи́зни Небе́сней от земли́ преводя́, пресла́вный.

Припев: Пресвята́я Богоро́дице, спаси́ нас.

Богоро́дичен: Пречи́стая Влады́чице, ро́ждшая земны́м Ко́рмчию Го́спода,/ страсте́й мои́х непостоя́нное и лю́тое укроти́ смуще́ние/ и тишину́ пода́ждь се́рдцу моему́.

Ин. Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Припев: Святы́й проро́че Бо́жий Моисе́е, моли́ Бо́га о на́с.

Во́инство стяжа́в Бо́жие Изра́иль си́льное,/ седмь у́бо зло́бы ханане́йския язы́ки погуби́л еси́,/ лю́дем ты в насле́дие дав зе́млю их.

Неизглаго́ланно вшед во мрак Боже́ственный, Моисе́е,/ иде́же Бог бя́ше, зовы́й тя,/ пи́санныя скрижа́ли пе́рстом Его́ законныя прия́л еси́,/ я́ко вели́к уго́дник Его́.

Слава: Поста́ви послу́шати Бог гла́са Своего́ богови́дца Моисе́я,/ Себе́ Само́го ему́ яви́в,/ да пока́жет стра́шное со сла́вою та́инство Свое́.

И ныне, Богоро́дичен: Ма́нием Боже́ственным Тя преднапису́ет Моисе́й сла́вный/ ковче́г, Богоро́дице, заря́ми Ду́ха всю́ду, я́ко зла́том, покрове́н/ в сла́ву Бо́жию.

Конда́к священному́ченика, глас 8. Подо́бен: Я́ко нача́тки:

Я́ко благоче́стия пропове́дника и страда́льцев утвержде́ние,/ Це́рковь сла́вит тя, Вави́ло сла́вне, освеща́ема днесь;/ но, я́ко име́я дерзнове́ние ко Го́споду,/ в ми́ре соверше́нием велича́ющия и восхваля́ющий тя сохрани́ти Христу́// моли́ся, о многострада́льне.

И́кос: Мiрску́ю я́ве суету́ помышля́я, мíра отчужде́нный,/ и Стра́сти Христо́вы подража́в, плотски́я стра́сти умертви́л еси́,/ и, крест твой взем, после́довал еси́, му́чениче, Зижди́телю твоему́,/ и, пребыва́я с Ним ны́не, моли́ся о честву́ющих тя и́стинно,/ о многострада́льне.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Припев: Священному́чениче Вави́ло, моли́ Бо́га о на́с.

Небе́сная чинонача́лия днесь,/ победоно́сцы зря́ще ю́ныя на пре́лесть и чу́днаго Вави́лу,/ вопия́ху сра́дующеся Христу́:/ благослове́н еси́, Го́споди Бо́же отце́в на́ших.

Влады́чня светоно́сная уясни́ благода́ть соше́дшияся ве́рныя,/ венцено́сный же сла́вный Вави́ла повелева́ет сра́дующимся вопи́ти:/ благослове́н еси́, Го́споди Бо́же отце́в на́ших.

Мучи́телей у́бо недоуме́яшеся умышле́ние, помоществова́ти не су́щим бого́м,/ Пресвято́й же Тро́ице чу́дный Вави́ла повелева́ет вопи́ти:/ благослове́н еси́, Бо́же отце́в на́ших.

Припев: Пресвята́я Богоро́дице, спаси́ нас.

Богоро́дичен: Тобо́ю, Ма́ти Де́во, Свет возсия́ вселе́нней све́тел:/ Ты бо Зижди́теля всех родила́ еси́, Бо́га,/ Его́же моли́, Всечистая, низпосла́ти нам, ве́рным, ве́лию ми́лость.

Ин. Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Припев: Святы́й проро́че Бо́жий Моисе́е, моли́ Бо́га о на́с.

В боговиде́ниих неизглаго́ланных Боже́ственный писа́тель быв,/ весь му́дрый вид ски́нии ты сло́вом ухи́трив,/ началозда́телю Веселеи́лу предложи́л еси́ дея́ние, богови́дче Моисе́е.

Свяще́нствовати дерзну́в Корре́й с тобо́ю, яви́ся низше́д во ад жив,/ всежре́бийно Бо́гу тебе́ честно́е, Моисе́е, храня́щу,/ ца́рствия и свяще́нства вку́пе.